ЧОН ЧАХСЫ АЛЫЗЫҒЛАРНЫ КӦРЕРГЕ КИРЕК
05.04.2023
Хабарлар
Чыылығ. Хакасия пазы Валентин Коновалов ирткен неделяда министерство-ведомство устағҷыларынаң хада нацпроекттерҷе чӧптезіглер хайди иділчеткенінҷе сыныхтағлығ чыылығ иртірiбіскен
Валентин Коновалов нацпроекттерҷе аймах чахығларны чуртасха кирерінде араласчатхан министерство-ведомстволарға чӧптезіглерні кӧрік айының 1-ғы кӱніне теере толдырарға чахаан. Пу тусха тудынза, прай пӱдіріглер паза тыхтағ тоғыстары чыл тоозылғанҷа паза кӧрілген тусха толдырылар. Хакасия Россияның 11 национальнай проектінде араласча. Тиксі сан пиріснең чоох тутхан республика пазының орынҷызы Юлия Исмагилова:
– Россия правительствозының 2022 чылдағы тоғыс салтарынҷа нацпроекттерні чуртасха кирері 100 процентке чағын. Таныхтирға кирек, 2022 чылның салтарларынҷа Россия правительствозының азынада сананыстарынҷа Хакасияда нацпроекттернің чуртасха кирілгені ортымахти 97,6 процентке тиңнелче. Чылдаң чылға кӧрілген ахчаның хорадылған сині чахсыланча: 2019 чылда бюджет ассигнованиелері 82 процентке толдырылған полза, 2020 чылда – 88 процентке, 2021 чылда – 89 процентке, 2022 чылда – 94 азыра процентке.
Юлия Вячеславовнаның таниинаң, прай араласчыларның тӱзімніг тоғызы сылтаанда андағ салтарға килгебіс, ол санда республика правительствозының право хайраллаҷаң, сыныхтағ паза хатығлас органнарынаң хада-пірге тоғынған сылтаанда. 2022 чылның ӱзiнҷі кварталынаң сығара Хакасия правительствозы прокуратура паза казначейство кізілерінең хада чыылығлар иртір сыххан. Пу хабазығ подрядчиктернің тоғыстарны толдырарынҷа кӧп хорғысты хыйа идерге полысхан. Юлия Исмагилова пу чыылығ араласчыларына, Хакасияның прокуроры Сергей Фирсовха паза аның орынҷызы Денис Стонтха хада-пірге тоғынчатхан ӱчӱн алғызын читірген. Чахсы салтарлар парынаңар пу тоғыс пӱӱл чыл тооза узарадылар.
Хакасия пазы Валентин Коновалов кӧрік айының 1-ғы кӱніне хазна-муниципалитет чӧптезіглерін тиксі ит саларға пӧгін турғысхан, че орынҷызының искіриинең, кӧрік айының 15-ҷі кӱніне ол кӧзідіг 57,6 процентке ле тиңнелче. Юлия Вячеславовна ол читкіҷе нимес полчатханынаң чарасхан паза проекттернің кураторларын тоғысты айныдарға хығырған. Чыл тоозылчатса, маңнанминчабыс тібес ӱчӱн, чыл пасталчатсох, прай тоғыстар хаҷанға толдырылары тиксі кӧріл парарға кирек. Хоза нацпроекттерҷе пӱдірілчеткен паза тиксі тыхталчатхан орыннарзар прокуратуранаң хада сыныхтағ чорыхтары иртіріл турар. Мындағ хайығ подрядчиктерні тоғыcтарға паза оларны толдырар тусха сала ситкіп хайарға кӱстепче.
Регионның проект офизі, ол Хакасияның экономика тилізі министерствозының устаанынаң тоғынча, нацпроекттерҷе кӧрілген тоғыстарның толдырылчатханын кӱннің хайығда тутча. Аннаң устапча республиканың экономика тилізі министрінің орынҷызы Людмила Хатланова.
– Кӧрік айының пастағы кӱніне нацпроекттерҷе тоғыстарға пис миллиард 700 миллион салковай кӧріл парған, ол санда тӧрт миллиардча салковай федеральнай бюджеттең позыдылған, 1,7 миллиард салковай – республика бюджедінең, – искірген Людмила Анатольевна. – Пуох тусха ӱс миллиард салковайға 161 хазна-муниципалитет чӧптезии иділген, чӧптезіглерні иткен сині – 53 процент. Ирткен чылда пуох тусха iкi миллиардча салковайға 137 чӧптезіг иділген алай кӧрілген синнің 36 проценті.
Пу кӧзідіг ирткен чылдағызынаң чахсы даа полза, турғызылған пӧгінні толдырарға читкіҷе нимес. Людмила Халтанованың искіриинең, ӱс ле нацпроектче чӧптезіглернің 75 азыра проценті иділген: «Демография», «Ӱгредіг» паза «Саннығ экономика». Кӧрік айының 15-ҷі кӱніне алызығлар пар: тиксі 3,4 миллиард салковайға 243 чӧптезіг иділген. Алынҷа чыылығлар иртірілген соонаң хоза 600 миллион салковайға чӧптезіглерҷе чарадығлар алылған, ол санда Ағбанда Генерал Тихоновтың паза Арбан орамаларында чоллар, олған поликлиниказын пӱдірерінҷе, Боград аалда суғ читірҷең сеть пӱдірии, чон чӧрчеткен паза тура ибіре хай пірее орыннарны иптирі паза пасха тоғыстар. Салтарында чӧптезіглер иділген син 96 процентке читірілер.
Чыылығда полған нандырығлығ министерство паза ведомство устағҷылары нацпроекттерҷе чуртасха кирчеткен тоғыстарның толдырылғанын, соона халчатхан сылтағларны чарыт пиргеннер. Иң сидік орыннарда муниципалитет устағҷызын паза подрядчиктерні маңзырадарға хығырған. Пірее министерстволар федеральнай кіннең чӧптескен тусха тудынчаттыр. Валентин Олегович, тус парына ізенмин, аның чахиина тудынарға киректеен. Андағ сурығлар ӧӧнінде ӧнетін тиріглер паза техника садызарына теелген. Пірее хазна чахығларын толдырҷаң пірігіc табылбинча алай марығда араласчатханнар, УФАС-ха аның cын иртірілчеткеніне хоптанып, аны хыйа иттірібісчелер, салтарында нандырығлығ ӱлгӱ органына хати садығлар чарлирға киректелче. Хорғыстар кӧп. Оларның санында ідӧк нандырығлығ нимес подряд пірігіcтері. Піреезі хазна чахиин алып алған соонаң пірігісті чох ит сыхча, пӱдірігні сӧӧ тарт сыхча. Хакасия пазы Валентин Коновалов андағ «ікінҷілестіг» пірігістернең чӧптезігні тохтадарға хығырча. Олар тусты ла сӧӧ тарт салчалар.
– Полған на министр кӧcтегліг нацпроекттің паза федеральнай проекттің тузында толдырылчатханы ӱчӱн алынҷа нандырча, – теен республика пазы, – аннаңар оңарарға киректер: тузында, чахсы толдырылбаан тоғыстар ӱчӱн хатығластар полар. Прай пу тоғыс чыл тоозыларына кӧрілген ахчаның хорадылчатхан синін кӧзідер! Чахығнаң сыхчатханнар сым одырбасха киректер. Олар прай тоғыстарның толдырылчатханын хайығда тударға киректер! Піс Хакасияның нацпроекттерде паза федеральнай проекттерде араласчатханыбысты тӧрт хати ӧскіріп алғабыс, хабазығ сині 10 миллиард салковайны аза халған! Чон ол тоғыс салтарын, президенттің чахығлары толдырылчатханын кӧрерге кирек!
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде