ЧАЙААЧЫ ТОҒЫСТАРЫНДА – ХАКАСИЯА ХЫНЫСТАРЫ
31.05.2023
Хабарлар
Марығ чиңісчізі Айана ЧИЛЬЧИГАШЕВА, Россияның Журналисттер пірігізінің республикадағы пӧлиинің кнезі Ольга ШИРКОВЕЦ,
марығ координаторы Светлана ГЕРАСИМЕНКО
Марығ. «Хакасия» газетаның редакциязында «Мин Хакасияа хынчам» марығның чиңісчілерін таныхтааннар
Марығ олғаннар аразында пизінҷі хати 5 номинацияҷа иртірілген. Пӱӱл анда республикабыстың аймах пулуңнарынаң 200-ке чағын пала араласхан. Оларның кӧбізі Саяногорсктаң. Араласчылар аразында олған садынзар чӧрчеткеннер, школалар ӱгренҷілері паза Саяногорсктағы олған туразының чуртағҷылары полғаннар. Олар тӧреен чир-суубысха хыныстарын видеоролик, хоостар паза сомнар хоостыра искіргеннер.
Чарғыҷыларға чиңісчілерні адирға сидік полған. Аның ӱчӱн 20 чиңісчінің орнына 40 кізі табылған. Оларның кӧбізі сыйыхтасха килген. Піреезі ӱгретчізінең хада полған, піреезі – туған-чағыннарынаң.
– Кӧбізі пістің марығда пастағызын на араласты. Пӱӱл «Мин Хакасияа хынчам» марығда кӧп пала араласханы ӧріндірче. Ӧӧні – уғаа кӧп чайаачы олған. Тоғыстар уғаа чапсых полғаннар. Палалар паза ӱгретчілері дее уғаа кӱстенгеннер. Ӱгретчілерге паза іҷе-пабаларға олғаннарнаң айғасчатханнары ӱчӱн алғыс. Кічіг чир-суубысты хоостирға оой нимес тіп санапчам. Олғаннарға чайаан хоостары, чоохтаан кибелістері хоостыра Хакасияа хыныстарын читір пирерге кирек полған нооза.
Пластилин кізілерні тірілдіріп, мультфильм суурылғанына чапсыпчам. Мультфильмнер суурҷаң студия пар, хайзында олғаннар уғаа пӧзік синде хакас чонның нымахтары хоостыра мультфильмнер тимнепчелер.
Сыйыхтар аларға килгеннерің ӱчӱн прайзына алғыс! – теен Россияның Журналисттер пірігізінің Хакасиядағы пӧлиинің кнезі Ольга Ширковец.
Саяногорсктағы реабилитация кінінде имненчеткен палалар, городтағы чайаачы олғаннар кініндегі «Ноған пулуттар» анимация студиязының паза Саяногорсктағы 7№ лицей ӱгренҷілері, марығда ідӧк ӧткін аралазып, сыйыхтығ орыннар алғаннар.
«Хакасияның тархыны» номинацияда Саяногорсктағы реабилитация кінінең Кристина Горшкова, Пиидегі школаның ӱгренҷізі Илья Субботин ӱзінҷі орынға турысханнар, ікінҷі орынға – Саяногорсктағы реабилитация кінінең Дмитрий Поломошнов, Саяногорсктағы 7 № лицей ӱгренҷізі София Мельникова, Саяногорсктағы «Малыш» олған садынзар чӧрчеткен Айана Чильчигашева, пастағы орынға – Пиидегі школаның ӱгренҷізі София Мигулина, Хубачардағы школаның ӱгренҷізі Ольга Грачёва, Ағбандағы 1 № школаның ӱгренҷізі Кристина Коченова, Саяногорсктағы 6 № школаның ӱгренҷізі София Колмагорова.
«Хакасияның кізілері» номинацияда араласчылар амғы тустағы матырлардаңар искіргеннер, хайзы чаа ветераны полча алай пістің республика тилізіне улуғ хозым итче. Кӧзідімге, Ағбандағы 18№ школаның 3-ҷі класс ӱгренҷізі Тимофей Коломиец видеороликте шахматча тренерінеңер пас пирген. Ағбандағы гимназияның ӱгренҷізі Ольга Мирошниченко ағазының туңмазынаңар видеоролик пастыра искір пирген, хайзы Илбек Ада чаа араласчызы. Хызыҷах нинҷе-де номинацияда араласхан. Ол, видеороликтең пасха, ідӧк сомнар мариинда узын сынаан.
Олар пу номинацияның чиңісчілері полыбысханнар.
«Хакасияның чир-чайааны» номинацияда иң кӧп пала араласхан. Анда 10 чиңісчі адалған. Ӱзінҷі орын алғаннарның санында полғаннар: Ағбандағы «Фонарик» олған садынзар чӧрчеткен Таисия Мощевикина, Саяногорсктағы реабилитация кінінең Глеб Лобода. Ікінҷі орын пирілген: Ымай посёлоктағы Наташа Баталоваа, Таштып аалдағы «Рябинушка» олған садынаң Кирилл Шулбаевке, Саяногорсктағы чайаачы олғаннар кініндегі «Ноған пулуттар» студияа.
– Пу марығда пастағызын на араластыбыс. Пістің студиядаң 10 араласчы полған. Олғаннар «Хакасияның чир-чайааны» номинацияда аралазарға таллап алғаннар. Олар Хакасияның аң-хустарын істескеннер. Мультфильм тимнеп салғабыс, – теен студияның тӧстегҷізі Александра Бедристова.
Саяногорсктағы чайаачы олғаннар кінінің «Тигір хуры» хоос студиязының араласчызы Алина Корманға пастағы орын пирілген.
«Хакасиядағы туризм» номинацияда 9 чиңісчі полған. Оларның санында «Торғайах» олған туразынаң Лидия, Саяногорсктағы чайаачы олғаннар кінінең Юлия Щербакова, Ымай посёлоктағы «Фонарик» олған садынаң Владимир Пекло.
Ымай посёлоктағы «Малыш» олған садынзар чӧрчеткен Айана Чильчигашева сыйыхтасха ууҷазы Наталья Ивановнанаң хада килген.
– Мин Асхыстаң килгем. Пархам алты частығ. Ол Ымай посёлокта чуртапча. Піс «Хакасияның тархыны» номинацияда араласхабыс. Хакас чонның ас-тамаан тимнирінеңер ролик тимнеебіс. Роликте хайди талған тимнирінеңер паза потхы пызырарынаңар кӧзіт пиргебіс. Ідӧк Айана хакас тілінең кибелісті кӧрбин хығыр пирген. Анаң хакас чонның кибірлерінеңер чоохтап пиргебіс. Піс Айананаң хада хакас кип-азаан кис салғабыс. Ол роликті олған садына пиргебіс. Роликті хада хонғаным Иван Дмитриевичнең ибде суурғабыс. Піс хакас чонның кибірлерін хайраллап халар паза сабландырар ӱчӱн мындағ ролик тимнеебіс.
Пархам пӱӱн мині хакас кӧгенеен кис килерге чӧптеен. Ол хакас кип-азаан кис чӧрерге хынча. Іҷезі орыс таа полза, аның худы хакас чонни. Ибде пос ас-тамаан тимнепчебіс. Пархаларыбыс чоныбыстың кибірін пілзіннер тіп сағынчабыс, аннаңар оларға хакас кибірлерінеңер чоохтапчабыс паза ас-тамах пызырчабыс, – сағызынаң ӱлескен Наталья Ивановна Чильчигашева.
Прай чиңісчілерге дипломнар паза сыйыхтар читіріл парғанда, олғаннар сомға суурынғаннар.
Сомнар Дина карамчаковани
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде