ЧОННЫҢ АМЫР ЧУРТАЗЫН ОЛАР ХАДАРЧАЛАР
05.04.2023
Хабарлар
Пайрамнығ чыылығда республиканың устаа араласхан
Пайрамнығ чыылығ. С.П.Кадышевтің адынаң чон чайаачызы кінінде Хакасияның «Монолит» ОМОН паза «Сапсан» СОБР ӧнетін подразделениелері тӧстелгенінің 30 чылына паза Россияның Национальнай гвардия войсколары кӱніне чарыдылған пайрамнығ чыылығ ирткен
ПАЙРАМНЫҒ МЕРОПРИЯТИЕНІҢ ААЛҶЫЛАРЫ ПОЛҒАННАР ХАКАСИЯҶА РОСГВАРДИЯ СПЕЦНАЗЫНЫҢ ТОҒЫНҶЫЛАРЫ ПАЗА ВЕТЕРАННАРЫ. ОЛАРНЫ ӰЛӰКӰННЕҢ АЛҒЫСТИРҒА КИЛГЕННЕР РОСГВАРДИЯНЫҢ НАЦИОНАЛЬНАЙ ГВАРДИЯ ВОЙСКОЛАРЫ ФЕДЕРАЛЬНАЙ СЛУЖБАНЫҢ ӦӦН АППАРАДЫНЫҢ КІЗІЛЕРІ, РЕСПУБЛИКАНЫҢ ХАЗНА ӰЛГӰ ОРГАННАРЫНЫҢ, МИНИСТЕРСТВО-ВЕДОМСТВОЛАРЫНЫҢ ПАЗА АҒБАН ГОРОД АДМИНИСТРАЦИЯЗЫНЫҢ УСТАҒҶЫЛАРЫ.
Росгвардияның Ӧӧн уcтанызының пастығы генерал-майор Владислав Сухановтың адынаң спецназ отрядтарының чааҷыларын паза ветераннарын алғыстаан алынҷа чахығларҷа улуғ инспектор, полиция полковнигі Евгений Краснослободцев.
– Пістiң чааҷыларыбыс Росгвардия спецназының саблығ тархынына постарының аттарын хаҷанға даа кир салғаннар. Кізілерні арачылап, амыр чуртас ӱчӱн постарының чуртастарын пир салған матырлардаңар хумартхылас пістің чӱреебісте хаҷанға даа халар. Піс оларның махачызына поғдархапчабыс, оларны хаҷан даа ундутпаспыс, – теен Евгений Александрович.
Чыылған чонзар алғыстас сӧcтерінең айланған Хакасия пазы Валентин Коновалов:
– Аарлығ гвардеецтер, сірер ӧнетін чаа операциязында, постарыңа айабин, махачы тудынчазар, терроризмнең паза азынада тимнелген сайбағлардаң тоғыр апарылчатхан кӱрезіге улуғ хозым итчезер, Чир-суубыстың кирексіністері ӱчӱн турысчазар! Профессия ӱлӱкӱнінең алғыстапчам сірерні! Пик хазых, чахсы чуртас алғапчам сірерге!
Службаны чахсы апарчатхан тоғынҷыларны паза чааҷыларны сыйыхтиры мероприятиенің ӧӧн паза чапсых чардығы полған. Росгвардияның региондағы устаныс пастығы полковник Вячеслав Васильев, ӧнетін чаа операциязының пӧгіннерін толдырчадып, махачызын кӧзіткен спецназ тоғынҷыларына хазна сыйыхтарын читірген. Россия президентінің Указынаң росгвардеецтер «За отвагу» паза Суворовтың медальларына турысханнар. Илееде тоғынҷаа паза чааҷаа ведомство сыйыхтары, Хакасия пазының, Ӧӧркі Чӧптің паза Ағбан город администрациязының алғыстастығ пічіктері читірілген.
Позының айланызында Вячеслав Васильев, офицерлерні, прапорщиктерні паза сержанттарны службада пӧзік чидіглер кӧзітчеткен ӱчӱн алғыстап, оларға чонның амыр чуртазын хадарарында мыннаң мындар наа чидіглер алғаан.
Хакасияның ОМОН паза СОБР спецназының подразделениелері, 1993 чылдаң сығара чонның амыр чуртазын хадарып, оой нимес служба апарчалар. Терроризмнең, экстремизмнең паза сайбағлардаң тоғыр кӱрезігде араласчалар, улуғ мероприятиелерні хорғыс чох иртіреріне сыбыра хабасчалар, істезіг-тілег мероприятиелерін апарарына тартылчалар, чара чачыратчаң ниме-нооны табар паза оларны чох идер тоғыс толдырчалар.
Спецназ отрядтарының полғаны ла Алтынзархы Кавказсар служба командировкаларына иліг азыра хати чӧрген. Оларның тӱзімніг тоғызын хазна сыйыхтары киречілепче. Оларға 30 чыл аразына 150 азыра хазна сыйии читірілген.
Ӧнетін чаа операциязы пасталғаннаң Росгвардияның чааҷылары Донбасстың амыр чуртағҷыларын арачылир служба апарчалар. Пістiң регионда даа полған на кӱс операциязы Росгвардия чааҷылары чох иртірілбинче. Пылтыр ла ОМОН паза СОБР отрядтары, Хакасияда 180 ӧнетін пӧгін толдырып, 50 азыра сайбағҷыны тутханнар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде