Кӧп ниме иділген, че алнында аннаңох артых пӧгіннер
12.01.2024
Хабарлар
Ӱгретчі Тамара Побызакова «Трудовая доблесть Хакасии» медальға турысхан
Салтарлар. Ағбанда «Нымах» кӧклӧ театрында 2023 чылда чарлалған Ӱгретчі паза ӱгредіг кӧстегҷізі чылында апарылған тоғыстың салтарларын иткеннер
Ӱгретчі паза ӱгредіг кӧстегҷізі чылы чарлалғанда, республикада ағаа чарыдылып иртірілер мероприятиелер планы алылған. Олар Хакасияның халых чуртазының прай даа сариларына теелгеннер. Пу тоғысты кӧп ведомство паза министерство апарған. Прайзы хада-пірге ӧткін тоғынған сылтаанда 2023 чыл чапсых паза танығлығ киректерге пай полған.
Салтарлар идеріне чарыдылған пайрамға республика аймахтарының паза городтарының ӱгредіг устаныстары, школалар тоғынҷылары, ортын ӱгредіг учреждениелерінің специалисттері, спорт, олған искусство школаларының ӱгретчілері паза пасхазы даа чыылысханнар.
Пастағы сӧс Хакасия пазының орынҷызы Михаил Побызаковха пирілген. Ол ӱгредіг паза наука, культура, физическай культура паза спорт министерстволары мероприятиелерні иртірерінҷе хазна синінде турғызылған пӧгіннерні прай толдырыбысханнар тіп таныхтаан. Ідӧк ол нацпроекттерде араласханы тилир оңдайлар пирчеткенінеңер чоохтаан – наа школалар, спортнаң айғазар кіннер, культура паза имнег туралары пӱдірілче, тиксі тыхтағ тоғыстары апарылча. «Ӱгретчі паза ӱгредіг кӧстегҷізі чылында кӧп хайығ ӱгредіг кирее тоғынҷыларына айландырылған. Оларға хоза тӧлеглер пирілген, аалларзар тоғынарға килгеннерге чурт алылған», – теен ол. Михаил Анатольевич прай пу полызығларны пирер программалар мыннаң мындар тоғыстарын узарадарлар тіп ізендірген. Чооғын тоозып, ол позының паза Валентин Коноваловтың адынаң ӱгретчілерні матлама тоғыстары, улуғ пілістері, пӧзік устары ӱчӱн алғыстаан.
Алғыстас сӧстері соонаң иң турыстығ тоғынҷыларны таныхтааннар. «Трудовая доблесть Хакасии» медаль Асхыс аймааның Калининдегі ортымах школаның ӱгретчізі Тамара Побызаковаа паза Ағбандағы ӱгредіг устанызы пастығының орынҷызы Галина Озероваа пирілген.
Тамара Побызакова англия тілі ӱгретчізі полып тоғынча. Ӱгредіг киреенде ол 40 чыл азыра істен парир, оларның 25-ін – Калининдегі школада. Уроктарын 6 –11 класстарда апарча, нинҷе чыл тоғынғам, олох син тус класс устағҷызы полғам, халғанҷы чылда ла класс албаам тіп чоохтапча ол. «Кӧп чыл кӱстеніп тоғынғанымны таныхтааннары ӱчӱн республика ӱлгӱлеріне алғызым читірчем. Уғаа ӧріністіг паза поғдархастығ мындағ пӧзік паалағ аларға. Тоғызымның салтарларын олғаннарымнаң, оларның пілістерінең кӧрерге чарир. Ӱгренҷілерім чылдаң олимпиадаларда чиңіс тутчалар паза сыйыхтығ орыннар алчалар», – ӱлескен сағыстарынаң Тамара Семёновна.
«Хакасияның физическай культуразының паза спортының саблығ тоғынҷызы» ат Ағбан пилтіріндегі спорт школазының тренері Александр Кретовха, «Хакасияның ӱгредіг киреенің саблығ тоғынҷызы» ат Асхыс аймааның ӱгредіг устанызының пастығы Ирина Кучугешеваа читірілген. Ідӧк пайрамда ӱгретчілерге, кӧстегҷілерге республика правительствозының Аарластығ паза алғыстас пічіктері пирілген.
Хакасияның Ӧӧркі Чӧбі адынаң чыылысханнарны аның кнезінің пастағы орынҷызы, республиканың Улуғлар чӧбінің кнезі Пётр Воронин алғыстаан. Ол ідӧк иң артых тоғынҷыларға Ӧӧркі Чӧптің Аарластығ паза алғыстас пічіктерін читірген. Паза ол хакас культуразын хайраллирына паза тилідеріне улуғ хозым итчеткені, чииттернең чарыдығлығ тоғыс апарчатханы ӱчӱн Хакасияның Улуғлар чӧбінің «Чахсы киректер ӱчӱн» орденінең культура министрінің орынҷызы Лариса Киштееваны таныхтаан. Лариса Юрьевна Хакасия искусстволарының саблығ деятельі, культурологияның кандидады, республиканың паза Россияның композиторлар пірігізінің кізізі полча. Аның 90 азыра наука тоғызы чарых кӧрген, ідӧк ол чайаачы тоғыстар пасча.
Ӱгретчі паза ӱгредіг кӧстегҷізі чылында ӧӧн тоғысты Хакасияның ӱгредіг паза наука министерствозы апарған. Ӱгредіг паза наука министрінің тоғызын толдырчатхан Анатолий Бутенко аның салтарларынаңар поғдархаснаң искірген. Поғдархаҷаң ниме пар. 2023 чылда ӱгредіг киреене кӧп наа ниме кирілген – ол пірге ӱгредіг орны, школа директорларының ӱгредігліг тоғыс апарарынҷа чӧпчілерні киргені, олған садтарынзар паза пасталығ класстарзар «Орлята России» чӧрім килгені паза даа пасхазы. Ортын ӱгредігде ӧӧн чидіг – «Профессионалитет» программаа кіргені. Анзы пасталығ класстар ӱгретчілері чидіспинчеткенінең палғалыстығ сурығны пӧгерге полызар тіп ізенізінең ӱлескен Анатолий Алексеевич. Ӱгретчілер дее, ӱгренҷілері дее Россия синінде иртірілчеткен аймах мероприятиелерде, марығларда, проекттерде ӧткін араласханнар паза араласчалар. Оларда чиңістер тудып, республика адын пӧзік кӧдірчелер.
Ирткен чыл Хакасияның культура, физическай культура паза спорт министерстволарына ідӧк танығлығ полған. Оларның устағҷылары, чыылысханнарның алнында чоох тудып, ідӧк чидіглерінеңер искіргеннер, алғыстас сӧстерін читіргеннер. Культура министрінің тоғызын толдырчатхан Светлана Окольникова 2023 чылда Хакасияның искусстволар колледжі азылғаннаңар чоохтаан. Андар ирткен чылда наа ӱгредіг чылына пастағы 76 студент алылған. «Культура» нацпроектче кӧп ниме иділ парған, кӧзідімге, ирткен чылда 11 музыка школазы тиксі тыхтал парған. Чайаачы олғаннар чоннар аразында, Россия синінде постарын чахсы кӧзітчелер тіп чоохтаан Светлана Анатольевна.
Пайрамда прай пу чидіглер республиканың ӱгредіг, культура, спорт организациялары тоғынҷыларының матлама тоғызының салтары тіп таныхталған. Аннаңар ікінҷілес чох чоохтирға чарир: республикабыстың ӧӧн ис-пайы – аның чоны.
Сом Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы