Право пирче, нандырығлығ поларға сизіндірче
27.12.2023
Статья
Полина Куюкова, Ульяна Сагалакова паза Софья Бельчик Хакасия пазы Валентин Коноваловтың холынаң паспорт алғаннар
Танығлығ кӱн. Хакасия правительствозы туразында 14 час толдыр салған ӱгренҷілерге паспорттар читіргеннер
Хакасия правительствозының туразынзар республиканың полған на муниципальнай пӱдізінең ікілер ӱгренҷі хығыртылған. Олар прайзы ӱгредігде, наукада, спортта, чайаачы тоғыста паза пасха даа кӧстеглерде пӧзік чидіглерге читкеннер. Таштып аймаанаң Полина Куюкованаң Софья Бельчик килгеннер. Хызыҷахтар Мадыр паза Таштып аалларда чуртапчалар, 8-ҷі класста ӱгренчелер.
Полина – чайаачы хызыҷах, Софья – спортсмен. Мадырдағы хызыҷах, чахсы ӱгренерінең пасха, ідӧк шор культуразын тилідер кирекнең айғасча.
– Пістің аалда шорлар, хакастар паза орыстар кӧп чуртапча. Ӱс община пар. Минің іҷем дее, пабам даа шорлар. Оларның улуғлары Тағлығ Шориядаң сыхханнар.
Піс чайаачы ӧменең Таштып аймаанҷа, республикабысча концерттернең удаа чӧрчебіс, теелбек салчабыс, сарыннар толдырчабыс. Пасха сӧснең чоохтаза, аймах чонны шор культуразынаң таныстырчабыс. Ідӧк мағаа Таштыпсар удаа чӧрерге килісче. Анда кибелістер хығырчабыс, – чоохтапча Полина.
Софья Бельчик спорт киреенде сабланча. Хызыҷах волейбол, баскетбол секцияларына чӧрче. Школадағы марығлар ол чох иртпинчелер.
Хакасия правительствозы туразында чыылған олғаннарзар Хакасия пазы Валентин Коновалов айланған:
– Паспорттар алғаны сірер чуртастың наа чардығынзар кірчеткенін таныхтапча. Ол сірерге кӧп право пирчеткенінең пасха, ідӧк нандырығлығ поларға сизіндірче. Амды полған на хаалағ ӱчӱн постарың нандырығлығ поларзар, анзын ундутпаңар. Мин сірерге орта чол таллап аларға паза анҷа ізестіг парарға алғапчам. Наа чидіглерге чидерге кӱстеніңер!
Асхыстаң килген Ульяна Сагалакова паспортты Хакасия пазының холынаң алғанына прайзынаң артых ӧрін парғанға тӧӧй полған.
– Уғаа чӱрексіністіг пілдірген. Амға теере регион устағҷызын телевизор, телефон экраннарында ла кӧрген полғам. Амды мин аны пос хараамнаң кӧріп алдым, Наа чылға удур сағынған сағызым толды. Аның ӱні хатығ полар тіп сағынғам, че ол амыр паза сіліг ӱнніг полтыр. Аның хылии даа мағаа нымзах пілдір парған, – кӧңнін чазырбинчатхан Ульяна.
Хакасияның чайаачы олғаннарына паспорттар «Мы – граждане России!» тиксі Россия чӧрімі хоостыра читірілген.
Сом Альбина Чистогашевани
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы