МАТЫРЛАР СЫЙЫХТАРЫ ЧАҒЫННАРЫНДА ХАЙРАЛЛАЛАР
22.02.2023
Хабарлар
Чааҷылар сыйыхтары. Ӧнетін чаа операциязында чуртастарын пир салған Филипп Чебодаевтің паза Сергей Афанасьевтің туғаннарына Мужество орденнері читірiлген
Чир-суғҷыларыбыстың хазна сыйыхтарын оларның туғаннарына читірер мероприятиеде араласханнар Ағбан городтың пазы Алексей Лёмин, аның орынҷызы Владимир Крафт, Хакасияның чааҷылар комиссары, подполковник Николай Видяйкин паза Ағбан городтың чааҷылар комиссары, полковник Николай Францевич.
Россия президенті Указынаң Украинада иртірілчеткен ӧнетін чаа операциязында, постарына айабин, махачыларын кӧзіткен ӱчӱн рядовой Филипп Николаевич Чебодаев паза ефрейтор Сергей Анатольевич Афанасьев Мужество орденнерінең сыйыхтатханнар (ӱреен соонда).
Алексей Лёмин Мужество орденін Филипп Чебодаевтің оолғы Андрей Чебодаевке, Сергей Афанасьевтің Мужество орденін ипчізі Лангара Шулаковаа читірген.
Чуртастарын пир салған махачы чир-суғҷыларыбыстың туғаннарынзар алғыс сӧстерінең Алексей Лёмин айланған:
– 80 чыл даа ирткелекте Европада фашизм пазох пазын кӧдірче. Украинада нацисттер кізі хорғыстығ тудынчалар, олаңай чуртағҷыларны ӧдірчелер, плендегі чааҷыларны иреелеп, чуртастарын ӱс салчалар. Пістің оолларға пазох Ада чир-суубысты арачылирға, чаалазарға килісче. Чир-суғҷыларыбыс Мужество орденнеріне турысханы олар сын иреннер, махачы чааҷылар полғаннарын кӧзітче. Пӱӱн сірерге читірілген сыйыхтарны, хайраллап, тӧлдең тӧлге пир турыңар. Матырларға сабланыс хаҷанға даа! Піс оларны ідӧк хаҷан даа ундутпаспыс!
Мероприятие тоозылғанда, Андрей Чебодаевнең хысхаҷахти чоох алысхабыс. Хайди ол искірген, сӧбіре Ағбанда чуртапча. Iҷезі, инсульт пол парып, ибдең сыхпинча. Аның соонҷа оолғы кӧрче. Пабазы Филипп Николаевич ачых-чарых кізі полған, транспорт компаниязында водитель полып тоғынған. Ағаа 51 час полған. Чардыхти мобилизация пасталғанда, оолғын мобилизацияа тартпазыннар тіп, позы чааҷы службазына сурынып алған. Анда пір айҷа ла полған соонда, 31 октябрьда чуртазын пир салған тіп сығдыратханнар. Амды ӱреен пабазы ӱчӱн кӧріл парған прай тӧлеглер пирілген, iҷезін имнирге, наа квартира аларға ахча чидісче. Ӧӧні – ам iҷезін хазыхтандырып алары.
Хайди кӧрчезер, хазна ӱлгӱлері пирген прай молҷағларын толдырча, ӧнетін чаа операциязы араласчыларының сӧбірелеріне прай саринаң полызығ пирілче.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде