ӦӦН КӦСТЕЕ – ПӦЗIК ПIЛIСТIГ СПЕЦИАЛИСТТЕРНI ТИМНИРI
28.12.2022
Хабарлар
ХТИ-ға – 55. Сибирьнiң федеральнай университедiнiң филиалы Хакасиядағы техническай институт пайрамнығ 55 чылын таныхтады
1960 чылларда Хызылчарның ӱстӱнзархы саринда Саянскай промышленность-производство комплекciн пӱдiрердеңер чарадығ алылған. Аны чуртасха кирер ӱчӱн ӧнетiн пiлiстiг специалисттер киректелген. Iди Ағбанда Хызылчарның политехническай институдының общетехническай факультедi азылған. Аның пастағы устағҷызы физика-математика наукаларының кандидады Василий Владимирович Кошманов полған. Пастағы курсха 150 студент алылған. Аннаң андар вуз ӧткiн тилеен, пӧзiк квалификациялығ преподавательлер алылған, наа кӧстеглер турғызылған, специальностьтар азылған, материально-техническай база нааҷылалған, лабораториялар тӧстелген паза даа пасхазы.
2006 чылда ХТИ Сибирьнiң федеральнай университедiнiң холына пирiлген. 2014 чылдаң амға теере институтнаң биология наукаларының докторы, доцент Елена Бабушкина устапча. Амды ХТИ республиканың ӧӧн вузы полча, хайзы регионға техническай специалисттернi тимнепче. Олар пӱдiрiг, электроэнергетика, машиностроение, прикладная информатика, экономика паза даа пасха кӧстеглер. Анда пӧзiк квалификациялығ, улуғ опыттығ преподавательлер паза ученайлар iстенчелер, хайзылары студенттерге пiлiс пирерiнең пасха, iдӧк чарытхы ӱзӱрлирінең, нанотехнологияларнаң айғасчалар паза даа пасха кӧстеглерде пiлiстерiн кӧзiтчелер.
Ӱгредiг учреждениезi республиканың аймах предприятиелерiнең чағын палғалыс тутчатханнаңар, институтты тоосхан чиит оол-хыстар табырах тоғыс таап алчалар. Олар регионның прай даа предприятиелерiнде iстенчелер тиирге чарир. Iди институт «Хакасэнерго» ООО-наң 10 азыра чыл хада-пiрге тоғынча, анда вузты тоосхан 250 азыра специалист iстенче.
– Институттың ӧӧн кӧстее – ол пӧзiк пiлiстiг специалисттернi тимнирi. Кӱзi, тiзең, преподавательлер ӧмезiнде, ученайларда, хайзылары тоғызына, студенттерге паза вузха хынчалар, – таныхтаан ХТИ-ның ректоры Елена Бабушкина.
2006 чылда ХТИ СФУ-ның иң килкiм филиалы полыбысхан. 2016 чылда институтта чааҷы кафедразы азылған. Ол iдӧк алнынзар улуғ хаалағ паза вузтың устағ-пастаана улуғ нандырығ.
55 чыл аразына институт 15 муң азыра специалист сығарыбысхан. Оларның чарымызы республиканың предприятиелерiнде iстенерге халған. Амды вузта пiр муң азыра студент ӱгренче. Пайрамнығ кӱнде институттың актовай залында ХТИ-ны тӧстирiнде араласхан, аны тилiткен паза амғы туста iстенчеткен ветераннар паза преподавательлер чыылысханнар. Оларны паза студенттернi Хакасия пазы Валентин Коновалов чылығ алғыстаан паза сыйыхтар читiрген.
– Хакас техническай институтты тоосхан специалисттер республиканың промышленнозын, пӱдiриин паза энергетиказын тилiтчелер. Пӧзiк пiлicтiг специалисттернi тимнирi – ол вузтың паза республиканың ӧӧн кӧстее. Профессияда, наукада чидiглерге чидерге, аймах проекттернi чуртасха кирерге алғапчам, – чооғында таныхтаан Валентин Олегович.
Хакасияның ӱгредiг паза наука министрi Анатолий Бутенко, алғыстастарға хозылып, институтты национальнай проекттерде ӧткiн аралазарға хығырған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы