ПОЛЫЗАРҒА ХАҶАН ДАА ТИМДЕЛЕР
14.04.2023
Хабарлар
Тоғазығ. Республиканың хоза ӱгредiг кiнiнде Хакасия пазы Валентин Коновалов волонтерларнаң тоғасхан
ЗАЛДА РЕСПУБЛИКАНЫҢ ВОЛОНТЕРЛАР ПIРIГIСТЕРIНIҢ ӦТКIН АРАЛАСЧЫЛАРЫ ЧЫЫЛЫСХАННАР, ТИКСI РОССИЯНЫҢ ЧОН ФРОНТЫНЫҢ КIЗIЛЕРI ПОЛҒАНОХ. ОЛАРНАҢ ТОҒАЗЫҒА ВАЛЕНТИН ОЛЕГОВИЧТЕҢ ПАСХА, IДӦК РОССИЯНЫҢ ХАЗНА ДУМАЗЫНЫҢ ДЕПУТАДЫ, СНГ КИРЕКТЕРIНҶЕ КОМИТЕТ КНЕЗIНIҢ ОРЫНҶЫЗЫ КАЗБЕК ТАЙСАЕВ, ДОНЕЦК ЧОН РЕСПУБЛИКАЗЫНДАҒЫ ЧИИТТЕР ЧӦРIМIНIҢ УСТАҒҶЫЗЫ СЕРГЕЙ ЗАХАРЧЕНКО ПАЗА ДОНБАССТАҒЫ ПОЛЫЗЫҒЛЫҒ МИССИЯНЫҢ УСТАҒҶЫЗЫ ВИКТОРИЯ ТИМОШКИНА КИЛГЕННЕР.
Амғы туста волонтерлар СВО араласчыларына паза оларның сӧбiрелерiне полызарынҷа улуғ тоғыс апарчалар. Олар тимiр пестернi, блиндаж свечiлерiн тимнепчелер, чылығ кип-азах тiкчелер, маскировка сеткаларын палғапчалар, чыылған полызығны ызарға тимнепчелер, чааҷыларның туған-чағыннарына иб аразында полысчалар.
– Прай Хакасия – ӱлгӱ органнары, аймах организациялар, предприятиелер, олаңай чуртағҷылар – СВО араласчыларына полызығ тимнирiнде ӧткiн араласча. Халғанҷы пiр чыл чарым аразына республикадаң СВО иртчеткен чирлерзер чӱзерлеп тонна полызығлығ таарлағ ысхабыс. Пу кӱннерде 28 автомобиль таарлалған поезд чӧрiбiскен. СВО араласчыларына ызылған автомобильлер санынаң пiстiң регионыбыс хазнабыста iкiнҷi орында, Тувадаң на халчабыс. Iдӧк чааҷыларыбысха, оларның сурыныстарына паза айланыстарына тӧстене, кирек ниме-ноо чыылған. Аннаңар прай Хакасия чуртағҷыларына улуғ алғызым читiрерге сағынчам, пу пiстiң пiрге тоғызыбыс. Таныхтирға кирек, мыннаң мындар пу кӧстегҷе тоғысты узарадарбыс, – чоохтанған Валентин Коновалов.
Казбек Куцукович ӱр ниместе СВО иртчеткен чирлерінең командировкадаң айланған. Ол чыылысхан чоннаң чорығы хоостыра сағыстарынаң ӱлескен:
– Тоғазыға хығырған ӱчӱн алғызым читiрчем. Пiс ӱр ниместе Луганск Чон Республиказынаң айланғабыс. Чааҷыларнаң, ол санда Хакасия чуртағҷыларынаң, тоғасхабыс. Олар махачы чааласчалар. Тӧреен Хакасияа улуғ чолабит читiрерге сурынғаннар, мин читiрчем. Iдӧк Хазна Думазының депутаттары, ӧӧнiнде Геннадий Зюгановтың, адынаң республика чуртағҷыларына алғыс сӧстерiн читiрчем. Ағбандағы тимір чол вокзалындағы митингте араласчатханда, позымның хараамнаң кӧргем, хайдағ чылығ сӧстернең чааҷыларға хабазығ ызылған. Iдӧк Харатастағы кип-азах тiкчең фабрикада полғабыс. Анда тоғынчатхан ипчiлер, тоғыс соонаң даа халып, чылығ носкилер палғапчалар. Iле кӧрiнче, хайдағ хыныснаң олар пу кирекке хайчалар. Полған на паразар шоколад сух салчалар, Хакасияда тимнелген полызығны таныхтапчатхан ӧнетiн чаҷын чапсырылча. Мындағ сыйыхты алған чааҷының кӧңнi кӧдiрiлер. СВО-да улуғ тоғыс апарчатхан чир-суғҷыларыбысха iдӧк алғызым читiрчем. Хакасияда оларның сӧбiрелерiне, ол санда кӧп палалығларға, полызығ пирер законнар алылған. Пасха хонҷых таа регионнарда андағ законнар чоғыл. Мин аннаңар пiлбеем, пеер килгенде ле ис салғам. Улуғ ахча полбаза даа, мындағ полызығ уғаа кирек.
2014 чылдаң партиябыснаң Донбасс чуртағҷыларына хабазығ ызар тоғысты пастаабыс. Пу тусха 107 гуманитарнай конвой ызылған, андар имнер, ас-тамах, пӱдiрiг материаллары кiрче, прай 18 муң азыра тонна.
Паза Иосиф Кобзонның, Геннадий Зюгановтың пастаанынаң иртiрiлчеткен «Россия палалары – Донбасс палаларына» акциядаңар чоохтирға сағынчам.
Президент киректерi устанызының «Снегири» пансионадында, ол Москва алтында орныхча паза иң артыхтарның санына кiрче, Донбасстаң килген олғаннар реабилитация иртчелер. Пу тусха 12 муң азыра пала анда пол килген. Донбассха мындағ оңдайнаң полысчатханы уғаа кирек. Аннаңар сiрернi кӱстенiзiңер ӱчӱн алғыстапчам.
Пасха аалҷылар iдӧк алғыс сӧстерiн читiргеннер. Анаң волонтёрлар Валентин Коноваловха, Казбек Тайсаевке сурығлар пиргеннер. Олар пасха-пасха кӧстеглерге теелгеннер: волонтёрларға хайдағ полызығ кӧрiлгеннеңер, мыннаң мындар СВО араласчыларына хайди хабазарынаңар, чааҷыларнаң палғалыс тудар ондайлардаңар паза 9 Майда СВО-да чуртастарын пир салған чааҷыларның хумартхызына чарыдылған хайдағ мероприятиелер иртерi кӧрiлчеткеннеңер.
Валентин Олегович, Казбек Куцукович прай даа сурығларға нандыр пиргеннер. Хайзы айланыстарны, чыылығ протоколына кирiп, чуртасха кирер оңдайларны табарға молҷааннар.
Тоғазығда араласхан волонтёрлар пiрiгiзiнiң пiрсi Ағбандағы волонтёрларның «кӱмӱс» отряды, хысхаҷахти «СОВА» (Серебрянный отряд волонтёров Абакана), араласхан. Аның устағҷызы городтағы чоннаң тоғыс апарҷаң халых кiнiнiң директоры Нина Чаптыкова полча. Отряд Ағбанның культура устанызында 30 апрельде 2019 чылда тӧстелген. «Кӱмӱс» волонтёрлар санына 50 час ас парған кiзiлер кiрчелер.
– Пiс аймах тоғыс апарчабыс – халых, экология чӧрімнерін иртiрчебiс, чахайахтар, ағастар одыртарында, субботниктер иртiрерiнде ӧткiн араласчабыс, город, республика синiнде иртiрiлчеткен мероприятиелернi тимнирге полысчабыс. Iдӧк чуға чуртапчатхан сӧбiрелердегi палаларға школаа парар алнында канцелярия чыыпчабыс, Наа чыл ӱлӱкӱнi алнында тадылығ сыйыхтар тимнепчебiс. Хазии уйан олғаннарға мастер-класстар иртiрчебiс, оларны чуртастарында тузалығ полар кӧнiгiстерге ӱгредерге сiренчебiс. Ӱр ниместе волонтёрларыбыс СВО араласчыларына, тӱк чiп алып, чылығ носкилер палғааннар.
Отрядыбыстың ӧӧн пӧгiнi – частаныбысхан кiзiлернiң пiлiстерiн ӧсчеткен тӧлге читірер оңдайларны чуртасха кирерi. Паза, тынаға сых парған ӧткiн кiзiлернi чыып, тоғазығлар иртiрчебiс. Пiреезi чалғызан халча нооза, аннаңар улуғларыбыс постарын ӧкiс санабазыннар тiп, оларға хайарға кӱстенчебiс. Пiсте олар, удур-тӧдiр ынағлазып, нанҷылар таапчалар. Амғы туста отрядта 60 – 70 араласчы саналча, – чоохтапча Нина Фёдоровна.
Тоғазығда пасха-пасха частығ волонтёрлар полғаннар – ӱгренҷi-студенттер, iстенчеткен улус, тынағдағылар. Піди пос кӧңнiнең пасха кiзiлерге полызарға тимде чонның хада-пiрге тоғынчатханын кӧрзе, хайдағ даа сидiксiнiстi тобыр парыбызарына iзенiс тӧрiпче.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде