ЧИИТ ӰГРЕТЧIЛЕР УСТАРЫН СЫНААННАР
05.04.2023
Хабарлар
«Чиит ӱгретчі-2023» марығның чиңісчілері паза араласчылары
Ӱгредiг. Ағбанда «Минiң пастағы хаалағларым-2023» чиит ӱгретчiлернiң фестивальы ирткен
Аның тӧстегҷiлерi Хакасияның ӱгредiг паза наука министерствозы, республиканың ӱгредiг тилiзiнiң паза квалификация кӧдiрерiнiң институды полчалар. Фестивальда «Чиит ӱгретчi-2023» республика марииның чиңiсчiлерiн тапханнар. Марығда аралазарына стажтары пис чылдаң аспаан паза 35 часха читкелек чиит ӱгретчiлердең 31 сурыныс пiчии кiрген. Оларның санынаң жюри алты финалист тапхан.
Марығның халғанҷы чардығында чиит ӱгретчiлерге тимнелген чахығларны толдырарға кирек полған, анзына оларға, пiрге хазна сыныхтаан иртчеткен олғаннарғаох чiли, ӱс час пирiлген. Iстенiс чолын наа ла пастапчатхан специалисттерге школада тоғасчатхан ол-пу сидiксiнiстiг киректi пӧгерге киректелген. Кӧзiдiмге, олғаннар урокта тудызыбысса, ӱгретчi позын хайди тудынарға, ӱгренҷiлерiнең, оларның iҷе-пабаларынаң хайдағ тоғыс апарарын сағынарға кирек. Чииттерге iдӧк хада тоғынчатханнарынаң тӧстелген ӧмелер полысханнар. Чиңiстi Харатастағы паза Ағбандағы орыс тiлi паза литература ӱгретчiлерi холға киргеннер: Ольга Фоляк, Ксения Кузнецова, Наталья Забусова.
Марығ араласчыларын паза аалҷыларын Хакасияның ӱгредiг паза наука министрiнiң орынҷызы Елена Конева, ӱгредiг кирее тоғынҷыларының профсоюзының кiзiлерi удурлааннар. Чиңicчiлерге министерство адынаң грамоталар паза ахчалығ сыйыхтар читiрiлген.
«Минiң пастағы хаалағларым-2023» фестивальда онҷа площадка тоғынған. Пеер школа ӱгретчiлерiнең пасха, олған сады воспитательлерi, хоза ӱгредiг учреждениелерiнiң специалисттерi хығыртылғаннар. Тӧстегҷiлер мындағ алғым мероприятиенi ӧнетiн каникуллар тузында иртiрчелер, андада ӱгретчiлер пос арахтар, аннаңар пос тилiзiне хозым идер чахсы оңдай пирiлче.
«Самый классный «классный» площадка класс устағҷыларына чарыдылған. Мында чыылысханнар амғы туста палаларнаң, саарбахтарнаң ӱгредiглiг тоғысты апарарынаңар чоохтасханнар, опыттарынаң ӱлескеннер. Iдӧк олар «Пастағылар чӧрiмiнең» хада-пiрге тоғынар оңдайларнаң чағын танысханнар.
Искiрiг тимнееннернiң кӧбiзi республиканың чиит ӱгретчiлер ассоциациязының араласчызы полча. Оларның пiрсi – Андрей Колоухов, ол ирткен чылда «Чыл ӱгретчiзi» республика синiндегi марығда чиңiсчi полыбысхан, Москвада ирткен финалда, тiзең, иң чахсыларның 15-iне кiрген. Андрей Александрович Ағбандағы 1 № школада тоғынча, англия тiлiн апарча.
– Фестиваль иртiрiлчеткенi уғаа тузалығ, уламох чиит ӱгретчiлерге. Мин школада тоғызынҷы чылы тоғын парим, че класснаң iкiнҷi ле чылы устапчам. Аннаңар пу площадкада араласханы мағаа класснаң устирынаңар наа пiлiстер аларға туза полған, – ӱлескен сағыстарынаң Андрей Александрович.
Класс устағҷызы пӱӱнгi кӱнде хайдағ сидiксiнiстерге тоғасча тiп суриима ол нандырған: «Минiң кӧрiзiмнең, класснаң устапчатханында тың хорғыстығ сидiксiнiстер чоғыл. Амғы туста сығысчатхан сурығлар чибiргi чыл мының алнында, мин дее позым школада ӱгренчеткенде, андағох полғаннар. Класс устағҷызы прай пу сурығларны пӧгерге тимде поларға кирек. Аның ӧӧн пӧгiнi – класстағы тыртысты тохтадары, iҷе-пабаларнаң чоохтас полары. Тус алысча,че сурығлар олох ла халчалар».
Фестивальның «Ӱгретчiлер чоохтапчалар» площадказы чапсых полған. Ол TЕD-конференция оңдайынаң ирткен, хаҷан ағырсымнығ сурығлардаңар наука тiлiнең нимес, прайзына пiлдiстiг тiлнең чоохтапчалар. Чиит ӱгретчiлер пос кӧңнiнең тема таллааннар паза аны хоостыра полған на кӧрiгҷее хынығ искiрiг тимнееннер. Мында 15-че кiзi араласхан, прайзы чоохтанған соонаң чыылысхан чон оларны паалаан.
Паза «IT-ӱгретчi» площадка кӧп хайығ тартхан. Мында олғаннарнаң тоғысты нииктир оңдайларны, аймах ойыннарнаң, онлайн-сервистернең тузаланарын ӱзӱргеннер. Пу чӧрiмнең Чапаев аалдағы школаның физика ӱгретчiзi Ирина Черпакова устаан. Ол iдӧк чиит ӱгретчiлер ассоциациязының араласчызы полча.
– Ирткен чылдағы фестивальда информация технологияларынаң палғалыстығ сурығлар ӱгретчiлернiң хайиин тартханнар. Аннаңар пӱӱл пiс тoғысха хоратчатхан тусты хызырарға полызар, уроктарны хынығ иртiрер оңдайларнаң таныстырарын узарадарға чаратхабыс. Ассоциацияда даа чиит ӱгретчiлерге полызарға кӱстенчебiс. Пу пӧгiннең аймах чыылығлар, чӧрiмнер иртiрерге кӱстенчебiс. Оларда чоох тударға республика паза хазна синiнде пӧзiк чидiглер кӧзiткен ӱгретчiлернi хығырчабыс. Олар аймах марығларда аралазардаңар чоохтапчалар, чӧптер пирчелер. Ассоциацияа чиит тее, улуғ опыттығ даа ӱгретчiлер кiрчелер, – таныхтаан Ирина Владимировна.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде