ОРЫНДАҒЫ ПАСТЫХТАР ТОҒЫНЗЫННАРОХ
12.04.2023
Хабарлар
Тоғыс чорығы. Хакасия пазы Валентин Коновалов алындағы кӱн Ағбан пилтiрi посёлоктың чуртағҷыларынаң тоғасхан
Ағбан пилтiрi аймааның кiнiнзер Хакас Республиканың правительство кнезiнең хада килгеннер Россияның Хазна Думазының депутады Казбек Тайсаев, Донецк Чон Республиказының пазы полған Александр Захарченконың оолғы Сергей Захарченко паза республиканың хай пiрее министрлерi паза комитеттер кнестерi, «Аэросити-2000» компания кiзiзi полғанох.
Хакасия пазы Валентин Коновалов хысхаҷахти республиканың экономика киреенеңер паза ӧнетiн чаа операциязынаңар чоохтап пирген.
Хазнада чуртас-экономика кирее сидiк оңдайларға кiрген дее полза, ирткен чылның салтарларынҷа республика экономиканы тут халған. Тоғыс чохтарның cаны кӧрiндiре синген. Сибирьдегi федеральнай округта паза Россияда Хакасия турыстығ кӧрiнче, соондағыларның санында нимес. Чал ахчазы тузында тӧлелчеткенiн правительство хайығда тутча. Че хай пiрее предприятиелерде ол саринаң cидiкciнiстер ам даа пар. Ол санда хара тас аныпчатхан компанияларда.
Хакасия iдӧк киинi чахсыландырарынҷа тоғыс апарча. Республикадағы iкi город Ағбан паза Харатас «Арығ кии» федеральнай проектке кирiлген. Аны хоостыра пу городтар киинi пуртахтапчатхан хара тас орнына тураларны чарытхынаң паза газнаң чылыдар программа сынағлары парча.
Республика пазы Валентин Коновалов Донбасс чирiнзер нинҷе-де хати чӧр килген. Луганск Чон республиказынаң ӧнетiн чӧптезiглер идiлген. Хакасия СВО чааҷыларына паза Донбасстағы чуртағҷыларға гуманитарнай полызығны тӧремiл ысча. Амды андар тӧртiнҷi поезд чӧрiбiстi. Полызыға иң киректелчеткен ниме-нооны ызарға кӱстенчелер. Республикада ол киректе ӧткiн араласча «Боевое братство» халых пiрiгiзi. Кип-азах тiкчең фабриканың тоғынҷылары ӧӧн тоғыстары соонаң СВО чааҷыларына аймах кип-азах паза чылығ носкилер, тiгiп, ысчалар. Андағ полызығларны прай даа илбек хазнабыстағы регионнар тимнепчелер.
Амғы чаа операциязы Украина чонынаң на тоғыр нимес, че Кидеркi Европадағы прай даа хазналардаң тоғыр парча. Олар Россияны чох идерге кӱстенчелер нооза.
Анаң чоох тутханнар Казбек Тайсаев паза Сергей Захарченко. Олар Хакасияны Донбассха пiди полысчатхан ӱчӱн алғыстааннар. Россия чааҷылары хайди андағы чонны арачылапчатханнаңар чоохтааннар. Кiзiлернi, иңзерiлген туралардаң паза оралардаң сығарып, хорғыс чох орыннарзар апар турғаннар.
Ағбан пилтiрi посёлоктың пазы Нина Леонченко правительствоны тӧремiл полызығ пирчеткен ӱчӱн алғыстаан. Посёлокта халғанҷы чылларда тӧрт орамада чарытхы пирiл парған. 20 миллион салковайға чоллар нааҷылалғаннар, клуб тыхталған.
Чыылған чонның кӧбiзi улуғ частығ кiзiлер полған. Олар олаңай чуртаста киректелчеткен сурығларны пир турғаннар. Кӧзiдiмге алза, посёлок чуртағҷылары Ағбандағы республика имнег туразының специалисттерiнзер кiр полбинчалар. Чадығдағы кiзiлерге орындағы имҷi, ибзер килiп, прививка турғыспинча. Аалда ээзi чох адайлар тол парир, хайдағ-да кiзiлер ахчаа электросчётчиктер алыстыр пирерге харасчалар, похсах тӧгер сурығ орнынаң тибiребинче паза даа оох-теек сурығлар.
Хакасия пазы позының нандыриинда таныхтаан, кӧп сурығны аалның паза аймахтағы муниципалитеттер устағҷылары даа пӧк саларҷыхтар. Пiрее сурығларны федеральнай синде ле пӧгерге кирек. Iди ээзi чох адайларны, ӧнетiн питомникте чаап, ӧлгенҷе азырирға кирек. Iди республика бюджедiнең ол кирекке 40 миллион азыра салковай парча. Пасха хазналарда андағ чӧскiн адайларға ээлерi табылбинчатса, оларны, укол турғызып, чох идiбiсчелер. Ээзi чох адайлардаңар сурығны федеральнай синде дее пӧк полбинчалар. Хазна Думазында аны регионнарға пирiбiзердеңер таласчалар. Полғанында ла ол кирек пасха-пасха полча нооза. Хакасияда пiр чылда ӱс муң азыра адай тудып алчалар. Анаң оларға питомник пӱдiрерге кирек, анда тоғынчатханнарға чал ахчазын тӧлепчелер паза даа пасха хорадығлар сығыс турчалар.
Имнег киреенҷе сурығларға нандырған республиканың хазых хайраллаҷаң министрi Олег Ананьевский. Ол, прай сурығларны санға алып, нандырығлар пирерге молҷаан.
Халғанҷы сӧзiнде республика пазы кiзiлерге орындағы пастыхтарны хапчығай хайынарға кӱстензiннер тiп чӧп пирген.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде