ӦТКӀН ЧИИТТЕРГЕ АЗЫХ ЧОЛ
15.02.2023
Хабарлар
Евгения Майнагашева чоох тутча
Чыылығ. Ирткен чылда хазнабыста «Пастағылар чӧрiмi» олғаннар паза чииттер пiрiгiзiн тӧстирдеңер чарадығ алылған
Чӧрiм тӧстелчеткенде, аның пӧлiктерi полған на муниципалитетте, иң кiчiг чардыхтары полған на школада азылар тiп кӧрiлген. Хазнабыстың ӧӧн кибiрлерiне, киктелерiне чӧленiп, пу организация олғаннарға паза чииттерге хазна тилiзiнде, политиказында аралазар оңдай пирче.
Хакасияда «Пастағылар чӧрiмiнiң» пӧлии азылғанох. Аннаң Евгения Майнагашева устапча. Ирткен неделяда ол Хакасия пазы Валентин Коноваловнаң, орынҷызы Михаил Побызаковнаң, республиканың ӱгредiг министрi Анатолий Бутенконаң тоғасхан паза организация тоғызының пастағы чидiглерiнеңер, салтарларынаңар искірген.
– Пу организация ӧсчеткен тӧлiбiске наа оңдайлар пирер, школада, ортын профессиональнай ӱгредiг заведениезiнде алай ба вузта ӱгренчеткеннерге республикабыстың, тиксi хазнабыстың тилiзiне хозым идерге полызар. Амғы туста чииттерге кӧрiлген полызығлар синiн ӧскiрiп одырзабыс, соонаң олар чоныбысты кӧдiрерлер. Аннаңар чӧрiмнiң тоғызына улуғ хайығ айландырарға кирек, – таныхтаан Валентин Олегович.
Евгения Майнагашева пӱӱнгi кӱнге «Пастағылар чӧрiмiне» тоғынарға кирек пiчiктер тимде тiп искiрген. Муниципалитеттерде тоғынарына организацияа тиксi 23 ставка пирiлтiр. Iдӧк аймах мероприятиелер иртiрерiне ахча пирiл партыр. Амғы тусха организацияның устағ-пастаа, аймахтарҷа чарыдығлығ тоғыснаң чӧрiп, чӧрiмнеңер чоохтапча, оларға хозыларға чӧптепче.
Евгения Валерьеваның таниинаң, олар пӱӱл кӧп мероприятие, аймах марығлар иртiрерге сағынчалар. Чайғызын олғаннар тынанҷаң пірее лагерьде ӧнетiн смена азарға пӧгiнчелер. Хакасияда чарлалған Чииттер чылына паза тиксi хазнада чарлалған ӱгретчi паза ӱгредіг кӧстегҷізінің чылына чарыдылған мероприятиелерде iдӧк ӧткiн аралазарға тимненчелер.
Амғы туста муниципалитеттерде, тоғыс орыннарын тимнеп, кирек техника турғысчаттырлар. Чӧрiмнiң Хакасиядағы пӧлиинiң устағҷызы iдӧк аймахтарның устағ-пастаанаң, ӱгредiг устаныстарынаң, школаларнаң хада-пiрге тоғыс хайди парчатханынаңар чоохтаан. Евгения Валерьевна кӧбiзi пу тоғысха чахсы хозылча тiп искiрген, че прайзы ла андағ ӧткiн нимес осхас. Iди Пии аймаа адалған, мында чӧрімде аралазар кiзiнi ам даа тапхалахтар, аннаңар тоғыс апарары сала тудылча тiп таныхталған.
Iдӧк Анатолий Бутенко чыылығда ӱгредiг министерствозы саринаң чӧрiм тилирiне хайдағ полызығ пирiлчеткеннеңер чоохтаан. Амғы тусха организация орнығар орын таап алтырлар, амды транспорт сурии пӧгiлче теен ол.
Анатолий Алексеевич марттың пастағы кӱннерiнде ӱгретчi паза ӱгредіг кӧстегҷізінің чылын азарына чарыдылған мероприятиелер иртер тiп таныхтаан. 3 мартта аны Россия синiнде азарлар, 6 мартта – республика синiнде. Хакасияда пайрам Н.Г.Булакиннiң адынаң лицейде иртер тiп кӧрiлче. Че ӧӧн пайрамнар алнында ползалар даа, ӱгретчi паза ӱгредіг кӧстегҷізiнің, Чииттер чылларына чарыдылған мероприятиелер январьдаңох иртiрiлiп пастааннар. Оларның планы тимде. Аны хоостыра тоғазығлар, конференциялар паза даа пасха кӧрiмнiг ӱлӱкӱннер иртер.
Чыылығ тоозылчатханда, Михаил Побызаков Евгения Майнагашеваа чӧрiм тоғызы хоостыра ол-пу чӧптер пирген. Кӧзiдiмге, ХГУ-да «Пастағылар чӧрiмiнең» айғазар кiзее алынҷа ставка пирерге паза муниципалитеттернең хада-пiрге тоғынардаңар алынҷа чӧптезiглер пiчiкте тимнирге, андада олар пу тоғысха нандырығлығ хайарлар теен. Валентин Коновалов чӧрiмнiң тоғызы тиксi хазнаның тилiс стратегиязынаң палғалыстығ тiп таныхтаан, аннаңар прай кирек полызығ пирерге тимдезiнеңер искiрген.
Автор :
Татьяна Кыштымова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде