«ХАКАС ТЕХНОЛОГИЯ ОЙЫМЫН» ТӦСТИРІ АЙНЫПЧА
15.03.2023
Хабарлар
Хакасия пазы Валентин КОНОВАЛОВ «Алабуга» паза «Новгородская» ОЭЗ кізілерінең тоғазығ тузында
Экономика. Республикада «Хакас технология ойымы» алынҷа экономика орнын тӧстирінҷе тоғыс парча
Хакасия пазы Валентин Коноваловтың хығыртиинаң ирткен неделяда республикада Татарстандағы «Алабуга» паза Новгород облазындағы «Новгородская» ОЭЗ кізілері тоғыс чорығынаң пол парыбысханнар. Олар «Хакас технология ойымы» алынҷа экономика орнын тӧстир оңдайларнаң танысханнар: ОЭЗ орнығар орында пол килгеннер, инфраструктураны кӧріп алғаннар паза тиліс оңдайларын паалааннар. Ідӧк оларнаң Хакасия пазы Валентин Коновалов тоғасхан. Олар, удур-тӧдір туза ағылып, ОЭЗ тӧстирінҷе хада-пірге тоғынарын ӱзӱргеннер.
«ОЭЗ ППТ «Алабуга» АО паза Хакасия правительствозы хада-пірге тоғынғаны хоостыра «Алабуга» устапчатхан компанияның пістің регионда ОЭЗ тӧстирінде аралазарын паза аннаң устирын кӧрчелер. Маңнаныстығ тоғынчатхан промышленность площадказынаң хада тоғынғаны «Хакас технология ойымы» ОЭЗ-ты тӧстирінде паза тилідерінде хорғыстарны хызырарға полызар.
Ойым тилізінде 2034 чылға теере 4000 тоғыс орны тӧстелері кӧрілче, резиденттернің инвестициялары 96 миллиард салковайға тиңнелер, парыстары – 77 миллиард салковайға.
Республика пазының таниинаң, Хакасия правительствозы регионда инвестицияларға оңдайларны чахсыландырарынҷа паза промышленность инфраструктуразын тилідерінҷе улуғ тоғыс толдырыбысхан. Хакасияда алынҷа экономика орны тӧстелген сылтаанда килкім инвестиция проекттерін чуртасха кирерге паза сығарысты алғыдарға прай оңдайлар тӧстелер. Тиксі алза, ОЭЗ тӧстеені тоғыс орыннар санын пілдірте хозарға паза республика бюджедінзер налог тӧлеглерін ӧскірерге полызар.
Валентин Коновалов опытнаң ӱлезерге тимде промышленность орыннарының эксперттеріне паза проектті чуртасха кирерге хабасчатхан ӱчӱн Татарстанның президенті Рустам Миннихановха алғызын читірген.
– Тӱзімніг тоғыс ӱчӱн алғыстапчам. Ізенчем, піс Хакасияда алынҷа экономика орнын хада-пірге маңнаныстығ тӧстирбіс, анзына пістің прай оңдайлар пар, – таныхтаан регион устағҷызы.
Чоохтирға кирек, 2022 чылның кічіг хырлас айында Хакасия правительствозының делегациязы палғалыстарны тыыдар, опытнаң паза чахсы тоғыс оңдайларынаң алызар пӧгіннең «Алабуга» ОЭЗ-та пол килген, пӱӱл азығ айында – «Новгородская» ОЭЗ-та.
Хакасиядағы ОЭЗ-тың ӧӧн инвестиция проекттері «РУСАЛ» компанияни полар. Пӱӱл Хызылчардағы экономика форумында республика пазы оларның пірсін чуртасха кирерінеңер чӧптезігде хол салыбысхан. Ол «РУСАЛ САЯНАЛ-ның» алюминий лентазының сығарызын алғыдарына кӧстелген. Аның алында, тізең, 2022 чылның ӱртӱн айында Іскеркі экономика форумында «Хакас технология ойымы» ОЭЗ-ты тӧстирінҷе хада-пірге тоғынардаңар чӧптезігде хол салылған. Пӱӱл чайғызын Санкт-Петербургтағы экономика форумында проектче ікінҷі чӧптезігде хол салары пӧгінде турча. Пу инвестиция проекттері пастыра регионда 830 тоғыс орны тӧстелері паза 30 миллиардча салковай инвестиция кирілері кӧрілче.
2022 чылда кӱскӱзін Саяногорсктың паза Пии аймааның чирлерінде сығарыс промышленнозы кӧстегліг алынҷа экономика орнын тӧстирінҷе пірге тоғыс пасталыбысхан. Тоғыстар, нинҷе-де чардыхха чарылып, толдырылар тузынаң хада кӧріл парғаннар. Хакасия правительствозында аннаң ӧнетін тоғысчы ӧме айғасча.
Хоза таныхтирға кирек, пӱӱл Хакасияда ідӧк, федеральнай субсидияны тартып, «Тазоба» пастағы индустрия паркының пӱдірии пасталған. Ол Ағбанда орнығар.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде