ОРКЕСТРНIҢ ЧИДIГЛЕРI
03.02.2023
Хабарлар
Культура. Хакасияның искусство колледжiнде хакас кӧг тирiглерiнің оркестрi пар. Аны 2000 чылда Людмила Кирбижекова тӧстеен.
Ағбандағы музыка училищезiн 1993 чылда тоосханда, Людмила Владимировна «Ӱлгер», «Ладо» ансамбльларда артист полған, соонаң Хызылчар крайының филармониязында iстенген. 1999 чылда Хызылчардағы искусство институдын тоосхан, анаң Н.Ф.Катановтың адынаң Хакас хазна университедiнзер тоғынарға кiрген. Л.В.Кирбижекованың кӱстенгенiнең Ағбандағы музыка колледжiнiң хакас кӧг тирiглерiнің оркестрi тӧстелген.
Пӱӱнгi кӱнде хакас кӧг тирiглерiнің оркестрiнең дирижёр Ольга Астанина (хыс фамилиязы – Карачакова) устапча. Ол Людмила Владимировнаның ӱгренҷiзi. Ольга Александровна Ағбандағы музыка колледжiн, соонаң искусство институдын тоосхан.
Оркестрнiң ӧӧн кӧг тирии хомыс полча. Анда iдӧк iкi чатхан, iкi ыых, контрабас, хомыс-бас, хобырах, тӱӱр пар. Оол-хыстар ӧӧнiнде хомыснаң ойнирға ӱгренчелер. Пастағы курстың студентi Владимир Бурнаков ла чатханнаң ойнапча. Оркестрге кӧг тирiглерiн устар Сергей Чарков паза Пётр Топоев итчелер. Оодыл парғаннарын оларох тыхтап пирчелер.
Иллюстраторлар Вячеслав Албычаков паза Лариса Идимешева студенттернi кӧг тирiглерiнең ойнирға ӱгретчелер. Кӧп студент школа соонаң ӧнетiн музыка ӱгредии чох килче. Музыка школазын тоосхан чииттер парох.
Оркестрзер 1 – 4 курстағы студенттер кiрчелер, прай 27 оол-хыс.
Cтуденттернiң хакас кӧг тирiглерiнің оркестрi Ағбандағы культура учреждениелерiндегi чайаачы иирлерде ӧткiн араласча, iдӧк республиканың аймахтарынҷа концерттернең чӧрче.
2012 чылда Башкортостандағы Уфа городта чон кӧг тирiглерi оркестрлерінiң паза ансамбльларының «Зов Урала» марығ-фестивальында пiстiң оркестр II степеньнiг лауреат полыбысхан.
2015 чылда Кемеров облазындағы Мыски городта «Сибириада» чоннар аразындағы фестиваль-марығда пастағы орын алған. Олох 2015 чылда Бурятия Республикадағы Улан-Удэ городта ирткен «Многоликая Россия» тиксi Россия синiндегi фестивальда чайаачы чииттерiбiс iкiнҷi орынны холға киргеннер, 2016 чылда Москвада ирткен олох марығда – III орынны.
2016 чылдох Ағбанда «Хысхы саңнары» фольклор паза сарын мариинда Гран-принiң ээзi полыбысхан. 2019 чылда Хызылчар крайындағы Сус посёлокта «Мир Сибири» чоннар аразындағы фестивальда «Сарын паза кӧг тирии ансамбльы» номинацияда «МИРА» cыйыхха лауреат полыбысхан.
2021 чылда оркестрнiң кiчiг ӧмезi паза «Шейк» амғы теелбектер ансамбльы «Гарда кӧл хазындағы орыс кӱскӱзi» чоннар аразындағы фестивальда, 2022 чылда Хызылчардағы фестивальда, анаң Ағбандағы «Хысхы саңнары» республика мариинда араласханнар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде