ӰГРЕТЧI ТОҒЫЗЫ ААРЛАСТА ПОЛЗЫН
10.03.2023
Хабарлар
2023 чыл – Ӱгретчi паза ӱгредіг кӧстегҷізінің чылы. Пу неделяда Хакасияда Ӱгретчi паза ӱгредiг кӧстегҷiзiнiң чылы пайрамни азылған. Танығлығ кӱнде республиканың ӱгредiг киреенде ӱр паза тӱзiмнiг iстен салған ӱгретчiлерге аарластығ сыйыхтар читiрiлген
АҒБАНДАҒЫ Н.Г.БУЛАКИННIҢ АДЫНАҢ ЛИЦЕЙЗЕР ХАКАСИЯ ПАЗЫ ПАЗА АНЫҢ ОРЫНҶЫЛАРЫ, МИНИСТРЛЕР, РЕСПУБЛИКАНЫҢ ӦӦРКI ЧӦП ДЕПУТАТТАРЫ, ПРАЙ МУНИЦИПАЛЬНАЙ ПӰДIСТЕРНIҢ ӰГРЕДIГ УПРАВЛЕНИЕЛЕРIНIҢ УСТАҒ-ПАСТАА, ӰГРЕДIГ ОРГАНИЗАЦИЯЛАРЫНЫҢ УСТАҒҶЫЛАРЫ ПАЗА ӰГРЕТЧIЛЕР, ВЕТЕРАННАР, ХАЛЫХ ОРГАНИЗАЦИЯЛАРЫНЫҢ КІЗІЛЕРІ ЧЫЫЛЫСХАННАР. ТИКСI 300-че КIЗI. ААЛҶЫЛАРҒА ЛИЦЕЙНIҢ ФОЙЕЗIНДЕ ПАЗА АУДИТОРИЯЛАРЫНДА АЙМАХ КӦЗIДIГЛЕР ТИМНЕЛГЕН, МАСТЕР-КЛАССТАР ИРТIРIЛГЕН ПАЗА ДАА ПАСХАЗЫ. ПУ КӰНДЕ СЫН ПАЙРАМ ПОЛҒАН ТИИРГЕ ЧАРИР.
2023 чыл Ӱгретчi паза ӱгредiг кӧстегҷiзiнiң чылы тiп чарлалған. Аны хоостыра пӱӱл пу профессияны чон аразында сабландырар, аның кирексiнiзiн кӧзiдер, тилiдер кӧп тоғыс апарылар тiп таныхтапча Хакасияның ӱгредiг паза наука министрiнiң орынҷызы Юрий Сагалаков. Пала, олған садынзар чӧр сыхса, анаң школазар паза профессиональнай ӱгредiг организациязында ӱгрензе, ӱгретчiлернiң паза ӱгредiг кӧстегҷiзiнiң холына кiрче. Олар чииттернi пос чирiне, сӧбiрее хынарға, аарлирға паза оларның ӱчӱн ағырарға ӱгретчелер. Улам мындағ амыр нимес туста хазнада пос чирiне хынчатхан чииттер поларға кирек. Кем зе оларда пу сағыс тӧрiтче? Школа паза сӧбiре.
Аннаңар пӱӱл ӱгретчiлерге алынҷа хайығ салылар. Ол санда чиит специалисттернi школаларзар тартып аларына. Хайди таныхтаан чооғында Хакасияның ӱгредiг министрi Анатолий Бутенко, республиканың школаларында психолог-педагогика кӧстегліг класстар тӧстелче. Амғы тусха он класс тоғынча. Оол-хыстар, аттестат алзалар, ӱгретчi специальнозын таллап аларларына iзенiс пар. Iкiнҷi кӧстег – школаларда ӱр тоғын салған ӱгретчiлернiң аарлазын кӧдiрерi паза иң турыстығларын ахчалығ сыйыхтарнаң таныхтиры. Оларға алынҷа хайығ салыларға кирек. Ӱзiнҷiзi – ӱгредiг организацияларын тыхтиры паза оларның материально-техническай базазын нааҷылиры. Амды республиканың тоғыс школазында тыхтағ тоғыстары апарылча паза ӱс улуғ школаның пӱдiрии парча. Тӱрче полза, Асхыс аймаандағы Пирiкчул аалда наа школа пайрамни азыларға кирек. Аннаң пасха, аалларзар тоғынарға парған чиит специалисттерге чурт аларына республика программазы ӱр ниместең тоғын сыхты. Пу паза даа пасха хабазығлар ӱгредiг организацияларынзар специалисттернi тартып алар ӱчӱн идiлче.
Танығлығ кӱнде лицейде чыылған ӱгретчiлерзер Хакасия пазы Валентин Коновалов айланған:
– Сiрернiң профессионализмiңернең палғалыстығ хайдағ полар ӧсчеткен тӧлнiң таңдағызы. Школада олғаннарның хылии, сағыс-кӧрiзi тыыпча. Аарлығ ӱгретчiлер, Хакасияның правительствозы сірерге хабазарын узарадар. Пiс аалларзар iстенерге парған ӱгретчiлерге чурт аларға полызарбыс. Пу программа мыннаң мындар алғыдылар. Вуз тоосхан специалисттер олған садтарынзар паза школаларзар тоғынарға парар ӱчӱн прай кӱзібіс саларбыс.
Валентин Олегович ӱгредiгде ӱр тоғын салған паза аның тилiзiне улуғ хозым иткен ӱгретчiлерге сыйыхтар читiрген. Iди Ағбандағы А.А.Кенельнiң адынаң 1№ школаның ӱгретчiзі Вера Владимировна Лашкинаға «Хакасияның iстенiс сабланызы» медаль читiрiлген.
«Хакасияның саблығ ӱгретчiзi» аттарға турысханнар: Георгий Прокопьевич Миягашев – Таштып аймааның Ибiгдегi ортымах школазының физкультура ӱгретчiзi, Лидия Семёновна Сафьянова – Асхыстағы лицей-интернаттың хакас тiлi паза литература ӱгретчiзi, Лилия Александровна Маслова – Харатастағы гимназияның орыс тiлi паза литература ӱгретчiзi, Марина Валерьевна Атюшкина – Ағбандағы 11№ школаның информатика ӱгретчiзi. Iдӧк лицейнiң сценазында Хакасия правительствозының Аарластығ пiчiктерi, Хакасия пазының алғыстастары, ведомственнай алғыстастар паза пасха даа сыйыхтар читiрiлген.
Лидия Семёновна Сафьянова ӱгредiг киреенде 50 чылға чағын iстен парир. Ағбандағы ӱгретчiлер институдын 1975 чылда тоозып, ол Асхыстағы школазар тоғынарға кiрген, анда амға теере тiспен iстенче. Тӧреен-ӧскен аалы, тiзең, Асхыс аймаандағы Картой аал.
– Пастап орыс паза хакас тiлi уроктарын иртiрҷеңмiн. Халғанҷы отыс чыл хакас ла тiлiн апарчам. Саарбах тузында инженер специальнозы хайиим тартхан, че чуртас чолым пасха саринзар тартыл парыбысхан. Анзына мин ачырғанминчам. Сӧбiремде миннең пасха ӱгретчi чоғыл. Палаларым, минi харааға читiре тетрадьтар сыныхтапчатханымны, планнар пасчатханымны кӧрiп, ӱгретчi поларға хынмааннар.
Ӱгретчi тоғызы сидiк нооза. Оолғым Ағбанда программист полча, хызым Асхыста финанстар киреенде iстенче. Iкi пархаҷаам ӧсче, – чоохтапча хакас тілі ӱгретчізі.
48 чыл аразына Лидия Сафьянованың холынаң нинҷе ӱгренҷi сыхханын санап таа полбассың, неке. Че оларның аразында хакас тiлi специалисттерi парох. Кӧзiдiмге, Валерия Вячеславовна Идимешева национальнай гимназияда хакас тiлi ӱгретчiзі полып iстенче. Ол школада даа чахсы ӱгренген, аймах марығларда сыбыра араласчаң полтыр.
– Сағынчам, хазна синiнде ӱгретчi тоғызына алынҷа хайығ айландырыл сыхханы чахсы. Мының алнындағызынаң тиңнестiрзе, амды школада тоғынарға хай-хай аар. Ӱгренҷiлер сотовай телефоннарда най кӧп тус иртірчелер. Книгалар хығырарға, тiзең, хынмин сыхтылар. Амды урокта олғаннарның хайиин тартып алар ӱчӱн, улам тирең, наа технологияларнаң тузаланып, тимненерге кирек. Чиит тӧл пасха оңдайлығ ӧсче нооза. Ағаа хоза мының алнында олғаннар, оларның iҷе-пабалары пос тiлiн чахсы пiлҷеңнер, уроктарны даа иртiрерге хынығ паза ниик полҷаң, амды ӱгренҷiлер хакас тiлiн уйан пiлчелер. Мына мындағ оңдайларда тоғынарға килiсче амды хакас тiлi ӱгретчiлерiне, – таныхтапча Лидия Семёновна.
Пӱӱл республикада Ӱгретчi паза ӱгредiг кӧстегҷiзiнiң чылына чарыдылған 120 азыра мероприятие иртiрiлерi кӧрiлче, хайзыларының пӧгіні – ӱгретчiлер тоғызының аарлазын кӧдiрерi. Ол класс устағҷыларының форумы, чиит ӱгретчiлернiң фестивальы, «Сердце отдаю детям» тиксi Россия марииның региондағы чардығы паза даа пасхазы.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы