РЕГИОН ОПЕРАТОРЫНЫҢ ТОҒЫЗЫ ЧОННЫ ЧӦПСIНДIРБИНЧЕ
20.01.2023
Хабарлар
КӰРГЕН АЙЫНЫҢ 17-ҷi КӰНIНДЕ ХАКАСИЯ ПАЗЫНЫҢ ОРЫНҶЫЗЫ ЮРИЙ КУРЛАЕВ ГОРОД-АЙМАХТАР ПАСТАРЫНАҢ ПАЗА «АЭРОСИТИ-2000» РЕГИОН ОПЕРАТОРЫНАҢ ХАДА ПУ АҒЫРСЫМНЫҒ СУРЫҒ ХООСТЫРА ПАЗОХ ТОҒАСХАННАР. АНДА IДӦК ПӰДIРIГ ПАЗА ЭКОЛОГИЯ МИНИСТЕРСТВОЗЫНЫҢ КIЗIЛЕРI АРАЛАСХАННАР.
Ирткен чылның улуғ хырлас айынаң сығара кӱрген айының 17-ҷi кӱнiне теере пӱдiрiг паза чурт-коммунальнай хоных министерствозынзар cӧп-сап тузында сығара тартылбааннаңар 100 азыра хоп кiрген. Айланыстарның кӧбiзi регион операторына сығдырат полбинчатханына паза чахығ пир полбинчатханына чарыдылған. Хоптар ӧӧнiнде Ағбан, Харатас городтардаң паза Ағбан пилтiрi, Алтай аймахтарынаң кiргеннер. Похсах алынҷа туралар хыринаң сығара тартылбинчаттыр.
Хакасияның чир-чайаан ис-пайы паза экология министрi Владимир Лебедевтiң чооғынаң, iкiнҷi орыннығ чирге, хайзынзар Ағбан, Харатас, Сорығ городтар, Ағбан пилтiрi, Алтай аймахтары кiрчелер, тиксi республикада чыылчатхан сӧп-саптың 70% килiсче. Ол похсахты сығара тартарынаң 32 техника айғасча, ол санда тоғыс ла машина регион операторының. Сӧп-сапты тузында сығара тартарынҷа сидiксiнiстер ирткен чылның сiлкер айында сығыс килгеннер. Анаң ӱртӱн айында хатап похсах тузында сығара тартылбиныбысхан.
– Алынҷа тураларның чуртағҷылары диспетчерге сығдырат полбинчатханы хоостыра чоохтаза, пiстiң хоза телефоннар тоғын сыхханнар, че пiр айланысха чарым минута хорадылған полза, амды алты-читi минута киректелче. Мин Ағбаннаңар ла чоохтапчам. Анзы нименең палғалыстығ? Кiрген 1000 чахығдаң тузында тӧлепчеткен 387 ле кiзi. Пасхазы похсахты сығара тартхан ӱчӱн пiр дее тӧлебинче, пiреезiнiң лицевой счёттары даа чоғыл. Хай пiреезi тузында тӧлепче, че оларның сӧп-сабы норматив синiн асча. Алынҷа туралардаң нормативті асчатхан 2100 контейнер сығара тартхабыс, – теен «Аэросити-2000» ООО пӧлиинiң директор орынҷызы Юрий Токмашев.
Аның таниинаң, алынҷа туралардаң похсахты сығара тартар ӱчӱн, сӧп-сапты чыыр орыннар тӧстирге кирек. Анзы муниципалитеттернiң тоғызы.
Ағбан пазының орынҷызы Владимир Жуковскийнiң чооғынаң, алынҷа туралардаң похсахты сығара тартарына андағ орыннар тӧстирге кирек чоғыл.
Кiзiлер сӧп-сапты, хаптап салып, ограда тастынзар сығар салчалар, кӧбiзiнiң контейнерлер пар. Оларны чыырға график тимнеп саларға кирек, чуртағҷылар машина хаҷан килерiн пiлер ӱчӱн. Че Юрий Токмашев пу сағыснаң чараспаан.
2019 чылда «Аэросити-2000» ООО Ағбаннаң 119,5 муң тонна сӧп-сап сығара тартыбысхан полза, 2020 чылда – 62 муң тонна, 2021 чылда – 71 муң тонна, 2022 чылда – 55,9 муң тонна. Че регион операторы кiзiзiнiң чооғынаң, Ағбан город ӧсче, похсах синi дее кӧптең кӧп полып одырча. Че пу саннар тоғырхыны чоохтапчалар.
Сорығда сӧп-сапты сығара тартарынаң муниципальнай унитарнай предприятие айғасханда, сидiксiнiстер полбаан. Регион операторы килгенде, кӧп квартиралығ туралар даа хыриндағы cӧп-сап чайыл сыххан. Амды контейнердегi похсахты апарар алнында, сӧп-сапты талластырып, ибiре чай салчалар. Ол орынны кемге-де арығлирға киректелче.
Юрий Курлаевтiң таниинаң, похсахты сығара тартар инфраструктура тӧстелбееннеңер, мындағ сидiксiнiстер сығысхан. «Аэросити-2000» ООО тоғызын нандырығлығ толдырбаза, Хакасия правительствозы регион операторы статузын суурар ӱчӱн чарғызар айланар. Чыылығ араласчылары регион операторына сӧп-сапты сығара тартар графиктi тӧстирге чӧп пиргеннер.
Iдӧк регион операторына тоғынчатхан, похсахты сығара тартарынаң айғасчатхан перевозчиктердеңер чоох парған. Оларның пiреезi чуртағҷыларға хоза тӧлег ӱчӱн похсахты хаҷан даа сығара тартыбызарға тимде. Мындағ оңдайнаң, кiзiлерге «Аэросити-2000» ООО-даң пасха перевозчиктерге хорадынарға килiсче.
Прай сидiксiнiстернi пӧгерiне «Аэросити-2000» ООО-ға пiр ай пирiлген. Республика ӱлгӱлерi пу киректi кӱннiң сыныхтағда тударлар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы