ПІCТІҢ ФУТБОЛИСТТЕР – РОССИЯ ЧЕМПИОННАРЫ!
31.03.2023
Хабарлар
Поғдархас. Ис паза Асхыс чоғархы ааллардағы школаларның ӱгренҷілері мини-футболҷа Россия мариинда алтын паза кӱмӱс медальлар холға киргеннер
ПІСТІҢ ХАЗНАДА «МИНИ-ФУТБОЛ ШКОЛАЗАР» ИҢ УЛУҒ CПОРТ ПРОЕКТІ ПОЛЧА ТІЗЕ, САБА ПОЛБАС, НЕКЕ. ЧЫЛ САЙ ПРОЕКТ ХООСТЫРА ИРТІРІЛЧЕТКЕН МАРЫҒДА МИЛЛИОН АРТИИНАҢ ӰГРЕНҶІ КӰЗІН СЫНАПЧА. АМҒЫ СЕЗОНДА, ТІЗЕҢ, АРАЛАСЧЫЛАР САНЫ 1,5 МИЛЛИОННЫ АС ПАРЫБЫСТЫ.
Хакасияда «Мини-футбол школазар» проект улуғ аарласта. Чиит футболисттер анда 2007 чылдаң тӧреміл устарын кӧзітчелер. Ол син тус аразына пістің cпортсменнер читі хати сыйыхтығ орынға турысханнар. Алтын медальларны абазадағылар (2014, 2016 чыллар) паза апчанайдағылар (2019 чыл) утханнар. Томыҷахтар аалының спортсменнері арға-мӧрійдең кӱмӱc медальлығ (2012, 2016 чыллар) ікі хати айланғаннар. Асхыс чоғархыдағыларны алынҷа таныхтирға кирек. Аалның «Читі хыс» ӧмезі – пу марығда араласхан пастағы команда. 2007 чылда хызыҷахтар тренер Евгений Мамышевтің устаанынаң турнирде хола призёр полыбысханнар. Ӱс чыл пазынаң наа чидіг. Асхыс чоғархы аалдағы ӧме пістің республикаа кӱмӱс медаль ағылған.
Пӱӱл Россияның азах меедін хызыҷахтарның ӱс командазы иртiбіскен: Абазаның 50 № школазы, Истегі школа паза Асхыс чоғархыдағы школа. Араласчылар саны кӧп полып, оларны ікее чарыбысханнар. 19 – 22 мартта ирткен финалларда 10 – 12 частығлар паза 13 – 14 частығлар араласханнар. Хакасия ӱчӱн Абазаның командазы турысхан. Хызыҷахтар чахсы ойнап пастааннар. Москваның 41 № школа ӧмезінең тоғазығ 2:0 саннаң тоозылған. Мончегорсктың 5 № школазын пістіңнер унада сабысханнар. Сан – 6:0. Финалның тӧртінҷі чардығында футболисттерібіcке оң полбаан. Олар Белгородтағы ӧмее 0:3 саннаң утыр салтырлар. Салтарында Абазаның 50 № школазы алтынҷы орынға сыххан.
25 – 28 мартта улуғлар марығласханнар. Асхыс чоғархыдағы школаның командазында Зарина Косточакова, Галина Топоева, Сабрина Чочиева, Айсели Сунчугашева, Оксана Чучунова, Екатерина Тюмерекова ойнааннар. Ӧменің тренері – Евгений Мамышев. Саарбахтар пастағы ойынны 3:2 саннаң утып алғаннар. 26 мартта Ленинград облазындағы ӧменең тоғазығ ирткен. Сан – 2:1. Чиңіс пазох пісти. 27 мартта ікі ойын полған. Азах мееттің тӧртінҷі чардығында асхыс чоғархыдағылар Лугансктың 3 № школазын 4:0 саннаң чиңіп алғаннар, чарым финалда – Калачтың 6 № школазын (Воронеж облазы). Сан – 1:0.
«Ағырчатхан» улустың ӧрінізі пу чир полбаан. Хакасияның медаль хайди даа полар!
Истегі командазар пис кізі кірген: Наталья Тумоякова, Амели Гринчук, Кристина Топакова, Наина паза Людмила Какаяковалар. Олар тренер Юрий Аёшиннің устаанынаң ойнааннар. Чир-суғҷыларыбыс пастағы ойыннаң пірдеезіне маң пирбееннер. Ульянов облазындағы команданаң тоғазығ 2:1 саннаң тоозылған. Арачыланыс министерствозының пансионын (Москва) истегілер 3:1 саннаң чиңіп алғаннар. Финалның тӧртінҷі чардығында Истегі ӧме, асхыс чоғархыдағылар чіли, Лугансктың 3 № школазының командазынаң тоғасхан. Сан – 3:1. Пістіңнер алнында. Чарым финалда саарбахтар челябинсктегілерні 4:0 саннаң унада сабысханнар. Андағ оңдайнаң 27 мартта республиканың ікі футбол ӧмезі азах меетке сығып алған.
28 мартта футбол чазызынзар пастап асхыс чоғархыдағылар сыхханнар. Ойын пасталғанда, Хакасияда 18.00 час полған. Россияның мини-футболҷа пірігізі (АМФР) финалларны кӧні эфирде кӧзіткен. Хакас саарбахтар Чусовой городтың 7 № школазы командазынаң (Пермь крайы) тоғасханнар. Спортсменнер пастағы минутадаң ӧткін хайынғаннар, аннаңар ойынны кӧрерге хынығ полған. Чир-суғҷыларыбыстаң Галина Топоеваны махтирға кирек. Хайди ол хаалханы арачылады. Таң, пістіңнерге талаан читпин парған, таң, чусовойдағылар устарынаң асханнар. Ойын 1:3 саннаң тоозылған. Асхыс чоғархы школа – Россия марииның кӱмӱс призёры.
Ікінҷі финалдаңар чоохтаза, ол оңдайынаң драмаа тӧӧй полған. Истегі ӧме Гусиноозерскай гимназиянаң (Бурятия) ойнаан. «Ыырҷы» санны пастағы минутадох асхан. Пістіңнер чідірінмееннер. Тӱрчедең cан 1:1 пол парған. Че пастағы тайм тоозылчатханда, бурятиядағылар алнында полғаннар. Ойынның ікінҷі чардығында истегілернің кӱс хозыл парғанға тӧӧй пілдірген. Пизӧлең не ойнапчалар, атакаа парҷаан на парчалар. Тиктең нимес ойын тузында Бурятиядағы команданың тренері тайм-аут ла аларға маңнанминчатхан. Харбазығ матч тооза парған. Тоғазығ 3:3 саннаң тоозылғанда, чиңісчіні пенальти тееп тапханнар. Футболисттерге ӱзер меспек теберге оңдай пирілген. Хайран хаалха хадағҷылары, олар шпагатха одырғанҷа хаалханы арачылааннар. Меспектернің пірcін Людмила Какаякова тударға маңнанған. Халғанҷы голны «ыырҷының» хаалхазынзар Амели Гринчук кирiбіcкен.
«Мини-футбол школазар» проекттің араласчылары Истегі паза Асхыс чоғархы ааллардағы школаларның ӧмелерін Россия марииның матырларына санапчалар. Пастағы командада пис ле футболист полған. Ойын тузында, алыстырҷаң кізі чохта, саарбахтарға хатығ чуххан. Алтын Арығның тӧлі пик хуйахтығ поладыр. Асхыс чоғархы аалда спортзал чоғыл. Олар андағ оңдайларда Россия марииның финалына сыхчалар, медальлар утчалар. Ис аалда спорт инфраструктуразы чахсы. Аалда ікі спортзал, пірcі школада орныхча, ікінҷізі – Культура туразында. Ағаа хоза стадион пар.
Россия мариинзар айланза, Наина Какаякова (Истегі школа) турнирнің иң чахсы бомбардиріне саналған, Галина Топоева (Асхыс чоғархы школа) – иң чахсы хаалха хадағҷызы. Хызыҷахтарны паза оларның тренерлерін чидігнең алғыстапчабыс.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
