ПАЛА ПОС ТІЛІН ПІЛЧЕТКЕНІ СӦБІРЕЕ ПАРЫС АҒЫЛЧА
17.05.2023
Хабарлар
Чиңіс. Хакасия правительствозында хакас тілін иң артых пілчеткен республиканың 5-ҷі класстардағы олғаннарына ахчалығ сертификаттар читірілген
Пизінҷі класстағы ӱгренҷілер аразындағы тіл марии пӱӱл ікінҷі хати иртті. Анда 140 олған араласхан. Иң кӧп ӱгренҷі Асхыс, Таштып аймахтарынаң паза Ағбан городтаң полған. Тӧреен тілнең иң чахсы пасчатханнары паза чоохтасчатханнары ирткен неделяда Хакасия правительствозынзар хығыртылғаннар. Оларға Хакасия пазы Валентин Коновалов ахчалығ сертификаттар читірген.
– Тіл мариин піс пӱӱл ікінҷі хати иртірдібіс, – таныхтаан Валентин Олегович. – Ол хакас тілін хайраллирынҷа программаның улуғ нимес чардығы полча, хайзын піс аннаң андар алғыдарға пӧгінчебіс. Тіл мариинда артых полыбысханынаң піс сірерні алғыстапчабыс. Пос тілін хайраллирға паза тилідерге кӱстенерге кирек, аны аарлирға, аннаң поғдархирға. Сірер тӧреен тілнең сыбыра чоохтас турыңар, аны ундутпаңар. Улуғ алғыс читірерге кирек іҷе-пабаларға, аға-ууҷаларға. Чиңіс тутхан олғаннарның сӧбірелерінде пос тілінең чоохтасчалар.
Иң кӧп балл тӧрт олған чыып алған. Оларның аразында Асхыс аймаандағы Полтахтағы школаның ӱгренҷізі Александра Чепчигашева полған. Сыйых аларға ол ағазы Валерий Ивановичнең паза ууҷазы Нина Николаевнанаң хада килген.
– Марығда чиңіс тутханыбысха ӧрінчебіс, – чоохтапча Нина Николаевна. – Итсе-де, чиңісчілер санында пол парарына ізенгебізӧк. Пархаҷаам хакас тілінең чахсы ӱгренче. Ол піснең хада аалда чуртапча. Піс ибде пос ла тілінең чоохтасчабыс, ол пістің чооғыбысха сыбыра хозылча. Диктантты чахсы пазарға ӱгретчібіс Ольга Николаевна Боргоякова тимнеен. Аны Александра хомай нимес пазыбыстыр. Сағынчам, пу уғаа кирек марығ. Ол олғаннарны пос тілін ӱгренерге кӧӧктірче паза сӧбірелерге чахсы хабазығ пирче. Утып алған ахчаҷахха хызыҷах хынчатхан кип-азах алдыртып алған. Халған ахчаҷаан чыы тарт салған. Каникуллар пасталыбысса, хоратчаң сылтағ табылбас па?
Асхыстағы лицей-интернаттың ӱгренҷізі Максим Табаев сыйыхха ідӧк ууҷазынаң килген.
– Минің пархам орыс таа, хакас таа тілін матлама пілче. Утхан ахчаа ол гитара алып алған. Интернет пастыра аннаң ойнирға ӱгреніп алған паза алты майда, минің тӧреен кӱнімде, мағаа, аннаң ойнап, чахсы сыйых ит пирген. Ідӧк ахчаҷаана велосипед алдыртып алған. Асхыста ойлат чӧрерге хорғыстығ. Тӱрче полза каникулларға сығар, чайғызын піссер аалзар чуртирға килер. Ойлат чӧрерін чидікпин сахтапча, – чоохтапча Максим Табаевтің ууҷазы Ксения Павловна.
Пизінҷі класстағы ӱгренҷілер аразындағы тіл марии «Хакас тілін хайраллиры паза тилідері» хазна программазы хоостыра иртірілген. Аннаң устапча Хакасияның национальнай паза территориальнай политика министерствозы. Республикада хакас тілін 900 азыра олған ӱгренче, марығда аралазардаңар 140-ча сурыныc пічии кірген. Ол асхынах. Аннаңар Хакасия пазы Валентин Коноваловтың чахиинаң килчеткен чылда пасха даа муниципалитеттернің олғаннары пу марыға хозыларға киректер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы