ЧИИТ ТӦЛГЕ КӦЗІДІМ ПОЛЧАЛАР
21.12.2022
Хабарлар
Ветераннар чӧбіне – 50 чыл. Республиканың Культура кінінде Хакасияның Ветераннар чӧбінің 50 чылына чарыдылған пайрамнығ чыылығ ирткен
Ағбанда С.П.Кадышевтің адынаң культура кінінде улуғ частығ ветераннар чыылысханнар. Чазан салған илееде кізінің кӧксінде орден-медальлар, знактар полған. Удур-тӧдір таныстар, хуҷахтазып, ӧріністерінең ӱлесчеткеннер. Хай піреезі, фойеде турғызылған стендтердегі сомнарны кӧріп, анда таныс кізілер таапчатхан. Пасхазы «50 чыл Хакасиядағы ветераннар чӧріміне» пазылған панно алнында сомға суурын турған. Піди регионның город-аймахтарынаң килген ветераннар постарының халых пірігізіне пайрамнығ 50 чыл толчатханын таныхтирға чыылысханнар.
Улуғ залның сценазындағы экранда мының алнындағы тустарда тоғынған ветераннарның сомнары (слайдтар) кӧзіділген, кӧглер, сарыннар истілчеткен. Пайрамға чыылысхан чон аразында Хакасия пазы Валентин Коновалов, министерство-ведомстволар устағҷылары, Ӧӧркі Чӧптің депутаттары, халых пірігістернің кізілері, муниципальнай пӱдістернің пастары паза даа пасха кӧп аалҷы полған.
Прайзы залзар чыылысханда, ведущай хазна флагтары кирілчеткеннеңер чарлаан. Парадха кисчең кип-азахтығ чааҷылар Россияның паза Хакасияның флагтарын, строевой хаалағнаң сценазар апарып, анда турғысханнар. Олох туста Россияның паза Хакасияның гимннерi толдырылған. Ведущай, сценазар республиканың чаа паза iстеніс, тирігліг кӱстернің паза право хайраллаҷаң органнарның ветераннары чӧбінің кнезі Галина Алексеевна Трошкинаны хығырып, ол Хакасияның толдырығлығ комитедінің кнезі полғаннаңар, кӧп чыл правительствода тоғынғаннаңар, Хакас Республиканың саблығ ӱгретчізі, Хакасияның аарластығ чуртағҷызы полчатханнаңар искірген.
Галина Алексеевна, сценазар сығып, Ветераннар чӧбінің 50 чылына чарыдылған пайрамнығ пленум азылчатханнаңар чарлаан.
– 1972 чылда Хакас автоном облазында ВЛКСМ обкомының I съезді ирткен. Анда областьтың Ветераннар чӧбі тӧстелген. Пу халых пірігісті тӧстиріне улуғ хозым иткен Владимир Николаевич Штыгашев. Сыннаң аны ол тӧстеен тиирге чарир. Ол чонның аарлазынаң тузаланча, аны прай Россияда чахсы пілчелер. Хазии хоостыра ол пленумға кил полбаан, піс ағаа пик хазых алғапчабыс.
Пірігіс тӧстелгеннең 50 чыл иртіп парды. Амды Ветераннар чӧбі Хакасияда иң кӧп кізіліг, аарласнаң тузаланчатхан пірігіс полча. Ирткен чылларда ол тирең паза алғым ӧзіп одырған, аның пӧліктері ам полған на аалда тоғынча. Пірігіс прай кізілерге полысча, алынҷа ведомстволарда даа аның органнары тӧстелче.
Пу залда республиканың Ветераннар чӧбінің прай кізілері чыылысхан, iдӧк город-ааллардаң иң чахсылары пеер килгеннер. Олар пос кӧңнінең тоғынчалар, прай кӱстерін пу тоғысха салчалар. Аарлас, улуғ алғыс прайзына. Халых пірігісте правительствода тоғынған кізілер, пӧзік устағҷылар, предприятиелернең, организацияларнаң устаан кізілер тоғынчалар. Олар олаңай кізілернің кирексіністерін чахсы пiлчелер.
Ӱлгӱдегілернең піс хада-пірге тоғынчабыс. Республиканың аймахтарынҷа, аалларҷа чӧріп, муниципалитет пастарынаң, чоннаң тоғазығлар иртірчебіс. Устағҷылар, пістің тоғызыбыс тузалығ полчатханын піле, прай саринаң піске хабасчалар. Асхыс аймаа пазы Абрек Васильевич Челтыгмашевке алынҷа алғыс читірчебіс, ол пістің тоғызыбысха сыбыра чахсы чӧлег полча. Республика устаа, Валентин Олегович Коновалов позы даа сыбыра піске полысчалар. Ӧӧркі Чӧптің депутаттарынаң пик палғалыс тутчабыс. Пістің пірігіске тӧреміл полысчатхан ӱчӱн улуғ алғыс читірчебіс Хакасияның устағ-пастаана. Халых пірігістернең аймах сурығларҷа хада-пірге тоғынчабыс.
Пӱӱн пістің пірігіске 50 чыл толчатханына чарыдылған пайрамнығ пленум иртірчебіс. Че Ветераннар чӧбiнің тоғыс салтарларынаңар сан пирic иділбес, аннаңар 30 минутаа узарадылчатхан фильм кӧріп аларзар, – чоохтаан Ветераннар чӧбінiң кнезі.
Iди экранда ветераннар пірігізі тӧстелгеннең сығара амғы тусха теере хайдағ тоғыс апарылғаннаңар документальнай фильм кӧзіділген. Мына ветераннар, чыылызып, автобусха одырып, чолға сыхчалар. Аалларда Илбек Ада чаа араласчыларынаң тоғасчалар. Хакасия облисполкомынаң кӧп чыл устаан Василий Архипович Угужаков областьтың экономиказын тилідеріне хайдағ улуғ хозым иткенi кӧзіділче. Прай тилекейге саблығ Сойан-Сус ГЭС-ты пӱдірерінде амғы ветераннар хайди араласханы таныхталча.
Фильм тоозылғанда, сӧс Хакасия пазы Валентин Коноваловха пирілген.
– Аарлығ арғыстар! Прай чӱреемнең сірерні республиканың Ветераннар чӧбіне 50 чыл толчатхан пайрамнаң алғыстапчам. Пу ирткен чылларда сірер улуғ чол тобырғазар, кӧп тузалығ кирек иткезер. Пірігіс чиит тӧлні патриотизмге ӱгредер, регионның чуртас-экономика сурығларын пӧгер улуғ тоғыс апарча. Анда опыттығ устағҷылар араласчалар. Хакасияны паза Россияны тилідеріне улуғ хозым итчезер. Президент Владимир Путиннің хазна суверенитедін арачылир политиказына хабасчазар. Илбек Ада чааның сыны ӱчӱн турысчазар, тархынны пасха оңдайға алыстырчатханынаң тоғыр кӱресчезер.
Бандеровецтер, власовецтер, 5-ҷі колонна пастарын кӧдірчелер. США, Запад маскаларын суурыбысханнар, олар Россияны чох ит саларға сағынчалар. Сірернің тӱзімнiг тоғызыңар ӱчӱн улуғ алғыс. Правительство сірерге полызарға прай ниме итче. Оңдайыбыс пар полза, улуғ улусха хабазар тоғыс апарчабыс. Мыннаң мындар Ветераннар чӧбінең хада-пірге тоғынарбыс, пик палғалыс тударбыс. Сірерге пик хазых, тоозылбас кӱc, наа чидіглер алғапчам! Пайрамнаң прайзын! – теен Валентин Коновалов.
Анаң Хакасия пазы тӱзімнiг тоғынчатхан ветераннарға сыйыхтар читірген. Iди «За заслуги перед Хакасией» орденге турысхан Алтай аймааның ветераннар пірігізінiң кнезі Галина Войнова. Алты кізі «Трудовая доблесть Хакасии» медальларнаң сыйыхтатхан, ікі ветеран – Хакас Республиканың Аарластығ пічиинең. Iдӧк алты кізі Хакасия пазының алғыстас пічиин алған, оларның санында Асхыс аймааның ветераннар пірігізінің кнезі Алефтина Тахтобина полған.
Хакасияның Ӧӧркі Чӧбінің Аарластығ пічіктерін ветераннарға читірген парламент кнезінің орынҷызы Евгений Молостов. Улуғлар чӧбінің кнезі Пётр Воронин чахсы чидіглер кӧзiтчеткен ветераннарны «Чахсы киректер ӱчӱн» орденнең сыйыхтаан. Хакасияҷа федеральнай инспектор Николай Сайбараков, чоох тудып, Галина Трошкинаа ӧӧн федеральнай инспекторның алғыстас пiчиин читірген.
Сыйыхтастар аразында республиканың культура кінінің чайаачы ӧмелері паза ырҷылары постарының устарын кӧзіткеннер.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде