РОССИЯДА ИҢ АРТЫХ НИИК АТЛЕТИКА МАНЕЖІ
15.03.2023
Хабарлар
Олимп чемпионы Ирина Привалова, Ағбанның пазы Алексей Лёмин
паза Хакасия пазының орынҷызы Михаил Побызаков хызыл чаламаны хыплапчалар
Танығлығ кирек. Ағбанда 10 мартта ниик атлетика манежі пайрамни азылған. Россияның ниик атлетикаҷа cпорт федерациязы мында марығлар иртірерге тимде
СПОРТХА ХЫНЧАТХАН УЛУСТЫҢ УЛУҒ ӦРІНІС. ХАКАСИЯНЫҢ ӦӦН ГОРОДЫНДА НИИК АТЛЕТИКА МАНЕЖІ ТУЗАЛАНЫСХА КИРІЛДІ. НАА ПӰДІРІГ – Н.Г. БУЛАКИННІҢ АДЫНАҢ СПОРТКОМПЛЕКСТІҢ ЧАРДЫҒЫ. ГОРОДТЫҢ УСТАҒ-ПАСТАА СПОРТ ОБЪЕКТІН ЫРАХХЫ 2008 ЧЫЛДА ПӰДІРIП ПАСТААН. АНДАР АЙМАХ СПОРТ КӦРІМНЕРIНЕ КӦРІЛГЕН ЗАЛ, БАССЕЙН, АДМИНИСТРАЦИЯ КОРПУЗЫ, СТОЛ ТЕННИЗІНІҢ КІНІ, ЧӰГӰРҶЕҢ ЧОЛЛЫҒ ФУТБОЛ ЧАЗЫЗЫ ПАЗА НИИК АТЛЕТИКА МАНЕЖІ КІРЧЕЛЕР. ХАЛҒАНҶЫ ОБЪЕКТ ПРАЙЗЫНАҢ ӰР ПӰТКЕН. АМДЫ СПОРТКОМПЛЕКС ТОЛДЫРАЗЫНАҢ ТИМДЕ.
Пайрамнығ мероприятиеде аймах спортшколаларның ӧмелері, пастыхтар, спорт ветераннары араласханнар. Улуғ аалҷыларның санында полған олимп чемпионы, Россияның ниик атлетикаҷа cпорт федерациязының вице-президенті Ирина Привалова. Хызыл чаламаны хыплир алнында город пазы Алексей Лёмин спорткомплекстің устағҷызы Дмитрий Кремзуковха улуғ нимес кувалда читірген. Аның полызиинаң 2012 чылда Ағбанның мэрі полған Николай Булакин манеж пӱдірер орында ӧрге сааптыр. Пу кибірге ағбандағылар 20 артиинаң чыл тудынчаттырлар. Тура пӱткенҷе пастағы ӧргені сапхан тиріг администрацияда хайраллалча, пӱдіріг тимге сыхса, кувалданы ээлерге читірчелер. Анзы объект чахсы тоғынар, чонға туза ағылар тіп ізеніс пирчеттір.
Хызыл чаламаны хыплирға Хакасия пазының орынҷызы Михаил Побызаковты, олимп чемпионы Ирина Привалованы паза Ағбанның устағҷызы Алексей Лёминні хығырғаннар. Сизінгенде, Ирина Анатольевна спорт объектi азылчатханына орындағы улустаң даа тың ӧрінген. Наа пӱдіріг Хакасияда ниик атлетиканың таңдағызы парын киречілепче нооза. Итсе, пістің республикада пу спорт кӧрімін хаҷан даа улуғлаҷаңнар. 1943 чылда Хакас автоном облазында пастағы олған-чииттер спорт школазы азылғанда, пӧліктернің пірcі ниик атлетикаҷа cекция полған. Саблығ спортсменнернің cанында Евгений Евсюковты (спорт чӧрізі), Владимир Жариковты (пӧзікке сегірері), Игорь Парыгинні (ӱс хадыллығ сегіріс), Дмитрий Бурмакинні (марафон) паза пасхазын адирға кирек. Евсюковнаң Бурмакин – Олимп ойыннарының араласчылары. Жариков 1980 чылда РСФСР-ның чемпионадында паза чоннар аразындағы марығда чиңіс тутхан. Игорь Парыгин чииттер аразында ирткен тилекей чемпионадында алтын медаль холға кирген. Амғы спортсменнердең Константин Плохотников, Анастасия Ерёмина-Трушина, Артём Попов, Денис Чертыков Россия чемпионаттарында тӧреміл медальлар утчалар.
Манеж істінде мероприятие улуғ нимес концертнең узарадылған. Олғаннарның теелбектері чыылған чонның кӧңнін кӧдірген. Ідӧк устарын Ағбанның туризмҷе школазының ӱгренҷілері кӧзіткеннер. Объектте читі спорт секторынаң пасха, скалодром орныхча. Хайаҷа сығарынаң айғасчатханнар 13 метр пӧзікке нинҷе-де секунда аразына сых парыбысчаттырлар.
Пӱӱнгі кӱнде Хакасияда хайаҷа сығарында Евгений Козлов ла Россияның спорт узы нормативін толдырыбысхан. Нап-наа скалодром парда, республикада спорт устарының cаны хозылар тіп ікінҷілес чоғыл.
Анаң пастыхтар паза аалҷылар чоох тутханнар. Ағбанның пазы Алексей Лёмин манеж пӱткенін сағысха кирген. Халғанҷы чыл Алексей Викторович пӱдірігнең не чуртаан, неке. Ол таныхтаан:
– Пӱӱл кӱскӱзін Ағбандағы ниик атлетикаҷа олимп резервінiң cпорт школазы 80 чылын таныхтир. Пу манеж школаның ӧмезіне, город чуртағҷыларына сыйых полча. Мин киртінчем, чахсы оңдайларда улуғ чиңіcтер хайди даа полар. Минің кӧрізімнең, Урал кистінде мыннаң артых манеж таппассың.
Олимп чемпионы Ирина Привалова Алексей Лёминнің cӧстерінең чараспаан. Ирина Анатольевнаның чооғынаң, ол тиксі Россияда пу манежке турыстыра объект кӧрбеен. Михаил Побызаков, алғыстастарға хозылып, теен:
– Хакасия пазы Валентин Олегович Коноваловтың чахиинаң прайзын манеж азылғанынаң алғыстапчам. Уғаа кирек объект. Халғанҷы чылларда тиксі республикада наа школалар, клубтар, туралар тузаланысха кирілчелер. Андағ оңдай нацпроекттер пирчелер.
Таныхтирға кирек, спорт объектi 413 артиинаң миллион салковайға тур парған. Олардаң 352,3 миллион cалковайы – муниципалитеттің хорадығлары. Хакасия пазы Валентин Коноваловтың айланызы хоостыра федеральнай бюджеттең 60,8 миллион салковай субсидия позыдылған. Ахча «Спорт – чуртас сині» федеральнай программа хоостыра кірген. Республика бюджедінең 614,7 муң салковай пирілген.
Пайрамнығ чардых тоозылғанда, хабарҷылар Ирина Привалованаң чоох алысханнар. Саблығ спортсмен Олимп ойыннарында, тилекей чемпионаттарында, аралазып, медальлар утхан. Аны чапсыдарға оой нимес. Че наа спорт пӱдірии Ирина Анатольевнаны хайхаттыр. Ол чоохтаан:
– Аймах залларда поларға, марығлазарға киліскен. Европада даа чахсы спорткомплекстер саны кӧп нимес. Cанапчам, Россияда пу иң чахсы ниик атлетика манежі. Мында разминка иртірҷең пӧлік, тренажер залы, хазых пиктеҷең кін пар. Спорткомплексте бассейн орныхча. Ниик атлетикаҷа ӧӧн марығлар Москвадағы манежте иртчелер. Че аны реконструкцияа чабызарға сағынчалар. Амды Ағбанда Россия чемпионаттарын иртірер оңдай полар. Тренерлернең чоох алысхам. Хакасияда ниик атлетикаа хынчаттырлар. Республикада чииттернің піріктірілген командазын тӧстеен полза, чахсы поларҷых.
Олох кӱн манежте ниик атлетикаҷа «Хакасиядағы часхы» спорт фестивальы ирткен. Азах меетте чир-суғҷыларыбыстаң Алина Артонова (узунға сегірері), Екатерина Конгарова, Дарья Чучунова (60 метрге чӱгӱріc) cыхханнар. Город чуртағҷыларын манежсер 20 марттаң кирерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде