СВО араласчыларына паза сӧбiрелерiне хабасчаң хазна чыындызы тӧстелер
22.02.2023
Хабарлар
Киҷее Россия президентi Владимир Путин Федеральнай Чыылығзар айланыснаң чоох тутхан. Хакасия чуртағҷыларының айланысты федеральнай каналларда кӧнi палғалыста кӧрер оңдай полған. Республика пазы Валентин Коновалов, тiзең, Гостевой дворда пасха регионнарның устағҷыларынаң хада айланысты искен.
Владимир Путин позының айланызында тилекейдегi хайызығларға, Россиядаң тоғыр чарлалған искiрiглiг паза хатығластар чаазына, чоныбыстың Ада чир-суубысты аарлапчатханына теелген. Президент позының айланызында кӧп алғыстаан: СВО араласчыларын, хазна чуртағҷыларын, ӱгретчiлернi, имҷiлернi, аал хонии тоғынҷыларын, инженерлернi, пӱдiрiгҷiлернi чуртас-экономика синiн кӧдiрчеткен ӱчӱн, тӧдiр пазынминчатхан ӱчӱн, тиксi чонны – чир-суубысты арачылирға, кӧдiрерге хозымы ӱчӱн, СВО-ның араласчыларына, Россия Армиязына хабасчатхан ӱчӱн!
Алғыс сӧстерi соонаң наа пӧгiннер турғызылған: экономикабысты, чонның чуртас синiн уламох кӧдiрерге, ол санда наа регионнарда! Олар Россияның чардығы полчатханнарын сизiнер ӱчӱн, прай чуртас-экономика тилiзiне ахча позыдылар, чуртағҷыларға, идiнҷектерге паза предприятиелерге хазнада кӧрiлген прай закон-право пiчiктерi теелер, ол санда социальнай тӧлеглерҷе.
Владимир Путин айланызын «Сын пiсти» сӧстернең тоосхан. Тиктең нимес. Ол чооғын кидеркi политиктернiң сӧстерiне турыспинчатханнарынаң, чалтанмин чойланчатханнарынаң пастаан. Чоох Россияның Украинадағы ӧнетiн чаа операциязынаңар ла нимес, ол тиксi хазнабыстаң тоғырланысха теелче. Россия тиксi тилекейге «хорғыс» ағылча. Нименең? Кибiрлерiнең. Сын ӱчӱн кӱресчеткенiнең! Тӧреен тiлнең чоох алызар оңдай полар ӱчӱн! Кибiрлiг киртiнiстерге тудынар ӱчӱн! Хоныхты ипчi паза ирен тӧстепчеткен ӱчӱн! Кидеркi хазналар, тiзең, хаҷан-да тиң оңдайлар ӱчӱн кӱрезiг апарған ползалар, амды аннаңар ундутчалар. Прай ол «ойынны» пiр хазна апарча.
Владимир Путиннiң айланызындағы иң танығлығ чардыхтарында Гостевой дворда чыылған Федеральнай Чыылығның кiзiлерi, регионнар пастары, халых пiрiгiстерiнiң кiзiлерi, СВО араласчылары нинҷе-де хати, турып, iзiг айа сабызынаң удурлааннар.
Айланыс соонаң Валентин Олегович президенттiң таныхтаан ӧӧн кӧстеглерҷе сағыс-кӧрiзiнең ӱлескен:
– Президент таныхтаан, хатығластар чаазы тузында россиядағы идiнҷектер, хырығ озаринзар сығарбин, ис-пайға паза постың истiг чуртазына хоратпин, ахчаларын чир-суубыстың экономиказына хозарға киректер.
Владимир Путин ӧнетiн чаа операциязының ветераннарының паза чуртастарын пир салған араласчыларының сӧбiрелерiне алынҷа хабасчаң хазна чыындызын тӧстирге чахаан, компанияларға россиядағы тирiглернi садызарына налог льготаларын алғыдарға чахаан, ӱгредiгде паза наукада алызығлар кирерге, кӧзiдiмге, вузтарда специалисттернi тимнирiнҷе кибiрлiг ӱгредiге айланарға, тоғысчы профессиялығ кадрларны тимнирiн пиктирге паза пасха даа чонға кирек алызығларны чуртасха кирерге хығырған.
Автор :
Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде