ПАСХА ХАН ЧИРЛЕРІНІҢ ХАБАРҶЫЛАРЫ – ХАКАСИЯДА
26.04.2023
Хабарлар
Хакасия пазы Валентин КОНОВАЛОВ Вьетнам паза Хыдат хабарҷыларның сурығларына нандырча
Тоғазығ. Пу неделяда Хакасияда Вьетнам паза Хыдат хабарҷылары ааллапчалар
Хосхар айының 24-ҷі кӱнінде пасха хан чирлерінің хабарҷыларынаң Хакасия пазы Валентин Коновалов тоғасхан. Тоғазығ Л.Р. Кызласовтың адынаң Хакас национальнай чир-суғ ӱгренҷең музейнің кӱргеннер залында ирткен. Телевидение паза искіріг агентстволарының хабарҷылары Хакасия пазына республиканың пасха хан чирілерінең хайызығларын тилідер оңдайлардаңар паза туризмні тилідердеңер сурығлар пиргеннер.
– Піс республиканың туризмін дее, ниме-ноо садызарын алғыдарынҷа даа хайызығларны алғыдарға кӱстенчебіс, – таныхтаан Валентин Олегович. – Пістің ниик паза ас-тамах промышленнозында, аал хониинда, ниме-ноо сығарызында хайызығларны алғыдар оңдайлар пар. Ідӧк республиканың инвестиция проекттері пар, оларны инвестициялар кир полар компанияларға сӧлепчебіс, ол санда пасха хазналардағы.
Халғанҷы чылларда Хакасия істіндегі туризмні тилідерінҷе улуғ тоғыс апарча. Хабазығ пис чыл аразына 7,5 хати ӧскірілген. Республикада туристтер чӧрерге хынчатхан орыннарда инфраструктура иптелче, амғы тусха килістіре тынағ паза тохтағ орыннарын тӧстиріне хайығ салылча.
– Ол саринаң піc Вьетнамнаң, Хыдатнаң паза пасха хазналарнаң палғалысчаң чахсы оңдайларны кӧрчебіс, – теен республика пазы. – Піс туристтерні удурлирға тимдебіс, олох туста пістің чуртағҷылар пу хазналарнаң танызарға, анда тынанарға сағынчалар.
2022 чылда Хакасия чарым миллионҷа туристті удурлаан, хонҷых регионнардаң килчеткеннерні санға алза, туристтер саны пір миллионны асханнаңар искірген Валентин Олегович. Туризм ідӧк экономика тилізіне чахсы ӧзен полча. Республикада Хыдаттаң нинҷе-де инвестор пар полтыр. Олар промышленнозыбысты тилідеріне хозым идіп пастабысханнар. Пасха кӧcтеглерҷе хада-пірге тоғынардаңар ідӧк чӧптезіглер апарылча. Вьетнамнаң, тізең, ӧӧнінде туризм кӧстеен тилідер оңдайлар пар.
Вьетнамның хазна телевидениезінің (VTV) хабарҷызы Фан Ву Ньят Линь Россияның аймах регионнарында полча, че Хакасиязар тоғыс чорығынаң пастағызын на килген.
– Сынында сағам Хакасиядаңар пос кӧрізінең ӱлезерге ирте. Чорых алнында мин аннаң интернеттегі искіріглернең танысхам. Вьетнамға Хакасия таныс нимес чир. Россиядаңар піс кӧп нимес пілчетсебіс, Хакасия ол саңай пасха чир, – тіпче Фан Линь.
Чоохтазығ соонаң Валентин Коновалов пасха хан чирлерінің хабарҷыларын «Ирбен оды» кафезер хакас чон ас-тамаанаң танызарға хығырған.
Чоохтирға кирек, хабарҷылар олох кӱн, Ада чир-суубысты арачылап чат халған чир-суғҷыларыбысты хумартхылап, Ирт тағдағы хумартхы тасха чахайахтар салғаннар. Л.Р.Кызласовтың адынаң Хакас национальнай чир-суғ ӱгренҷең музейде паза «Салбых чазызының пурунғы кӱргеннері» тигір алтындағы азых музейде пол килгеннер. Киҷее аалҷылар чир-суубыстың тархын паза чир-чайаан хумартхыларынаң, хакас чонның кибір-чозахтарынаң танызарын узаратханнар.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы