ПРАЙ НИМЕ – ЧИҢICКЕ!
12.04.2023
Хабарлар
Чааҷыларға полызығ. Ағбандағы тимір чол вокзалынаң платформаларға таарлалған автомобильлер ӧнетін чаа операциязын иртірерінде араласчатхан пістің чааҷыларға ызылғаннар. Поездті ӱдезер алнында пайрамнығ митинг ирткен
ТИМІР ЧОЛ ВОКЗАЛЫНЫҢ ПЕРРОНЫНДА КӦП ЧОН ЧЫЫЛЫСХАН. ЧИЛДЕ ПОЛИТИКА ПАРТИЯЛАРЫНЫҢ, ТИКСІ РОССИЯНЫҢ ЧОН ФРОНТЫНЫҢ, «БОЕВОЕ БРАТСТВО» ПІРІГІСТІҢ ФЛАГТАРЫ ЧАЛБЫРАП ТУРҒАННАР. ПОЕЗДТІҢ ПЛАТФОРМАЛАРЫНДА УАЗ, «БУХАНКА» АДАЛЧАТХАН АВТОМОБИЛЬЛЕР ЧОРЫХХА ТИМДЕ ПОЛҒАННАР. ЧААҶЫЛАРҒА ПОЛЫЗЫҒ ЫЗАР МЕРОПРИЯТИЕДЕ РЕСПУБЛИКАНЫҢ УСТАҒҶЫЛАРЫ, ПРАВИТЕЛЬСТВО КІЗІЛЕРІ, ӦӦРКI ЧӦП ДЕПУТАТТАРЫ ПОЛҒАННАР, ГОРОД-АЙМАХТАРДАҢ КИЛГЕН КІЗІЛЕР ДЕЕ КӦРІНГЕННЕР.
Прай чоннаң чыған автомобильлерні поезд пістің чааҷыларыбысха апарча
Хайди искірген мероприятиені апарчатхан тоғынҷы, прай хазнада ӧнетін чаа операциязында араласчатхан чааҷыларға полызығ чыыр пункттар тоғынып пастабысханнар. Оларға ам сидік чирлерҷе чӧрҷең транспорт киректелче. Хакасияның правительствозы «Чон фронты» пірігіснең хада пу сурығны пӧк сыхханнар.
Перронда турғызылған сценазар Хакасия пазы Валентин Коновалов сыххан.
– Ӧнетін чаа операциязында араласчатхан пістің чааҷыларға сидік чирлерҷе чӧрҷең автомобильлер киректелче. Піс оларны, чыып, ам пу поезднең ысчабыс. Iдӧк чааҷыларға киректелчеткен кӧп ниме-ноо ызылча. Полызығ чыырында прай чон, идінҷектер, организациялар, предприятиелер, полған на чуртағҷы араласхан тиирге чарир. Кӧп автомобиль чыылған, піс иң чахсыларын таллап алғабыс. Прайзы армияа полызарға кӱстенче. Россияның президенті Владимир Путин турғысхан пӧгіннерні толдырарға пiс армияа хайди даа хабазарбыс.
Ӧнетін чаа операциязында піcтің кӧп чир-суғҷыбыс араласча. Олар, хайди 80 чыл мының алнында пістің ағаларыбыс фашисттердең тоғыр кӱрезіп, чиңic тутханнар, амды нацисттердең тоғыр чааласчалар. Мин ам Хакас национальнай гимназия-интернатта пол килдім. Андағы олғаннар, кізіні арачылаҷаң чазанҷыхтар тимнеп, улуғ нимес чаҷын харачахха суғып, оларны чааҷыларға ысчалар. Олар даа пістің чир-суғҷыларыбысха хабазарлар. Тархынның сыны пістің сарибыста, бандеровецтер, неонацисттер чох иділерлер. Чиңic пісти полар! – чооғын тоосхан Хакасия пазы.
Аның соонда сценазар Хакасияның Ӧӧркі Чӧп кнезі Владимир Штыгашев хығыртылған.
– Піс мында чааҷыларға полызығ апарар поездті ӱдезерге чыылыстыбыс. Пу уғаа кирек мероприятие. Донбасстың чонын нацизмнең позыдар ӱчӱн кӱресчебіс. Піс чоннаң тоғыр кӱреспинчебіс, тилекейдегі чабал нимедең, нацизмнең тоғыр чааласчабыс. Пістің паба-ағаларыбыс олох Польшаны, Чехословакияны, Венгрияны, Румынияны, Болгарияны фашизмнең позытханнар. Ам андағы чон ноға-да сым на полча. США, «Алтын Запад» пістің ыырҷыбыс ам полчалар. 50 – 60 хазна нацисттерге танктар, артиллерия ысча, килкім ахча андар позыдылча.
Че Россияны олар хаҷан даа чиңiп полбастар, пісті чиңiп алар хазна тилекейде чоғыл. Пic, хада-пірге тудынып, хайди даа чиңiс тударбыс. Пістің кӱрезіг знамябыс алтына муңарлап кізі турыбысча. Донбассха, Луганскка, Запорожье паза Херсон областьтарына полызарға субботниктер иртірерге кирекпіс. 1966 чылда, октябрьда, піс Вьетнамға полызарға субботниктер иртіргебіс, ол ахчаа 25 МиГ ысхабыс. Вьетнам чиңдірбеен, чиңic тутхан. Чиңiс тударға тоғынарға кирекпіс. Тилекейдегі чабал нимені чох идерге чиңic тударға кирек. Чиңiс ӱчӱн, ура! – теен Владимир Штыгашев.
Митингте iдӧк чоох тутхан Россияның Хазна Думазының депутады Казбек Тайсаев. Ол Хакасия чуртағҷыларына Хазна Думазының, Геннадий Зюгановтың чолабидін читірген, пістің республиканың чир-чайаанын, чуртағҷыларын махтаан. Донбасстағы чааҷыларға полызығ ысчатхан ӱчӱн прайзын, алынҷа Хакасияның устаан, Валентин Коноваловты паза аның командазын алғыстаан. Аның чооғынаң, прай хазна чааҷыларыбысха полызығ ысча.
Хызылчар тимір чолының региондағы управление пастығы Александр Кожанов, ӱр чоохтанмин, «РЖД» ОАО чааҷыларға прай полызығларны тикке апарчатханын, кирек вагоннарны, платформаларны тикке пирчеткенін таныхтаан. Аның сӧстерінең, компанияның прай тоғынҷылары мындағ полызығ ызарына хозылчалар, мыннаң мындар хабазарға тимделер.
Хайди искірген тиксі Россияның чон фронтының региондағы пӧлиинің устағҷызы Ксения Буганова, пір неделяа республикада чааҷыларға ысчаң 26 автомобиль тимнелген. «Боевое братство» пiрігіске улуғ алғыс. Аның араласчылары, 100 азыра автомашинаны кӧріп, сыныхтап, иң чахсыларын таллап алғаннар. Прай машиналарда хайах, шиналар, аккумуляторлар нааға алыстырылғаннар, кирек клӱстер багажниктерге салылған. Губернаторға улуғ алғыс, правительство техника аларына пір дее тудығ чох 10 миллион салковай позытхан. «Аршановский» разрез таарлағ тартчаң iкi наа автомашина пирген. Сорығ городтың пазы Владимир Найдёнов госпитальға автобус ысча.
«Автопоезд» акция хоостыра чол чох чирлерҷе чӧр полар автомобильлер таллалған. Хубачардағы школаның ӱгренҷілері ысчаң машиналарны чазааннар. Хонҷых Тува Республикада 40 автомобиль тимнеп салтырлар, амды оларнаң хада поездте 66 техника парар.
Митингте чоох тутчатханнар аразында ырҷылар патриот сарыннарын толдырғаннар, олған ӧмезі теелбек узын кӧзіткен, ол кічіг палаларны кӧрерге ачыныстығ полған. Митинг пасталар алнында ӱбӱрҷең оркестр Россияның паза Хакасияның гимннерін толдырған полза, мероприятие тоозылчатханда, автомобильлерні апарчатхан поезд тибiреп сыхханда, «Марш славянки» кӧгні толдырған. Мыннаң пайрамнығ мероприятие тоозылған. Піди пістің чааҷыларға прай чоннаң хада чыған полызығ ӧнетін чаа операциязында чиңіс тударға хабассын, постарын даа хайраллирға тузалығ ползын.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде