ОЛЬГА ШИРКОВЕЦ: «НАЦИСТТЕР АЧЫН АҢНАРДАҢ ДАА ЧАБАЛЛАР...»
10.02.2023
Хабарлар
Полызығ. Россияның наа регионнарына хазнаның прай пулуңнарынаң полызығ апарылча. Андағ чорыхтарның пірсінеңер пу чоох
Хайдағ тызы чох кізі Ольга Валериановна Ширковец! Сағам на мында полған, паза ла кӧрзең, хайдар-да ойлап париған полар.
Ольга Валериановна «Хакасия» газетаның ӧӧн редакторының орынҷызы, iдӧк Россияның Журналисттер пірігізінің региондағы пӧлиинің кнезі, ағаа хоза, республика парламентінің мының алнындағы нинҷе-де хығыртииның, амғы хығыртииның депутады полча. Аннаңар аны пір орында табарға сидік. Устағҷы даа полза, ол редакция машиназынаң хаҷан даа тузаланминча, прай киректерҷе позының автомобильінең ойлат чӧрче.
2014 чылда Крым чарым олтырых паза Севастополь город, референдум иртіріп, Украина холынаң Россияа айланғаннар. Пылтыр, iдӧк референдумнар иртіріп, Россияның наа регионнары полыбысханнар Луганск Чон Республиказы (ЛНР), Донецк Чон Республиказы (ДНР), Запорожье паза Херсон областьтары. Че анда ам ӧнетін чаа операциязы иртірілче, хатығ чаалазығлар парча, пу наа регионнарның чардығы ам даа Украинаның холында. США паза прай Запад нацисттер устапчатхан Украинаа чаа апарҷаң наа тиріглернең полысчалар.
Наа регионнардағы город-аалларны Украинаның нацисттері НАТО-ның артиллериязынаң паза залпнаң атчаң ракета системаларынаң чаалапчалар. Iди амыр чуртағҷыларның тураларын, прай инфраструктураны иңзерчелер. Кӧп чон полчатхан рыноктарны, имнег тураларын, школаларны, олған садтарын, ӧнетін кӧстеп, атчалар. Андағы чон хыйалланчатханын кӧрерге аар. Иңзерілген город-ааллардағы тураларны хатап пӱдірерiне полызығ хайди даа киректелче. Андағ полызығ Россияның прай регионнарынаң, ол санда пістің Хакасиядаң, ызылча.
Мындағ киректернi кӧріп, полған на кізінің чӱрее ағырча. Ольга Ширковецтің чӱрее уламох ағырчатпас па, ол Донбасстағы Краматорск городта тӧреен нооза. Аның наа регионнарға хайдағ-да оңдайнаң полызығ пирер сағыс тӧреен. Ольга Валериановна «Справедливая Россия – Патриоты России – за Правду» социалистическай политическай партия кізізі полча. Ағаа партия сағыстарын чуртасха кирерге хайди даа хабасча. Ӱc партия, пірігіп, мындағ блок тӧстеен. «Справедливая Россиянаң» Сергей Миронов устапча, «Патриоты России» – Геннадий Семигин, «За Правду» – Захар Прилепин.
Хайди чоохтаан Ольга Ширковец, ол Хазна Думазының депутады Геннадий Семигиннің полысчызы, журналист Татьяна Евгеньевна Пискунованаң хада Донбассар пӱдіріг материалларын ызар кирекнең айғас сыххан. Мында оларға улуғ полызығ иткен «УКС» Жилстрой» ООО-ның ӧӧн директоры Александр Сличный (ол 400 муң салковайға паалалған тура хырын чапчаң профлистті тикке пирген, iдӧк аның базазында пӱдіріг материаллары чыылған).
Пу тоғысты апарарға чахсы хабасханнар «Хакасияның пӱдірігҷілері» пірігіс (устағҷызы Михаил Борисов), «ПСК Стальмонтаж» ООО, «НП Строй» ООО, КСК «Людвиг» ООО, идінҷектер Николай Сорокин, Ольга Киргинекова, Ольга Ильясова, Александр Исаков. Прай 20 тонна пӱдіріг материаллары чыылған, аны тикке апарарға хабас пирген Саяногорсктағы идінҷек Юрий Симонов. Ағбанда материалларны таарлирға полысханнар городта орныхчатхан чааҷылар. «Фураны» Донбассар чалғызан руль кистінде апарған водитель Дмитрий Стехин (ол позы Лугансктаң, мындағ рейстерні пастағызын на толдырбинча). Пу адалған прай организацияларға паза кізілерге улуғ алғыс.
– Пӱдіріг материаллары таарлалған машина чорыхха сығыбысханда, піске поездтiг парарға киліскен. «Ағбан – Сочи» кӧні авиарейс тоғызын тохтат салтыр. Адлерге чидіп, Ростовсар iдӧк поездтіг парғабыс, аннаң андар ЛНР-зар – автомобильліг. Анда пограничниктернің сыныхтағ пунктынҷа ирткебіс, – узаратхан чооғын Ольга Валериановна. – Луганскта пісті Захар Прилепиннің штабының кізілері удурлааннар. Штабнаң Юрий Геннадьевич Мезинов устапча, штаб полызығ киректерінең айғасча. Ипчізі Екатерина Александровна, «Добрый ангел» организация тӧстеп алып, iдӧк полызығ пирҷең тоғыс апарча.
Анда прайзына хабазығ киректелче, школалар чабых, олғаннар ырахтаң ӱгренчелер. Городта комендант чазы тоғынча, пірееде соох кӱннер турыбысча, анаң сала чылып парыбысча. Ырах ниместе чаалазығлар парча, че ниме дее полза, чуртағҷылар городты арығлапчалар, иптіг чуртирға кӱстенчелер. Піс Новоайдар, Сватово поселоктарда полғабыс, олар фронттаң 20 километр оортах орныхчалар. Анда имнег туразын США-ның хаймерс ракеталарынаң атханнар, палығлатхан чааҷылар, олаңай даа чуртағҷылар анда имненчеткеннер. Атыста кӧп кізінің чуртазы ӱзілген. Координаттарны националисттерге орындағы хай пірее чуртағҷылар пирібісчеткен осхас.
Северодонецк хыриндағы Метелкино аалда полып, чӱреебіс саңай ӧлген. Мының алнында анда чалаң аттығ чӧрҷең школа полтыр. Андар церебральнай параличнең ағырчатхан палаларны прай Украинадаң имненерге ағылҷаңнар. Чаалазығлар пасталғанда, анда нацисттернің айдаровецтері туртырлар. Устағҷы, иң чабал нацист Билецкий, андох полтыр. Олар постарына аттар хыстырлар, че пирбинчеткеннерiнде, прай аттарны хулуннарынаң хада ат салтырлар, гранаталар тастап, минометтаң атып, аттарны ӧртебістірлер. Прай аалны иңзер салып, аны Россия чааҷылары иткен тіп пыролааннар. Нацисттер – кізі ниместер, кізі омазын чідір салған аңнардаң даа чабаллар.
Че, ниме дее полза, ааллардағы иңзеріл парған тураларда кізілер чуртапчалар, парарға хынминчалар. Олар чобалбинчалар, кӧңнілері тӱспинче, таңдағы кӱнге киртінчелер. Андағ пик хылыхтығ кізілерге поғдархирға ла халча. Кӧзідімге, чолда піске 80 частығ ууҷа учурап парған. «Северодонецксер ағырчатхан пархама имнер аларға парчам», – теен. Піс «Добрый ангел» пірігіссер сығдыратхабыс, аның волонтерлары кирек имнерні табырах ағыл пиргеннер.
Лугансксар килгендӧк, піске бронежилеттер кизірт пиргеннер, ол чох чӧрерге чарабас тіпчелер. Пістің машина пӱдіріг материалларын читiргенде, оларны кирекciпчеткен город-аалларзар табырах апарыбысханнар. Чааҷыларнаң кӧп хати тоғасхабыс, олар чахсы тудынчалар, хоптығ пір дее сӧс истерге киліспеен, чиңic хайди даа пісти поларына ізенчелер, аның ӱчӱн олар анда кӱресчелер. Iдӧк чоохтирға кирек, Захар Прилепин, контракт хати идіп, ӧнетін чаа операциязында араласча.
Мындағ чорыхнаң Лугансксар чӧр килгеннер Ольга Ширковец паза Татьяна Пискунова. Олар, 25 январьда андар парып, 1 февральда ибзер айланғаннар.
Украинада иртірілчеткен ӧнетін чаа операциязында араласчатхан чааҷыларға паза Россияның наа регионнарына хазнаның прай чоны полызығ ысча, iди хада-пірге тудынчатхан чонны пірдеезінің чиңiп алар оңдайы чох полар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы