АЛЛЫҒ ЧӰРЕКТIГ УСТАҒҶЫБЫС
17.03.2023
Хабарлар
Марина Николаевна САГАТАЕВА
Алғыстас. Пӱӱн Н.Ф.Катановтың адынаң Хакас гимназия-интернадының устағҷызы, Россия Федерациязының палалар ӧскiрер паза ӱгредер киреенҷе аарластығ тоғынҷызы Марина Сагатаева сiлiг пайрамнығ тӧреен кӱнiн таныхтапча
17 март – прай гимназияның ынағ ӧмезiне уғаа танығлығ кӱн. Чалахай часхы тустың чылығ, чарых кӱнiнде позының сiлiг пайрамын таныхтапча Худай пирген таланттығ ӱгретчi, абахай ипчi, паарсах iҷе – гимназия директоры Марина Николаевна Сагатаева.
Марина Николаевна ӱгретчiлер сӧбiрезiнде тӧреен. Пабазы Николай Викторович паза iҷезi Степанида Ананьевна ӱгредiг киреене прай чуртастарын пир салғаннар, палаларға пай пiлiс пирерге харасханнар. Хыстары оларның чолларынҷа парарға чарадыбысхан, сабланысха читкен.
Icтенiс чолын ол математика ӱгретчiзi полып пастаан. Тоғыста чахсы чидiглерi ӱчӱн, аны Хакасияның ӱгредiг паза наука министерствозынзар алып алғаннар. Анда ол экономика пӧлиинiң устағҷызы полған. 2017 чылда аның иңнiне уғаа нандырығлығ тоғыс артылған – аны Н.Ф.Катановтың адынаң Хакас гимназия-интернадының директорына турғысханнар. Оой нимес тоғыс устағҷы полары. Хайди тудынчатханы, олғаннарнаң паза ӱгретчiлернең чоохтасчатханы, тоғыснаң устапчатханы прайзының хайиинда. Ағаа хоза, амғы гимназия, хаҷан-да национальнай школа полған, уғаа пай тархыннығ паза кибiрлiг, хайзын сайбирға чарабас. Тиктең нимес аны чон аразында хакас устағҷыларын тимнепчеткен орын тiп адапчалар. Анда тӧреен чирiбiстiң иң ыраххы пулуңнарынаң, кiчiг ааллардаң килген палалар ӱгренчелер, постарының чидiглерiнең махтаға сыхчалар.
Пис чыл аразына Марина Николаевна позының тоғызын пӧзiк синде апарча, пай пiлiзiнең алғым тузаланча. Ирткен чыллар аразына ол гимназия-интернатта пiр чӧптiг, хайдағ даа нандырығлығ пӧгiннернi толдыр полар ӧме тӧстеп алған, icтенiс кӧзiдiмнерiн уламох пӧзiк синге кӧдiр салған. Че иң ӧӧнi – онарлап чыллар чыылған пай кибiрлернi хайраллап халарына, оларны уламох кӧптелдiрерiне улуғ хайығ салғаны.
Гимназия ӱгренҷiлерi, аймах синде иртiрiлчеткен марығларда аралазып, маңат тимненiс кӧзiтчеткенi, чиңiстер тутчатханы хайығ чох халбаанох. Iдӧк гимназияның ӱгретчiлерi, тиксi хазнабыс синiнде махтаға сығып, орындағы ӱгредiг учреждениезiн сабландырчалар. Андағ кӧзiдiмнер cылтаанда гимназия «Россияның иң артых ӱгредiг учреждениелерi» Национальнай реестрге кирiлген. Халғанҷы чылларның салтарлары хоостыра, тiзең, тиксi Россия синiндегi пастағы кӧрiм-марығда аралазып, чиңiсчiлер санына кiрген паза «Россияның иң чахсы 100 школазы», «Хакас Республиканың иң артых 10 школазы» аарластығ атха турысхан. Ағаа хоза, RAӰҶ (РАЭКС-Аналитика) агентствозы искiрии хоостыра, Хакасиядағы гимназия Россияның иң килкiм 50 университедiне чахсы студенттер тимнепчеткенi таныхталча.
Марина Николаевнаның кӱcтенгенi паза устааны сылтаанда гимназиядағы иң чахсы ӱгренҷiлерге «Альтаир-Хакасия» кiн тӧстелген. 2020 чылдаң анда тиксi Cибирь синiндегi чиит дипломаттар Клубы тоғын сыххан. Аның араласчылары Россия Федерациязының пасха ханнар киректерiнҷе министрi Сергей Викторович Лавровнаң тоғасханнар, ам даа пик палғалыс тутчалар.
Гимназия устағҷызы Марина Николаевна позы даа аймах марығ-чӧрiмнердең хыйа турбинча, оларда ӧткiн аралазарға харасча. Iди ол, тиксi Россия синiнде пастағызын на иртiрiлген «Чыл директоры» марығда аралазып, чарым финалға читкен. Андағ оңдайнаң ол Россиядағы иң чахсы 30 школа директорлары санына кiрiп алған. Iдӧк ол, «Россия лидерлерi» марығда аралазып, чарым финалға сыххан. Марина Николаевна позының пiлiзiн пайыдарға, уламох пӧзiк синге кӧдiрерге сыбыра харасча. Андағ оңдайнаң ол Президент программазы хоостыра апарылчатхан устағ кадрларын тимнир Бизнес-школаны маңнаныстығ тоосхан.
Аарлығ Марина Николаевна! Чарадыңар прай ӱгренҷiлер, ӱгретчiлер, паба-iҷелер адынаң Сiрернi пайрамнығ тӧреен кӱнiңернең чылығ алғыстирға, часкалығ хоных, толдыра чуртас алғап пирерге. Сағынчатхан сағыстарың прай толзын, тоғыстарың ӧрiнiс ағылзын, Сiрер устапчатхан гимназия тӧреен чирiбiстi тиксi махтаға сығар турзын, сӧбiреңер сыбыра пик чӧлег ползын.
Автор :
Улуғ аарласнаң Н.Ф.Катановтың адынаң гимназия-интернаттың ӧмезi
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы