КЭФ’23: Чииттернің таңдағызы кемнің холында?
01.03.2023
Хабарлар
Пу паза пасха даа сурығларға нандырығ тілееннер Хызылчардағы экономика форумының пастағы кӱнінде. Кибірли КЭФ-тың пастағы кӱні “Поколение - 2035” чииттер площадказы тоғызынаң пасталған. Аның кӱн сурии - “Таңдағызының профессионаллары: ӱгредіг паза тоғыс öзізі”.
Форум араласчылары аразынаң 14 лидер табылған, оларның санында Хакасияның политехническай колледжінің студенті Мария Кожевникова. Ол, пасха лидерлернең хада Хызылчарзар азынада киліп, ӱгредігні нааӌылаӌаң, профессия таллаӌаң, чииттерге тоғыс табарға хабасчаң паза Сибирь тилізінің кöстеглерін алғытчаң проекттер тимнееннер.
- Уғаа хынығ! - тіпче Мария. - Спикерлер хынығ чоохтапчатханнаңар, семинарлар тузы табырах иртче. Уғаа кöп наа паза тузалығ искіріг. Піс Тыва студенттерінең хада пір öмеде тоғынчабыс. Пістің тоғызыбыс салтары тренинг полар. Аны Хызылчардағы колледж студенттеріне иртірербіс.
Чииттер площадказында 600 чиит араласчы “аалӌы” чіли араласча. Оларның аразында халыхчылар, студенттер, специалисттер, “Пастағылар чöрімі” Россия олғаннары паза чииттері чöрімінің öткіннері.
"Поколение - 2035” чииттер площадказының ööн чыылиин Хызылчар крайының губернаторы Александр Усс асхан. Аның таниинаң, пӱӱнгі чииттернің, Сибирьдегі вузтарда ӱгреніп, профессия алып, тоғыста чахсы öсчең оңдай пар.
Ӱзӱрігде араласханнар килкім предприятиелернің устағ-пастаа кізілері, хазна органнарының кізілері, оларның піреезі пу форумнаң хада “öскеннер”: студент полғанда, пӱӱнгі чииттер чіли, чииттер форумында араласханнар паза улуғ профессионалларны искеннер, пӱӱн, тізең, постары, оларның орыннарында одырып, амғы чииттерге чöптер пирчелер.
Спикерлер таниинаң, амғы чииттернің уғаа алғым оңдайлар. Ööні - орта чол таллап аларға, чапчаң пайып парар ниик чолларны таллабин. Аннаңар чиит оол-хыстарның таңдағызы оларның на холында. Паза пір чöп - ӱгреністі ӱспеске, аны тöреміл узарадарға, пілістерні нааӌылирға паза пиктирге.
Чоохтирға кирек, чииттер тöрт öмее чарылғаннар: школа ӱгренӌілеріне, студенттерге, тоғынчатханнарға паза идінӌектерге. Полғанына ла аймах-пасха сурығларға чарыдылған алынӌа ӱзӱріглер тимнелген. Оларның тоғызы, 10.00 час иртеннең пасталып, 18.00 часха теере узарадылған.
Автор :
Наталья Сюптерекова Сом Мария Кожевниковани
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде