РОССИЯ КИНОФЕСТИВАЛЬЫ ХАКАСИЯДА ПАСТАЛҒАН
21.04.2023
Хабарлар
Культура. Пу неделяда пістің республикада «Движение по вертикали» кинофестиваль алғым ирткен. Ол Россияның кинорежиссёры, киноактёры Станислав Говорухиннің хумартхызына чарыдылған
«Движение по вертикали» проекттің тӧстегҷілері полчалар Россияның культура министерствозы, «КиноФокус» ООО, Кинофестивальлар паза чоннар аразындағы программалар кіні, «Вертикаль» киностудия. Оларға Хакасия паза Марий Эл республикаларның культура министерстволары ӧткін хабасчалар.
Кинофестиваль ікі чардыхха чарылча. Пастағы чардығы 18 – 21 апрельде Хакас чирінде ирт парды, ікінҷізі 25 – 28 майда Марий Эл Республиканың Йошкар-Ола городында полар.
Пістің регионзар чапсых мероприятиені иртірерге Москвадаң аарлығ аалҷылар килгеннер: Россия искусствозының саблығ деятельі, Кинофестивальлар паза чоннар аразындағы программалар кінінің президенті Татьяна Шумова, «КиноФокус» компанияның устағҷызы Ирина Борисова, киновед, «Ленфильм» киностудияның ӧӧн редакторы Андрей Апостолов, Россияның театр паза кино актёры Иван Колесников, Россияның артизі, сценарист, режиссёр Ольга Беляева.
Кинофестиваль Л.Р.Кызласовтың адынаң республиканың ӧӧн чир-суғ ӱгренҷең музейде пресс-конференциянаң пасталған. Аны Хакасияның культура министрі Светлана Окольникова асхан.
– Проект Хакасияда тоғынып пастапчатханына тың ӧрінчебіс. Станислав Сергеевич Россияның паза тилекейнің кинематографиязына улуғ хозым иткен. «Место встречи изменить нельзя», «День ангела», «Не хлебом единым», «Вертикаль» паза пасха даа фильмнерні піс хынып кӧрчебіс. Кинофестиваль программазында креативнай индустрия школазының ӱгренҷілері, чайаачы студенттер, чиит кинорежиссёрлар араласчатханы танығлығ, – теен министр.
Чылығ тоғазығда ідӧк Москвадаң килген улуғ аалҷылар чоох тутханнар.
– Мин Хакасияа тың хынчам. Мындағы чирні илбек тіп санапчам. Мин пеер тӧреен чир-суумзар чіли айланчам. Светлана Анатольевнанаң танызып алғанымда, Хакасиядағы аймах форумнарда кӧп хати араласхам. Чайаачы тоғазығлар, ӱзӱріглер соонаң тузалығ проекттер сыбыра тӧріҷең. Илбек кізі Станислав Сергеевич Говорухиннің хумартхызына чарыдылчатхан проект Хакасияда азылғаны орта чарадығ тіп санапчам. Аны мында чылығ удурладылар, – таныхтаан Татьяна Шумова.
– Станислав Сергеевич минің ӱгретчім полған. «Wеекеnd» фильмні хада суурған соонаң ол мағаа теен: «Ам позың кино суурарзың». Пазағы кӱнінде мағаа сценарий пазарға чахығ пир салғаннар. Мин тоғысха чапсыныбысхам. Іди 2014 чылда «Тайна тёмной комнаты» фильм чарыхха сыххан. Ол амғы фестивальның программазына кирілібӧк парған. 2016 чылда «Опасные каникулы» кино тӧреен. Станислав Сергеевич пу ікі киноның хоос устағҷызы полған, – теен режиссёр Ольга Беляева.
Хакасияда «Движение по вертикали» кинофестиваль тузында республикада чилліг соох кӱннер турғаннар. Аны хоостыра Ольга Беляева хайхастығ ниме чоохтаан:
– Пірсінде мындағ кирек полған. Одессазар кино суурарға парғабыс. Анда чылығ айас кӱннер турчатханнар. Сала соонаң Станислав Сергеевич килгенде, чил кӧдіріліп, кӱгӱрттіг наңмыр чаап сыххан, ағастар даа, сынып, аңдарылчатханнар. Москвазар нандыра айланарға пӧгініп, самолётха одырыбысханда, пазох тигір айасталыбысхан, чалахай кӱніҷек сых килген. Аның алнында ла Станислав Сергеевич, мин килген чирде кӱн хомай саринзар алыс турар тіп, чоохтанған полған. Одессада ідӧк киліс парған. Аннаңар, сағынчам, пу фестиваль Хакасияда иртчеткенде, Станислав Сергеевич піснең хости чӧрче полар.
Пресс-конференция соонаң прайзы Станислав Говорухиннің чайаачы тоғызына, чуртазына чарыдылған сомнар кӧзідиин кӧрерге музейнің залынзар ирткеннер.
Кинофестивальның программазы алғым полған. Тӧрт кӱн изере Россияның кинорежиссёры С.С.Говорухиннің киноларын кӧзіткеннер. Ағаа хоза Хакасияның культура министерствозында, Н.Г.Доможаковтың адынаң национальнай библиотекада, креативнай индустрия школазында ӱгренҷілерге, студенттерге, чайаачы чииттерге чапсых тоғазығлар, мастер-класстар, тегілек столлар иртіргеннер. Москвадаң килген аалҷылар оларнаң хада опыттарынаң ӱлескеннер, Станислав Говорухиннең хайдағ тоғыс апарғаннарын чоохтааннар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде