КЭФ’23: Сибирь тузы
01.03.2023
Хабарлар
Пӱӱн Хызылчардағы экономика форумы тоғызын пастабысты. Ӱс кӱн, кöрік айының 1-3-ӌі кӱннерінде, Сибирьдегі федеральнай университеттің кöп оңдайлығ кінінде тиксі хазнабыстың паза Сибирь регионнарының чуртас-экономика тилізі ӱзӱрілер. Пӱӱл форумның ööн хыйғызы: Сибирь тузы.
Форумда алынӌа чардыхха сығарылған сурығлар санында: городтарның паза креатив индустриязының тилізі, Арктика тилізі, кадрлар паза кізінің оңдайларын тилідері, экономиканың трансформациязы паза тастындағы экономика палғалыстарының алызығлары, саннығ технологияларны кирері паза наа технологиялар, экология паза туризм, импорт ниме-нооларын алыстырары паза промышленностьтың наа оңдайлары, Стратегия-2035.
КЭФ-та тиксі Сибирь регионнарының устағӌылары аралазар. Кöрік айының 2-ӌi кӱнінде Россия президентінің Сибирьдегі федеральнай округтағы полномочиеліг кізізінің устаанынаң алғым чыылығ иртер. “Сибирьдегі чöптезіг” МААС ідöк форум тузында позының чыылығларын паза “тегілек столларын” иртірер. Анда Хакасия пазы Валентин Коновалов аралазары кöрілче.
Аннаң пасха, форумда Сибирьдегі федеральнай округтарның инвестиция проекттерінің кöзідии иртер, ол санда пасха хан чирлерінең араласчыларға. Хакасияның проекттерінең таныстырар республиканың экономика тилізі министрі тоғызын толдырчатхан Роман Ковтун.
Пу чылда Севернің ас саннығ чоннарының кибірліг чуртазын хайраллирына улуғ хайығ айландырылча. Алынӌа орында Гастрономия институдының студенттері, аймах чоннарның кибірліг чиистерін тимнеп, аннаң форум араласчыларын таныстырғаннар.
Чоохтирға кирек, пӱӱл Хызылчардағы экономика форумы 19-ӌызын иртче. Полған на чыл Хакасия пазы, республика правительствозы кізілері пасха регионнарнаң, оларның ӱлгӱ органнарынаң, промышленность предприятиелерінең хада-пірге тоғынардаңар чöптезіглерде хол салчалар.
Автор :
Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде