ХАДА-ПІРГЕ ТОҒЫС САЛТАР ПИРЧЕ
03.02.2023
Хабарлар
Чыылығ. Хакасияның Ӧӧркі Чӧп кнезі Владимир Штыгашев республикаҷа Россияның УФСИН устағ-пастаандағы алғым чыылиинда араласты
Россияның хатығластарны толдырҷаң федеральнай службаның Хакасияҷа устанызының алғым чыылиинда ідӧк республика пазы Валентин Коновалов, аның орынҷызы Юрий Курлаев, толдырығлығ ӱлгӱ органнарының, кӱс структураларының, халых пірігістерінің устағ-пастаа паза кізілері араласханнар.
Чыылығны Россияның хатығластарны толдырҷаң федеральнай службаның Хакасияҷа устанызының пастығы Андрей Мисюра асхан. Ол ведомствоның тоғыс салтарлары искіриинде 2022 чылда колония-поселениелерде хатығлаттырғаннар саны хозылғаннаңар, че тиксі паза хатығ оңдайлығ тӱзедіг учреждениелерінде, ідӧк имнег-тӱзедіг учреждениезінде паза істезіг изоляторында одырчатханнар хызырылғаннаңар таныхтаан.
Устағҷы ідӧк ведомствоның хада-пірге тоғызын тилідіп, пылтыр хазна ӱлгӱ органнарынаң паза муниципальнай пӱдіcтернең 79 чӧптезіг иділген. Оларны хоостыра 27 миллион салковайға чахығлар толдырылған, ол, тізең, 2021 чылдағы салтардаң 37% пӧзік. Аның искіриинең, хатығлаттырған чон ӧӧн чиисті паза кип-азахты 100% постары тоғынып алчалар.
Владимир Штыгашев, чоох тудып, Хакасияҷа Россияның УФСИН устағ-пастаана паза тоғынҷыларына чахсы тоғыс ӱчӱн алғыс читірген:
– Азынада сананыстарҷа, ирткен чылда хатығлаттырғаннарның хадағҷылардаң тискеннері, кізіні чох идерінҷе, хазыхха ӱрег ағылғанынҷа сайбағ иткеннері паза сағыбаан киректер сығарғаннары таныхталбаан.
Ідӧк Владимир Николаевич Хакасияҷа УФСИН алнында турчатхан пӧгіннерні таныхтаан:
– ФСИН тоғынҷыларына, адвокаттарға, халых пірігістерінің кізілеріне амғы тусха килістіре тоғыс оңдайларын тӧстирге киректелче. Ол – Россия Президенті Юстиция министерствозының 220 чылына чарыдылған чыылығда чарлаан кӧні чахии. Президент пістің паза сірернің алныңарда пірге пӧгін турғысча – тӱзедіг кіннерін тӧстирінҷе тоғысты узарадарға, хайда хатығлаттырғаннар хатығласты, кӱснең тоғынып, иртерлер, аның ӱчӱн чал ахчазын аларлар, іди иткен ӱрегні айландыр поларлар. Піске сірернің сығарыстарыңда технология синін кӧдірерге киректелче. Пілдістіг, профессионализмі пӧзік синніг кізі хатығлас соонаң пос чуртасха чапчаң кӧнік парча. Сірернің салтарларың чал ахчазы тӧлелчеткен орында тоғынчатханнар саны хозылғанын паза арығ парыс ӧскенін кӧзітче, ол чахсы чидіг.
Автор :
Хакасияның Ӧӧркі Чӧптің хабарлар пӧлии
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде