ПРАЙ СУРЫҒЛАР ХАЙЫҒДА ПОЛАР
01.03.2023
Хабарлар
Наа кін. Алындағы кӱн Хакасия пазының ситуационнай кіні азылды. Ол республика правительствозы туразының пастағы хадылында орныхча
ХАКАСИЯ ПАЗЫНЫҢ СИТУАЦИОННАЙ КІНІН АЗАРДАҢАР СУРЫҒ 2011 ЧЫЛДАҢ ТУРҒАН, АННАҢАР АНЫҢ АЗЫЛҒАНЫ УҒАА ТАНЫҒЛЫҒ КИРЕК. КІНДЕ ТӦРТ ТОҒЫС ОРНЫ ТӦСТЕЛГЕН. ТИКСІ РЕСПУБЛИКА ӰЛГӰЛЕРІНЕҢ, ГОРОД-АЙМАХТАРЫНАҢ, АЙМАХ ЧУРТАС-ЭКОНОМИКА КӦСТЕГЛЕРІНЕҢ ИСКІРІГЛЕРНІ ОНЛАЙН ЧЫЫПЧАТХАН СЕРВЕР ТОҒЫНАР. ИСКІРІГ-ӰЗӰРІГЛІГ КІН, ТІЗЕҢ, ЧАЗЫТ ОҢДАЙНАҢ ТОҒЫНАРҒА ТИМДЕ. ОЛ ӦНЕТІН КИРЕКСІНІСТЕРҶЕ ТИМНЕЛГЕН: СТЕНЕЛЕР СУУМ-СААМНЫ ИРТІРБИНЧЕ, ЭЛЕКТРОМАГНИТНАЙ ОҢДАЙНАҢ ТЫҢНИРҒА ПИРБИНЧЕТКЕН ТИРІГЛЕР ПАЗА КОНДИЦИОНЕР-ВЕНТИЛЯТОРЛАР ТУРҒЫЗЫЛҒАН. АНДА РЕСПУБЛИКА ПАЗЫ РОССИЯ ПРЕЗИДЕНТІНЕҢ ЧАЗЫТ ПАЛҒАЛЫСХА ДАА СЫХ ПОЛАР.
Ситуационнай кіннің пӧліктерін паза технологияларын Хакасия пазы Валентин Коновалов, аның орынҷызы Сергей Комаров, Хакасиядағы хадағның федеральнай службазының (ФСО) кізілері, пу служба проекттің чуртасха кирілчеткенін хайығда тутча, паалааннар. Республиканың саннығ тилізі паза палғалызы хазна комитедінің кнезі Екатерина Кузьмина кіннің тоғыс орыннарының тимнелгенін кӧртіскен паза турғызылған тиріглердеңер чоохтаан. Кін орнығар пӧліктерде тыхтағ тоғыстарын толдырған ӧӧн подрядчик «Ростелеком» ПАО полча, аның Хызылчардағы пӧлиинің устағҷызы Валерий Клейкин компания алнында турғызылған пӧгінні хайди чуртасха киргеннеңер чоохтаан. Полызыға «Сфера» АО паза «Техремсервис» ООО тартылғаннар.
Анаң искіріг-ӱзӱрігліг кінде Валентин Коноваловтың устаанынаң пастыхтар улуғ стол кистіне одырғаннар. Аннаң тоғыр стене улиинҷа экран тоғындырылған. Анда республика пазының пос кабинеді азылған. Аның пӱдізінеңер искірген кін специализі Татьяна Воронина. Аның таниинаң, Валентин Коновалов позының кабинедінде тиксі искіріглернең таныс полар: мероприятиелердеңер, чахығларының толдырылчатханынаңар; республика паза муниципальнай бюджеттернің толдырылчатханынаңар, республикада турғызылчатхан пӱдіріглердеңер, сығысчатхан ӧрттердеңер (олар Хакасияның картазында кӧзіділ турарлар), экология кӧзідіглерінеңер; национальнай паза регион проекттерінің чуртасха кирілчеткенінеңер, хазна садығларынаңар. Андох МВД паза МЧС искіріглері чыыл турар. Ідӧк республиканың толдырығлығ ӱлгӱ органнарынаң искіріглер тӧреміл нааҷылал турар. Хакасия пазының искіріглерні пис минута, кӱннің алай неделя сай даа нааҷылап турар оңдайы пар.
Хакасиядағы ФСО-ның ӧнетін палғалыс паза искіріг кінінің пастығы Геннадий Гравдиннің таниинаң, республикада пу кіннің азыларын ӱр сағааннар, Валентин Коноваловтың устаанынаң на пу проектті чуртасха кирерге прай оңдайлар тӧстелген. Сынында региондағы сурығларны пӧгерге хабасчатхан уғаа чахсы тиріг тимнел парған. Аны Россия президентінің чахиинҷа прай регионнар чуртасха кирче. Мыннаң мындар искіріглерні чығҷаң оңдайларны алғыдарға ла киректелче. ФСО кізілері пу тоғысты иптіг апарарға хабазарға тимделер.
Сағам ситуационнай кіннің пастағы чардығы ла тоғындырылды, чыл тоозылғанҷа проект пӱкӱлее чуртасха кирілері кӧрілче.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде