ӰЗӰРІГДЕ – ЧОНҒА ТЕЕЛЧЕТКЕН СУРЫҒЛАР
03.02.2023
Хабарлар
Тоғазығ. Хакасия пазы Валентин Коновалов Россияның Хазна Думазының сӧбіре, ипчілер паза палалар сурығларынҷа комитедінің кнезі Нина Останинанаң тоғасхан
ТОҒЫСЧЫ ТОҒАЗЫҒ АЗЫҒ АЙЫНЫҢ 1-ғы КӰНІНДЕ ИРТКЕН. НИНА АЛЕКСАНДРОВНА ПУ КӰННЕРДЕ ТОҒЫС ХООСТЫРА ПІСТІҢ РЕСПУБЛИКАДА ААЛЛАПЧА. РЕГИОН УСТАҒҶЫЗЫ НИНА ОСТАНИНАНАҢ ХАДА АЛЫНҶА СУРЫҒЛАРНЫ ӰЗӰРІБІСКЕН: ӦНЕТІН ЧАА ОПЕРАЦИЯЗЫ АРАЛАСЧЫЛАРЫНЫҢ СӦБІРЕЛЕРІНЕ СОЦИАЛЬНАЙ ХАБАЗЫҒ ПИРЕРІН, ӦКІС ПАЛАЛАРҒА ЧУРТ ПИРЕРІН, КӦП ПАЛАЛЫҒ ПАЗА ЧУҒА ЧУРТАПЧАТХАН СӦБІРЕЛЕРГЕ ХАБАСЧАҢ ОҢДАЙЛАРНЫ ПАЗА ПАСХА ДАА СУРЫҒЛАРНЫ. ОЛАР ІДӦК МЫННАҢ МЫНДАР ПІРГЕ ТОҒЫНАРЫН ӰЗӰРГЕННЕР.
Валентин Коновалов Хакасия правительствозы чуртағҷыларға хабазығлар пиреріне алынҷа хайығ салчатханын таныхтаан, кізі чахсы чуртиры – правительствоның пис ӧӧн стратегия кӧстеглерінің пірсі. Республика бюджеді пу чылға кибірли социальнай кӧстегліг полча – прай хорадығларның 70%-і (31,2 миллиард салковай) социальнай сфераа кӧрілген. Ол бюджет сферазы тоғынҷыларының чал ахчазы ла нимес, ідӧк ӱгренҷілерні азырирына, региондағы іҷе капиталына индексация идеріне, республикадағы ӧрт ӱзірҷеңнерге хабазығларны тыыдарына паза пасха даа кӧстеглерге хорадығларны ӧскірері.
Ӧкіс палаларға чурт пирҷең сурығ ам даа ағырсымнығ полча. Регион правительствозы ӧкістерге квартиралар аларына бюджет хорадығларын чыл сай ӧскірче (2018 чылнаң тиңнестірзе, хорадығлар тӧрт хати ӧс парғаннар). Че ол теес улуғ полғанын санға алза, федеральнай кіннің хабазии чох ол сурығны саңай чабысчаң оңдай чоғыл.
Геополитика киректері алысчатханда паза Россия пӱӱн ӧнетін чаа операциязын апарчатханда, республика правительствозы Хакасиядаң парған СВО араласчылары сӧбірелеріне социальнай хабазығ пирҷең сурығларға кӧдіре хайығ салча. Регионның комплекстіг программазы чарадыға алылған: андар кірген хабазығларның чардығы ирткен чылдох тоғынып пастаан, пу чылның 1 январьынаң сығара, тізең, социальнай хабазығлар алчатханнар саны алғыдылған. Амды ол хабазығларны мобилизациядағылар ла нимес, ӧнетін чаа операциязының прай араласчылары алчалар.
Хакасия пазы Нина Останинаа социальнай сфераны чахсыландырарына улуғ хозым итчеткен, республикаа хайығ салчатхан, регионның федеральнай синдегі пастағларына хабасчатхан паза сурығларны пӧгеріне полысчатхан ӱчӱн алғызын читірген.
Хазна Думазының сӧбіре, ипчілер паза палалар сурығларынҷа комитедінің кнезі позы саринаң пӱӱн кӧдірілген сурығларҷа, ол санда федеральнай законодательствоны алыстырарынҷа, хабазарға тимдезін искірген.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде