ИДІНҶЕК ПОЛАРҒА – ПІЛІСТЕР ПАЗА ХАБАЗЫҒ
10.02.2023
Хабарлар
Екатерина ЭКЛЕР: «Пос киреенең айғасчатхан алай тӧстирге сағынчатхан полған на кізіні пістің кінде сағыпчабыс!»
Хазна хабазии. Хакасияның тиліс чыындызының идінҷектер хабазииның кін устағҷызы Екатерина Эклернең 2022 чылның салтарларынаңар паза пу чылға пӧгіннердеңер чоохтасчабыс
– Екатерина Александровна, 2022 чылда кін пастыра идінҷектерге хайдағ хабазығлар читірілген?
– Піс читірчеткен полызығлар уғаа алғым – кіннің специалисттері аймах сурығларҷа искіріг-чарыдығлығ полызығлар пирчеткенінең пасти, пос киреенің франшизазын тимнеп, Россияның чырғалларына сығарға полысчатханына теере. Оларны адап пирерге сағынчам.
2022 чылда республиканың чуртағҷылары паза идінҷектері кіннің мындағ полызығларынаң тузаланғаннар паза мероприятиелерiнде араласханнар: хығыртылған эксперттернің налогтарҷа, ахча паза право сурығларынҷа искіріг-чарыдығлығ полызиинаң тикке тузаланғаннар; радиоҷа паза садығ тураларында тимде аудиороликтерні турғысханнар, рекламаҷа сабланғаннар; тастындағы рекламаны паза печать полиграфиязының ниме-ноозын тимнирінең тузаланғаннар; ниме-нооға паза полызығларға сертификат алғаннар; гостиница киреенің классификациязын ирткеннер; фирманың алай ниме-нооның таңмазын санға турғыстырғаннар; сайттар тимнеп алғаннар; республикабыстың идінҷектері Россиядағы кӧзідіглерде аралас килгеннер паза пасха даа. Тоғызыбыстың килкім чардығы ӱгредіг полызығларын читірерінең палғалыстығ. 2022 чылда піс пос киреен пастирға сағынчатхан чуртағҷыларға даа, посха тоғыс таапчатханнарға даа, пос кирее ээлеріне дее ӱгредіглер иртіргебіс. Ӧменең тоғынарын, тоғынҷыларны орта кӧстирін, сабланарын паза маркетингті, чӧптезіглер апарарын, психологияны паза пасха даа сурығларны ӱзӱргебіс. «Пос кирее азбуказында» наа тоғынчатхан идінҷектерні ӱгретчебіс: пос киреен нимедең пастирынаңар паза социальнай чӧптезіге, пічіктер тимнеп, бизнес-план хайди пазарынаңар чоохтапчабыс.
– Наа хабазығлар кирілген ме?
– Я, 2022 чылда піс пастағызын на «Хакасияның ынағ пос кирее» ярмаркаларны иртіргебіс: чайғызын Хубачарда, Саяногорскта паза Ағбан пилтірінде, улуғ хырлас айында наа чыл ӱлӱкӱннері алнында Ағбанда. Ярмарка республиканың посха тоғыс таапчатханнарына паза идінҷектеріне полызығларын паза ниме-ноозын кӧзідерге, тиксі Хакасияа постаңар искірерге, пос киреене тикке реклама алып аларға, наа арғыстар таап, тузалығ палғалыстарны тыыдарға чахсы оңдай пирген, араласчылар, тізең, орында ниме-ноо сығарчатханнарнаң чағын танызып алғаннар паза кӧңнілеріне кірген ниме-нооны садысханнар.
Ирткен чылда ідӧк наа полызығ чуртасха кирілген: идінҷектің ниме-ноозында сығарылған география орнын пічікке киргебіс. Чахсы оңдайнаң тӧрт пос кирее ээзі тузаланып алған. Регионның посха тоғыс таапчатхан паза пос киреенең айғасчатхан 20 азыра кізізі сығарған ниме-ноозын электроннай садығ ачыхтарында садарға ӱгренген. Посха тоғыс таапчатханнарға піс нап-наа кирек киргебіс – пастағызын на «Хакасиядағы посха тоғыс таапчатханнар» реалити-проект тоғындырғабыс. Анда посха тоғыс таапчатханнарның азахха турчатханынаңар, пос киреенеңер паза аның тилізінеңер кӧзідіг суурары кӧрілген. Ідӧк араласчылар пос адын кӧдірерінҷе, сабландырарынҷа тренингтерге чӧргеннер, халғанҷы тоғазығда олар, «Минің пос киреем» кіннің кізілері паза маңнаныстығ идінҷектер чарғызы алнына сығып, пос проекттерінең таныстырғаннар. Араласчылар хатығ таллағ ирткеннер, 30 сурыныстаң пизі ле алылған, кемнің пос кирее сағызы тіріг, чарых полған, итсе, оларны иптирге киректелгенӧк. Пістің проектібіс ол читпестерні тӱзедерге полысхан. Араласчыларға сыйыхха олардаңар паза киректерінеңер кӧзідіг суурылған. Оларны пістің соцсетьтердегі пірігістерібісте кӧрерге чарир.
Пастағызын на посха тоғыс таапчатхан чуртағҷыларға «Ӱгредіг кӧстенізі 2.0» саблығ проектте аралазар оңдай пирілген.
– Идінҷектер хайдағ полызығларнаң хынып тузаланчалар? Ноға?
– Хайди тидірлер: «Реклама садығны тибіретче». Пістің дее полиграфия ниме-ноозын сығарарынҷа, тастындағы рекламаны тимнирінҷе полызығлар, радиодағы реклама паза сайтты тимнирі, фирманың кӧрімін (стильiн) тӧстирі – улуғ кирексініcнең тузаланчатхан полызығлар. Посты паза айғасчатхан киректі орта кӧзітпин, пос киреен сабландырарға, наа садығ чырғалларынзар сығарға, клиенттер санын хозарға киліспес, аннаңар чылдаң чылға рекламаҷа полызығларға кирексініс пӧзік поладыр.
Сертификат алары паза ниме-ноо таңмазын пічікке кирері ідӧк улуғ кирекciнiсте. Идінҷектер ӧӧнінде наа ниме-нооның качествозын киречілир ӱчӱн сертификат аларға айланчалар. Халасха даа, полуфабрикаттарға даа, косметикаа даа. Пірее ниме-нооға хайди даа сертификат киректелче, уламох идінҷек маркетплейстерге сығарға пӧгінчетсе. Полызығларға сертификат алары ідӧк сабланча, кӧзідімге, СТО-ларға.
Ниме-ноо таниин пічікке кирерінҷе полызығ, кӧзідімге, пасхаҷыл ат сағын таап алған идінҷектерге, патент алып, аны посха артызар ӱчӱн киректелче. Ниме-ноо тании – фирманың адын сірердең пасхазы тузаланмазына гарантия. Пӱӱнгі кӱнде, хаҷан идінҷектерге кирексіністер ӱзігі чох кӧдірілче, пос киреенең айғасчатхан кізее позына тӧӧй кирек тутчатханнардаң пасхалаларға, таныс поларға киректелчеткеннеңер, фирманың кӧрімі пірдеезіне тӧӧй полбасха кирек.
– Сизінгенде, кін посха тоғыс таапчатханнарға ідӧк хабасча. Оларға хайдағ хабазығ кӧрілгеннеңер чоохтап пиріңер.
– Я, піс оларнаң чағын тоғынчабыс. Пістің кінзер айланчатхан посха тоғыс таапчатхан чуртағҷылар ӧӧнінде аймах полызығлар читірчелер: косметика, ӱгредіг, искіріг-чарыдығлығ, тыхтағ паза пасха даа, алай чайаачы кирекнең айғасчалар: палғапчалар, хоостапчалар, ниме-ноо чайапчалар. Оларға піc тикке ӱгредіг иртірчебіс: маркетингче, пос киреен сабландырарынҷа, ахча сурығларынҷа, маркетплейстерге сығарынҷа, ідӧк рекламаҷа полысчабыс паза кӧзідіг-ярмаркалар иртірчебіс. 2022 чылда піc тузалығ ӱгредіге хайығ салғабыс, аннаңар пастағызын на посха тоғыс таапчатханнарға наа профессия аларға алай бьюти-индустрияда квалификациязын кӧдірерге сағынчатханнарға ӱгредіг чарлаабыс. 20 азыра кізі маникюр, депиляция, кірбіктер ӧскірері паза визаж кӧстеглерҷе ӱгренген. Ирткен чылда посха тоғыс таапчатханнар наа профессия аларға кӱстенгеннер. Хайда кирексініс пар, анда чӧптер тӧріпче тидірлер. Аннаңар пӱӱл піс оларға наа узанысха ӱгренер оңдай пирербізӧк.
– Кіннің 2022 чылдағы тоғыс салтарларын саннарда кӧзіт пиріңер.
– 2022 чылда Идінҷектерге хабазығ кіні Хакасияның кічіг паза ортын пос киреенең айғасчатханнарға, посха тоғыс таапчатханнарға паза чуртағҷыларға 4000 азыра полызығ читір салған. Ол кӧрілген синнең тӧрт хати кӧп! Пос киреен апарарынҷа искіріг-ӱгредігліг 96 мероприятие иртір салғабыс. Прай 2931 кізі араласхан.
Хакасия идінҷектерінің паза посха тоғыс таапчатханнарның ниме-ноозын паза полызығларын кӧртізер пӧгіннең чоннар аразындағы ӱс кӧзідігде 21 идінҷекке аралазарға полысхабыс. «Хакасияның ынағ пос кирее» республика ярмарказында, хайзы 2022 чылда пастағызын на Ағбанда, Ағбан пилтірінде, Саяногорскта паза Хубачарда ирткен, 93 идінҷек паза посха тоғыс таапчатхан 60 кізі араласхан.
Республиканың 73 идінҷегі сертификат аларынҷа полызығнаң тузаланған, 12 кізі ниме-ноо таниин санға турғысхан, фирма кӧрімін сағын табарынҷа полызығ пос киреенең айғасчатхан 26 кізее читірілген.
Полиграфия ниме-ноозын паза тастындағы рекламаны тимнирінҷе полызығ пос киреенең айғаcчатхан паза посха тоғыс таапчатхан 111 кізее читірілген. Идінҷектерге 18 сайт тимнелген, радиода паза «Командор», «Аллея», «Батон», «Хороший» садығ тураларында рекламалығ 20 аудиоролик турғызылған.
2022 чылда пастағызын на электроннай садығ ачыхтарынзар сығар кирекке 21 кізі ӱгреніп алған, маркетплейстерге сығарынҷа – пис идінҷек паза посха тоғыс таапчатхан 4 кізі.
Ідӧк 2022 чылның иң танығлығ киректеріне хайығ айландырарға сағынчам. Сілкер айында Тиксі Россиядағы идінҷек неделязы ирткен. 200 азыра араласчаа маркетингче, чон алнында чоох тударынҷа тренингтер, ойын, чиит идінҷектерге «Пос кирее азбуказы» ӱгредіг иртірілген. Идінҷектернең хада «Пос кирее аллеязында» ағастар одыртхабыс. Россия идінҷегінің неделязы пайрамнығ чыылығнаң тоозылған. «Минің пос киреем» кіннең хада кӧп чыл ізестіг тоғынчатханнарны паза идінҷектерні алғыстас пічіктерінең паза сыйыхтарнаң таныхтаабыс. Олар #Мойбизнеспомогает чӧрімде араласханнар. Чӧрім чуртастың сидік оңдайларына кір парған палалығ сӧбірелерге Піліс кӱніне паза Наа чылға полызарға кӧстелген.
Хакасияның экономика тилізі министерствозынаң хада-пірге иртірілген мероприятиелерні алынҷа таныхтирға кирек. Оларның санында #Немалыйбизнес региондағы пос кирее форумы 500 азыра араласчы чыып алған; «Хакасияның идінҷегі» региондағы марығ – 90 араласчы, 24 кізі финалда паза 8 чиңісчі; «Чылның иң артых социальнай проекті» тиксі Россияның социальнай пос кирее проекттерінің VIII марииның региондағы чардығы – 40 араласчы, идінҷектердең – сигіс чиңісчі, посха тоғыс таапчатханнардаң – пір чиңісчі.
– 2023 чылда сірер олох полызығларны читірерзер бе алай алызығлар полар ба?
– Чыл сай кирексініснең тузаланчатхан ӧӧн полызығлар тӧстел парған, ол санда халғаннар: реклама, сертификат алары, ниме-ноо таңмазын пічікке кирері, кӧзідіглер, пос киреенің франшизазын тимнирі. Республика идінҷектері аннаң хынып тузаланчалар.
Пӱӱл піс ӱгредіге ідӧк хайарбыс паза федеральнай спикерлерні тартарға кӱстенербіс. Регион синіндегі тоғазығлар паза форумнар узарадылар. «Хакасияның ынағ пос кирее» ярмаркаларның араласчыларын хозарға паза муниципалитеттернің санын алғыдарға сағынчабыс.
«Ӱгредіг кӧстенізі» паза «Ӱгредіг кӧстенізі 2.0» ӱгредіг проекттерінің ікізі уғаа маңнаныстығ ирткен. Анда 130 азыра кізі араласхан. Кӧп сурыныс кірчеткенде, піс 2023 чылда «Ӱгредіг кӧстенізі 3.0» проектті узарадарбыс.
– Сірер Хакасияның ӧӧн городында орныхчазар. Республиканың пасха город-аймахтарының идінҷектерінең хайди тоғынчазар? Оларны тартар ӱчӱн ниме итчезер?
– Пістің кінде ікінҷі чылы Пос кирее десанты тоғынча. Андар «Минің пос киреем» кін тоғынҷылары, Хакасияның экономика тилізі министерствозының паза пос киреене хабасчатхан пасха пірігіcтернің кізілері кірче. Пос кирее десанты республиканың муниципалитеттерінзер чорыхнаң чӧрче, ол санда ыраххы даа. Ӧӧн пӧгін – пос киреенең айғасчатханнарнаң тоғазып, оларның сурығларына нандырып, кіннің республика синіндегі хабазығларын паза аның оңдайларын чарыт пирері. Таныхтирға кирек, ол чорыхтар 2023 чылда ідӧк узарадылар. Ағаа хоза пілерге кирек, Хакасияда санға алылған хайдағ даа идінҷек паза посха тоғыс таапчатхан чуртағҷы кіннің хабазиинаң тузалан полар.
– Пос киреенең айғазарға сағынчатхан чуртағҷаа хайдағ чӧп пирерҷіксер?
– «Минің пос киреем» кінзер искіріг-чарыдығ полызиина айланарға. Пістің специалисттер нимедең пастирға паза хайдағ кӧстегҷе хайынарға чарыт пирерлер, посха тоғыс таапчатханнарға, пір чылдаң асхынах алай аннаң кӧп тус идінҷек пол салғаннарға читірілчеткен хабазығлардаңар чоохтап пирерлер.
Хозылыңар ВКонтакте паза Телеграм социальнай сетьтердегi пістің пӧліктерге, «Минің пос киреем» кіндегі хабарлардаңар паза чарлалчатхан хабазығлардаңар тузында пілерзер. Піс кӧп тузалығ искіріг сығарчабыс, хабазығлардаңар паза мероприятиелердеңер чоохтапчабыс. Пос киреенең айғасчатхан алай тӧстирге сағынчатхан полған на кізіні пістің кінде сағыпчабыс паза чоох апарарға тимдебіс!
Автор :
Чоохтасхан Наталья СЮПТЕРЕКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы