ПОЛҒАН НА ЧУРТАҒҶАА – ХОРБЫ
19.05.2023
Хабарлар
Хорбы алып алған чуртағҷылар: Елизавета КАПСАРГИНА, Татьяна САГАЛАКОВА паза Татьяна АСТАШКИНА Иринанаң Георгий пархаларынаң хада
Чӧрім. Хакасияда «Пір кізее хорбы» чӧрім иртірілче. Пу неделяда пастағы хорбыларны Ағбанда ӱлееннер
Хорбылар ӱлирінҷе чӧрім иртірілердеңер Хакасия правительствозы, республиканың чир-чайаан ис-пайы паза экология министерствозы азынада искіргеннер. Чон аның пасталарын чидікпин сахтаан.
Сілкер айының 16-ҷы кӱнінде чӧрім пайрамни азылған. Социальнай сетьтердегі хабарлар ӧмелерінҷе Ағбан городтың ӱс паркында – Культура паза тынағ, Преображенскай паза Комсомольскай – 15.00 часта чуртағҷыларға аймах ағастарның хорбылары ӱлелерінеңер искіріг тараан. Кӧрілген тусха хайзы даа паркта чуртағҷылар узун тееске турыбысханнар. Хакасия пазы Валентин Коновалов, чӧрімнің пастағҷызы, ол син чуртағҷы экология чӧрімінде аралазарын сахтабаанға тӧӧй полған. Культура паза тынағ паркында чыылған чонзар айланып, ол экология чӧрімінің ӧӧн пӧгінін чарыт пирген.
– Республиканың полған на чуртағҷызы пір ағас таа одырт салза, чир-чайаанны хайраллирына чахсы хозым полар, – теен Валентин Олегович. – Аралазар кӧңніліг полған на кізіні пу чӧрімге хозыларға хығырчам. Хынған Хакасиябысты хада-пірге уламох истіг идіп аларбыс.
Чир-чайаан ис-пайы паза экология министрі Владимир Лебедев республика пазының сӧстеріне хозылған. Анаң олар чӧрім араласчыларынаң хада Культура паза тынағ паркындағы футбол чазызы паза машиналар турғысчаң орын аразында кизил хорбызын одырт салғаннар. Аның салаалары даа, пӱрлері дее хызыл ӧңніг полтыр. Наа ағастар Ағбанның Культура паза тынағ паркының пу чардығын пілдірте чазабызарлар. Пӱдіріг тоғыстары соонаң парктың пу саринда ағас халбаан нооза.
Паркта хорбылар ӱлеҷең пір ле палатка турған. Волонтерлар хорбыларны чуртағҷыларға пирерге тимде турғаннар. Теесте аймах частығ чуртағҷылар полған, кем-де прай сӧбіренең килген. Хонҷых школалардаң алынҷа класстар килгені харахха тасталған. Предприятиелер чӧрімде тиксі ӧменең араласчатханнар. Кем-де хараан хузух ағазына тастапчатхан, кем-де – яблоняа. Олардаң пасха тоо, ағас чистегі, вишня, ырғай, саңыс, мӱндӱргес паза пасха хорбылар полған. Че прайзына ла кирек хорбыны холға кирерге киліспеен.
– Мин Ағбан городтың Культура паза тынағ паркы хыринда чуртапчам, – чоохтапча Татьяна Сагалакова. – Дачабыс ирткен чылларда кӧйген, ам, аны нааҷылап, наа ағастар одыртчабыс.
Татьяна яблоня хорбызын холға кирген полза, ӧӧрезі Елизавета Капсаргина хузух ағазын алып алтыр.
Тынағдағы Татьяна Асташкина чӧрімде аралазарға Иринанаң Георгий пархаларын хығырып алған. Теесте 1,5 час турған соонаң оларға ӱзӧлеңе ӱс аймах хорбы пиргеннер: ағас чистегін, барбаристі паза кизилні. Татьяна Александровна алынҷа турада чуртапча. Наа ағазахтар садтағы пасха ағастарға хозыларлар.
Тиксі чӧрімге 13 муң хорбы кӧріл парған. Ағбанда 4 муң хорбы ӱлел парған, пасхазын республиканың читі муниципальнай пӱдізінде тарадарлар: Ағбан пилтірі, Асхыс, Боград, Пии, Таштып, Орджоникидзе паза Шира аймахтарында. Пу аймахтарның устағ-пастаа чӧрімге хозылған. Аймахтарда хорбылар хаҷан ӱлелері азынада искірілер.
Ӱндезіглерні искенде, чуртағҷыларға «Пір кізее хорбы» чӧрім, аның ӧӧн сағызы кӧңнілеріне кірген. Че кӧбізі хорбыларны ӱлирі читіре сағынылбаанына хайығ айландырған. Чахсы киректе аралазарға чаратхан чуртағҷыларның кӧңніне чонның, теессер кӧрбин, алнынзар кірчеткені, пір хорбы орнына нинҷені-де аларға харасчатханы, хорбыларны садығ туразындағы чіли талластырчатханы кірбеен. Ізенербіс, чӧрім, кибірге киріліп, мыннаң мындар хорбыларны тарадары чахсыландырылар.
Тиксі алза, Хакасия правительствозы республиканың чир-чайаанын чахсыландырарына улуғ хайығ айландырча. Арығ киині паза суғны хайраллирынҷа улуғ тоғыс апарылча, ол санда чылдаң чылға муңарлап гектарда ағас одыртып.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы