Россия, Крым, Донбасс – саңайға хада!
19.03.2023
Хабарлар
Хакасияның правительство туразы алнындағы Первомайскай площадьта Крым Россиязар 9 чыл мының алнында нандыра айланғаны хоостыра чарых концерт ирткен.
Республиканың ӧӧн ачығында чон толдыра чыылыс парған. Хайзы холында Россияның флагын паза Крымға чарыдылған улуғ плакаттар тудын салған. Первомайскай площадьта аймах организациялар тоғынҷылары, студенттер паза ӱгренҷiлер кӧрiнгеннер. Пiр сӧснең, хазнаның паза республиканың чуртазы ӱчӱн ӧрiнчеткен, поғдархапчатхан паза сағыссырапчатхан чон полған.
18 мартта 2014 чылда Россия Федерациязының президентi Владимир Путин Крым Республика паза Севастополь город Россиязар кiрчеткенi хоостыра чӧптезiгде хол салыбысхан. Iди пiстiң хазнаа наа субъекттер хозылғаннар.
Митинг-концертте Хакасия пазы Валентин Коновалов, прайзынзар айланып, чоох тутхан:
– 9 чыл мының алнында Крым Россиязар нандыра айландырылған. Ол 1783 чылдаң cығара пiстiң хазнаның чардығы полған. Крымның чуртағҷылары хаҷан даа постарын россияннар тiп санаҷаңнар, аннаңар оларның кӧңнiнең республика нандыра ибзер айланды. Тус кӧзiтче, 9 чыл мының алнындағы чӧптезiг – ол иң орта чарадығ. Аны хоостыра тархынның сыны хатабох чуртасха кирiлдi. Iдӧк Крымның чуртағҷылары Украинадағы неонацисттернiң, Бандераның паза Шухевичтiң пiр сағыс-кӧрiстiг тӧллерiнiң уйады чох режимнерiнең озып алғаннар. Ол неонацисттернiң орыннары тархынның сӧп-сабында орныхча.
Пӱӱнгi кӱнде Крым толдыра чуртаснаң чуртапча. Чамдых олтырыхтың экономиказы чахсы тилiпче. Тӱрчедең Россиянаң хада-пiрге тудынарға сағынчатхан Донбасста паза пасха даа регионнарда чарых, амыр, иптiг чуртас пасталарына iзенчебiс. Сын пiстiң саринда! Кидеркi империалисттернiң хара киректерi пiстi сындыр полбастар! Пiс тархында андағ хыртыстарны кӧп хати ирткебiс. Хайдағ даа санкциялар пiстiң Чир-суубыстың тилiзiне харығ пол полбастар.
Хакасия ирткен 2022 чылның чуртас-экономика тилiзiнде пӧзiк саннар кӧзiтче. Ағаа хоза, халғанҷы тӧрт чыл аразына пiс таңдағы чуртасха пик «фундамент» сал салғабыс. Республика бюджедiнiң парыстарын iкi хати алғыдыбысхабыс. Россия президентi Владимир Владимирович Путиннiң хабазиинаң республиканың хазна ӧдiзiнiң коммерческай чардығын пис хати хызырыбысхабыс. Федеральнай программаларда паза проекттерде сыбыра араласчабыс. Аны хоостыра пiс имнег киреене, спортха, ӱгредiг киреене паза культураа хабазығны ӱс хати кӧп пир полчабыс. Тӧрт чыл аразына аалларға полысчаң хорадығларны 2,5 хати ӧскiрiбiскебic.
Аарлығ нанҷылар, пiс прайзы хада-пiрге чир-суубыстың тилiзi ӱчӱн мыннаң мындар тiспен iстенербiс! Армиябысха, чааҷы чир-суғҷыларыбысха хабазар ӱчӱн тоғынарбыс! Махачы ооллар, 80 чыл мының алнында ағаларыбыс чiли, чоныбыстың амыр, хорғыс чох чуртазы ӱчӱн, тӧреен чирiбiсте пос тiлiнең чоохтазар ӱчӱн, кибiрлерiбiстi паза культурабысты чiдiрбес ӱчӱн, постарына айабин, неонацисттердең тоғыр харбасчалар.
Крым, Донбасс, Россия – саңайға хада! Ура! Сын пiстiң саринда, аннаңар Чиңiс тее пiсти полар!
Анаң ӱлӱкӱннең алғыстаан Хакасияның Ӧӧркi Чӧп кнезi Владимир Штыгашев:
– Пурунғыдаң сығара ӧбекелерiбic Крымдағы чирлернiң ээлерi полғаннар. Х чӱс чыллардох ол Русьсар кирiлген. Херсонесте, ол амғы Севастополь, орыс кнес Владимир кiрӧске тӱскен. 2014 чылдағы референдумның салтары пiстiң чон Чир-суубыстың кирексiнiстерi ӱчӱн турыс полчатханын чахсы кӧзiт пирген. Пӱӱнгi кӱнде Крымда аймах тiллiг чон чуртапча: гректер, еврейлер, армяннар, туроктар, татарлар. Че иң кӧп саннығ чон анда – орыстар. Крымнаң Россия хада пiрiк парғанда, пiстiң Чир-суубыс улам пай, сiлiг паза кӱстiг полча. Россияның тилiзi тархындағы чирлерiбiстi нандыра айландырарынаң палғалыстығ. Ол кӧстегҷе тоғыс ам на пасталча. Iзенчебiс, ол аннаң андар узарадылар. Пiстiң алныбыста улуғ пӧгiннер турча. Кидеркi хазналар, пiрiгiп алып, Украиназар чаа тирiглерiн паза наёмниктернi кӧп ысчалар. Муңарлап наёмниктер пiлдiзi чох кирексiнiстер ӱчӱн Украинадағы чирлерде чуртастарын пир салғаннар. Чиңiс пiстiң саринда полар, аның ӱчӱн пiс кӱстiг, ынағ поларға паза чуртас-экономиканы тилiдерге, армияны паза флотты кӱстiг чаа тирiглерiнең тирiндiрерге кирекпiс.
1941-1945 чыллардағы Илбек Ада чаа араласчыларының пархалары паза кӧргенектерi пазох Чир-суубысты арачылирға кӧдiрiлдiлер. Хакасияның махачы ооллары, Россия армиязына хозылып, илбек хазнабыстың таңдағы амыр паза чарых чуртазы ӱчӱн харбасчалар. Ефрейтор Аймир Миягашев, позының чуртазына айабин, Украинадағы ӧнетiн чаа операциязындағы хазыр чаалазығда арғыстарын арачылап халған. Ол позының кӧксiнең ыырҷы тастабысхан хол гранатазын чабысхан. Пicтiң матыр чир-суғҷыбыс хазнаның пӧзiк cыйиина турысхан (ӱреен соонда).
Концерт-митингте Россияның Матыры Аймир Миягашевтiң харах частығ чаҷазы Людмила Иосифовна Круговых чоох тутхан:
– Аймир – минiң иң чағын кiзiм, Россияның Матыры, Хакас чирiнiң сын оолғы. Ол, муңарлап пiстiң чааҷылар чiли, Чир-суубысты арачылирға парған. Аймир операция парчатхан чирде хорғыс чох орынға сығып алза, пiске сығдыратчаң. Ол хаҷан даа тiҷең: «Пiстiң хазна паза президент прай орта итче. Мин Донбасстың олаңай чуртағҷыларына прай чӱреемнең айапчам. Мында ачын фашисттер тың ай-пораан тӱсчелер». Донбасстағы хорғыстарны Аймир позының хараанаң кӧрген.
Митинг-концерттi В.Г.Чаптыковтың адынаң Хакас филармониязының ырҷылары Олег Гриценко, Хакасияның саблығ артизi Ольга Васильева, Мария Сиротенко, Юлия Кучеренко, Хакасияның саблығ артизi Даниил Тарасов, Хакасияның чон артизi Артур Марлужоков илбек чир-суубыстаңар сiлiг сарыннарнаң чазааннар.
Автор :
Татьяна Тютюбеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде