Iстенҷiлернi чеестеҷең ӱлӱкӱн
01.05.2023
Хабарлар
Ағбан городтың Пастағы май ачығында Часхы паза Iстенiс кӱнiне чарыдылған митинг-концерт ирткен. Ӱлӱкӱнге профсоюз организацияларының паза халых пiрiгiстерiнiң кiзiлерi, iстенiс ӧмелерi, политика партияларының членнерi паза чуртағҷылар килгеннер. Чыылысхан чонны Хакасия пазы Валентин Коновалов ӱлӱкӱннең алғыстаан:
– Аарлығ нанҷылар, прай чӱреемнең Iстенҷiлернiң чоннар аразындағы кӱнiнең алғыстапчам. Пастағы Майны таныхтиры ХIХ чӱс чыл тоозылчатханда кибiрге кiр парған. Андада тиксi тилекейдегi чон iстенiс оңдайларын чахсыландырар ӱчӱн кӧдiрiлген. Илбек Октябрь социалистическай революция соонаң совет чонға Пастағы Май iстенҷiлернi чеестеҷең ӱлӱкӱнге айлан парған. Пӱӱн пiске, чӱс чыл мының алнында чiли, iстенiс правозын арачылирға килiсче. Кидеркi хазналар, пiстiң предприятиелернi изебiзер ӱчӱн, чуртағҷыларыбысты тоғыс чох халғыс салар ӱчӱн, аймах оңдайлар тiлепчелер: нефтьтiң паазын сайбапчалар, хара тасты садарға харығ полчалар, алюминийге пошлиналар ӧскiрчелер. Пiстiң Хакасия чонынаң, чир-чайаанынаң, тархынынаң, культуразынаң пай. Пiссер чир-чайааныбыснаң ӧкерсiнерге, кӱс алынарға килчелер. Хакасия iкiнҷi чылы изере пiстiң хазнаның чахсы тилiпчеткен 35 регионының санына кiрче. Правительствоның тiспен тоғызы ӱчӱн, пис чыл аразына республиканың парызы iкi хати кӧп ӧс парған. Амғы Хакасияның тархынында хысха тус аразына мындағ ӧзiс отыс чыл полбаан. Пiс республиканың коммерческай хазна ӧдiзiн пис хати хызырыбысхабыс. 2022 чылда муниципалитеттерге иң улуғ ахчалығ хабазығ пиргебiс – ол 22 миллиард салковай азыра. Аалларға хорадығларны 2,5 хати ӧскiрiбiскебiс, хазых хайраллирына паза спортха – ӱс хати, ӱгредiге паза культураа – iкi хати, чолларға – алты хати. Нанҷылар, прай пу – тиксi республиканың, полған на чуртағҷының тiспен тоғызы. Сiрернiң кӱзiңернең предприятие, город, аал тилiпче. Пiстiң матлама iстенчеткен кiзiлер кӧп. Пiс хада-пiрге иң аар сурығларны пӧк полчабыс. Хынған республикабыстың ӧңненiзiне хозым ағылчатхан полған на чуртағҷаа улуғ алғыс! Прайзы пик хазыхтығ, часкалығ, чахсы кӧңнiлiг полыңар!
Анаң регион пазы Валентин Коновалов республика чуртағҷыларына «Хакасияның iстенiс сабланызы» медальлар читiрген. Iди аарлығ сыйыхха турысханнар: олимп резервi спорт школазының улуғ тренерi Николай Дружинин, музыка колледжiнiң преподавательi Надежда Кондратова, ХГУ-ның эксплуатация, тыхтағ паза пӱдiрiг управлениенiң пастығы Сергей Бобровник, Cаяногорсктағы имнег туразының имҷi-трансфузиологы Валентин Горявин, республиканың Г.Я.Ремишевскаяның адынаң ӧӧн имнег туразының сурдолог-оториноларингологы Наталья Локоткова.
Iдӧк республика чуртағҷыларын Пастағы Май ӱлӱкӱннең Хакасияның Ӧӧркi Чӧп кнезi Владимир Штыгашев алғыстаан:
– Пастағы Май сынап чарых паза амыр чуртас ӱлӱкӱнi саналча. Ол iстенчеткен кiзiнi аарлапчатхан ӱлӱкӱн полча. Мында пiстiң вузтарның студенттерiн паза преподавательлерiн, iстенiс ветераннарын, предприятиелернiң тоғынҷыларын кӧрчем. Аарлығ нанҷылар, мин сiрернi пос правозын арачылирға хығырчам, ол санда iстенiс правозын. Амғы туста ӱгренген специальность хоостыра тоғыс таап аларға оой нимес. Хакасияның правительствозына паза аал-город пастарына наа істенҷең орыннар тӧстир ӱчӱн, наа предприятиелер паза учреждениелер азар ӱчӱн, прай кӱстерiн саларға кирек. Андада чуртағҷыларның тоғыс паза турыстығ чал ахчазы полар. Халғанҷы iкi чыл аразына пiс ол кӧстегҷе хаалағлар итчебiс. Че улуғ пӧгiннер ам даа пар. Хакасияның чуртазын таңдох чахсы саринзар алыстырыбысчаң хуруғ тiллерге киртiнмеңер. Андағлар халғанҷы отыс чыл аразына толдыра полғаннар. Аарлығ нанҷылар, мин сiрернi, кӱстенiп, чахсы ӱгренерге, тiспен iстенерге хығырчам. Пiлiс алары – ол иң пастағы улуғ тоғыс. Чииттер хынған тоғыстарында iстензiннер. Диплом алып алған имҷiлерiбiс Канадазар, Европазар тоғынарға парбазыннар. Пiс оларны мында 5-6 чыл ӱгретчебiс. 30 процент студенттерiбiс, Хакас чирiнзер айланмин, пасха городтарзар парғлабысчалар. Пiске имҷiлер, ӱгретчiлер, инженерлер, техниктер паза пасха даа специалисттер чидiспинче. Пiс тағҷыларның iстенiстерiн тың аарлапчабыс. Хара тас аныҷаң отрасльда он муң азыра кiзi iстенче. Металлургия промышленнозында iдӧк он муң азыра iстенҷi тоғынча. Пу асхынах кiзi нимес. Мында кӧп инженер паза техник iстенче. Аарлығ чуртағҷылар, сiрер хада-пiрге ынағлазыңар, постарыңның iстенiс правозы ӱчӱн ӧткін турызыңар. Сiрернiң кӧрiзiңернең саназарға киректер. Прайзын Пастағы Май ӱлӱкӱнiнең!
Митинг-концертте В.Г.Чаптыковтың адынаң Хакас филармониязының артисттерi Артур Марлужоков, Олег Гриценко, Мария Сиротенко паза С.П.Кадышевтiң адынаң чон чайаачызы кiнiнiң «Час ханат» олған эстрада студиязының араласчылары Софья Самрина паза Софья Кускашева ыр-сарыннар толдырғаннар.
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы