ТУРҒЫЗЫЛҒАН ПӦГIННЕР ТОЛДЫРЫЛҒАН
28.12.2022
Хабарлар
КУЛЬТУРА. 2022 ЧЫЛ ТИКСI ХАЗНАА ООЙ ЛА НИМЕС ЧЫЛ ПОЛҒАН. ЧЕ, АНДАҒ ДАА ПОЛЗА, ЧУРТАҒҶЫЛАР, АЙМАХ ОРГАНИЗАЦИЯЛАР СИДIКСIНIСТЕРНI ТУРЫСТЫРА ТОБЫРЫП, АЛНЫНДА ТУРҒЫЗЫЛҒАН ПӦГIННЕРНI, КӦСТЕГЛЕРНI ТОЛДЫРАРҒА КӰСТЕНГЕННЕР. АМДЫ, ЧЫЛ ТООЗЫЛЧАТХАНДА, ПУ ТОҒЫСТЫҢ САЛТАРЛАРЫН КӦРЧЕБIС
Хакасияның культура министерствозына пу чыл пайрамнарнаң, ӱлӱкӱннернең, наа пӱдiрiглернең танығлығ полған. Пӱӱл Хакасияа «Культура» нацпроектче пирiлген федеральнай ахча синi, алнындағы ӱс чылнаң тиңнестiрзе, 60 %-ке кӧп полған.
2022 чылда пу проектче Алтай аймааның Алтай аалында паза Таштып аймаандағы Ибіг аалда наа культура тураларын пӱдiрiп пастааннар.
ХГУ-ның музыка колледжi республикаа пирiлген, анзы Хакасия культуразына чиит тоғынҷыларны тимнирiнде чахсы хабазығ полар. Амды ол Хакасияның искусство колледжi тiп адалар. Ӱгредiг пис специальностьча апарылар: «Чонның хоос чайаачызы», «Кӧг тириинең ойниры», «Хор дирижеры», «Музыка теориязы», «Эстрада музыказының искусствозы». Пеер кiрерге сағынчатханнарның пiчiктерiн килчеткен чылда чайғызын алып пастирлар.
Хазнабыстың культура министерствозынаң хада-пiрге тоғыс апарылчатхан сылтаанда, Хакасиядаң 15 олғанға Россияның сцена искусствозы институдынзар кӧстеглiг ӱгредiгҷе ӱгренер оңдай пирiлер. Пеер кiрiп алар ӱчӱн, школа алай ба ортын профессиональнай ӱгредiг организациязын тоосханнарға орыс тiлiнҷе паза литератураҷа ЕГЭ паза чайаачы чоохтазығларны иртiбiзерге кирек.
С.П.Кадышевтiң адынаң чон чайаачызының кiнi пӱӱл 85 чылын таныхтаан, ағаа «национальнай» ат пирiлген. Iдӧк чон чайаачызы кiнiне республика бюджедiнең 34 млн салковай позыдылған. Пу ахчаа тыхтағ тоғыстары иртiрiлген.
Таштыптағы хумартхылас паркында Россиядағы чаа-тархын пiрiгiзiнiң кӱстенiзiнең Совет Союзының Матырлары Григорий Зоринге паза Александр Назаровха хумартхы тастар турғызылған.
Хакасияда креативнай индустрия школазы азылған. 12 – 17 частығ олғаннар мында алты кӧстегҷе ӱгренчелер: анимация, дизайн, электроннай музыка паза пасхазы даа.
Хакасия пазы Валентин Коноваловтың чахиинаң паза культура министерствозы пастаанынаң хазна сыйыхтарынаңар законға алызығлар кирiлген. Мындағ оңдайнаң чайаачыларға наа аарластығ аттар пирiлер – Чон хайҷызы паза Ил нымахчызы.
А.А.Кенельнiң адынаң 1 № олған музыка школазының iкi ӱгретчiзi Мария Сартыкова паза Тамара Соколова Россияның иң чахсы 50 ӱгретчiзi санына кiргеннер, оларға ахчалығ сыйыхтар читiрiлген.
Республиканың чиит музыканттары Хызылчарда ирткен ХХI Дельфийскай ойыннарның лауреаттары полыбысханнар. Мария Сартыкова устапчатхан «Чылтыс» ансамбль алтын медаль утып алған. Музыка колледжiнiң студентi Регина Кокова, фортепианонаң ойнап, кӱмӱс медальны холға кирген, аның ӱгретчiзi Ирина Никифорова полча.
Автор :
Тимнеен Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы