Алтын паза платина тойын таныхтапчатханнарның ӱлӱкӱні
03.02.2023
Хабарлар
Харатастағы ЗАГС-та 2 февральда республика пазы Валентин Коновалов алтын тойын паза платина (бриллиант) тойын таныхтаан пис ирепчіні алғыстаан.
Хоных хонып, хада 50 чыл чуртап салған тӧрт ирепчі алтын тойын пайрамнаан, олар - Воронченко, Коловских, Руденко паза Шишлянников ирепчілер. Игнатенко ирепчі, тізең, 60 чыл хада чуртап, бриллиант тойын таныхтаан.
- Сірер чуртаста сынаан сидіксіністер хонииңарны улам пик идіп тыытхан. Анзы чиит тӧлге уғаа чахсы кӧзідім полча. Пістің правительствода чарадығ алылған, пу чылдаң піс сірер осхас сӧбірелерні сыйыхтап турарбыс. Пасхазы сӧбiре хайди тӧстелерге кирек полчатханын кӧрзін тіп іди чаратхабыс. Сӧбіре - ол кӱннің сай иділчеткен тоғыс, палалар, сағыссырас, сидіксіністерні хада-пірге тобырғаны. Сірер пу чуртас чолын турыстыра ирткезер.
Позымның паза Хакасия правительствозы адынаң сірерге пик хазых, узах час чазирға, чахсы чуртас паза ырыс-часка алғапчам, - теен Валентин Коновалов.
Танығлығ кӱнде улуғ частығ ирепчілерні алғыстирға кил парғаннар пала-пархалары. Пайрамнығ тойын таныхтапчатхан улус ЗАГС-та чыылысхан чонға алғызын читірген. Людмила Борисовна Воронченко, ӧрінізінең ӱлезіп, теен:
- Хазнада оой нимес тус полза даа, Хакасия правительствозы пісті, улуғ частығларны, ӧріндірерге тус тапхан. Сірерге прай ниме ӱчӱн алғызым читірчем. Улуғ алғыс.
Республика пазы чахығ пирген хоостыра чарадығ алылған: 50, 60, 70 чыл хада чуртап, пайрамнығ тойын таныхтапчатхан ирепчілерге ахчалығ сыйых пирерге. Ол чарадығ пӱӱл 1 январьдаң кӱзіне кірген. Андағ тӧлег сині - 10 муң салковай.
Пу тӧлегні алар ӱчӱн, ирепчее айланарға чарир, пайрам чағдап, танығлығ кӱнге теере пір ай халза алай пайрам соонаң алты ай ирткенҷе. Сурыныс пічиинең чонға социальнай полызығ пирҷең управлениенің орындағы пӧлиинзер айланарға кирек.
Мындағ ахчалығ сыйыхха Хакасияда 20 чыл паза аннаң даа кӧп тус чуртап салған, пір дее чарылыспин чуртаан ирепчілер турысчалар. Олар пазағы пайрамға - 10 чыл пазынаң - пазох мындағ пір тӧлегні ал поларлар, андада сурыныс пічии киректелбес.
Республикада пу кӱнге пайрамнығ тойға пирілчеткен тӧлегні алар ӱчӱн 132 сӧбіре айланған, 10 сӧбірее ахчалығ сыйых пиріл парған.
Автор :
Тимнеен Инора Боргоякова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде