Полған на кiзiнiң сӧбiрезi часкалығ ползын
02.02.2024
Хабарлар
Хакасиязар сӧбіре одын Тимур паза Татьяна Сяткиннер ағыл килгеннер
Танығлығ кирек. Пӱӱн Хакасияда Сӧбiре чылы пайрамни азылча. Пу кӱннерде, тiзең, республикада Сӧбiре чылының «Россия чӱрее» тиксi хазнаның одын удурлааннар
Пу 2024 чылны Россия президентi Владимир Путин Сӧбiре чылы тiп чарлабысхан. Хазнада сӧбiрелернiң чуртазына улуғ хайығ салылча, палаларға аймах хабазығлар пирiлче. Пӱӱл, тiзең, сӧбiрелернiң кирексiнiстерi хоостыра тоғыстар уламох чахсы апарыларлар паза пик хыныстығ, турыстығ сӧбiрелернi чеестеп турарлар.
19 – 23 январьда ВДНХ-да «Россия» чоннар аразындағы кӧзiдiг площадказында иртiрiлген «Родные – Любимые» форум чабылғанда, сӧбiре оды тамызылған. Хазна президентi Владимир Путин, Сӧбiре чылын пайрамни азып, «Россия чӱрее» сӧбiре одын тамысхан. Анаң аны 12 лампадада сигiс федеральнай округча паза тӧрт наа регионҷа таратханнар. Хакасиязар тамызылған отты Кемеров облазынаң Ағбан пилтiрiнде чуртапчатхан Тимур паза Татьяна Сяткиннер ағылғаннар. Олар 2023 чылның 12 августында Ағбанда хоных хонған 1000-ҷы ирепчi пол парғаннар. Тимур паза Татьяна – чиит, халых чуртаста ӧткiн тудыныстығ паза чайаачы чииттер. Ирепчi iкiзi дее пӧзiк ӱгредiг алған. Сӧбiре пазы Тимур «СУЭК-Хакасия» ООО-да мастер полып iстенче, Татьяна программист полча. Чиит сӧбiре iдӧк cпортнаң айғасча, пос тус полза, саналығ чыларға хынып чӧрче.
– «Россия чӱрее» отты республиказар пiстiң сӧбiрее ағыларға чоохтааннар, пiс андағ киректе аралазарын сағыбаан полғабыс. Анзын пiс сӧбiребiс пик паза часкалығ полар таныға санаабыс. Ирепчiнiң чуртазында ӧӧнi пiлiзiп, ынағлазып чуртиры полча, – таныхтааннар Тимур паза Татьяна.
Чоохтирға кирек, Москвада иртiрiлген «Родные – Любимые» тиксi Россия синiндегi форумда Карачаковтар – Челтыгмашевтер сӧбiрезiнiң ӱс тӧлi араласхан. Олар кӧп палалығлар паза тӧлдең тӧлге ӱгретчi чолынҷа парып iстенчелер.
– Пiстiң сӧбiреде ӱгретчi чолынҷа парчатхан илееде кiзi, тиксi 675 чыл ол тоғысха пир салғабыс. Кӱстенгенiбiс ӱгренҷiлерiбiсте тарап одырча.
Чыл пасталғанда, мындағ хайхастығ чорыхха чӧр килгенiне ӧрiнчебiс. Ағаа ӧнетiн тимненмеен полғабыс, кинетiн искiргеннер. Москвада «Россия» кӧзiдiгде аралазарға пiстiң ӱс тӧл чӧрген: улуғлар, сағам тынағдалар, анаң iстенчеткен тӧл паза оларның палалары. Мероприятиеде пiс кӱрген айының 19-ҷы кӱнiнең 23-ҷi кӱнiне теере араласхабыс. Кӱстiг хазна пик сӧбiредең пасталча, аннаңар тиктең нимес Россияда Сӧбiре чылы iкiнҷiзiн чарлалча.
Кӧзiдiгде тиксi 89 павильон полған. Полған на регион позының чидiглерiнең таныстырған, пiстiң сӧбiре Хакасияның павильонында кӧзiдiг иртiрген. Хайдағ кибiрлер пар, хайди чаламалар палғирға, хайдағ сағыстар сағынарға паза тайығлар тузында хайди орта сурынарға чоохтаабыс. Чир-суубыста хайдағ хайхастығ паза чапсых чирлер парын прай кӧзiткебiс. Мастер-класстарда араласхабыс паза постарыбыс иртiргебiс. Iдӧк Москваҷа экскурсияларға чӧрерге маңнанғабыс, Хызыл площадьсар кiчiглерiн апарғабыс, наа чыл ӱлӱкӱннерiне ол уғаа ӧкер чазал партыр, нымахтағы ла чiли чарыпча.
Пiстiң правительстваа улуғ алғызым читiрчем, сӧбiрелерге хабасчатхан, чуртас синiн чахсыландырчатхан, кӧп палалығларға чахсы хайығ салчатхан ӱчӱн. Iдӧк пiстiң сӧбiре адынаң мындағ чапсых чорыхха пар килерге оңдай пиргенiне улуғ алғызым читiрчем. Кӧзiдiге тиктең не чӧрбеебiс, позыбысха чахсы опыт алынғабыс. Мындағ чорыхтарға чӧрзе, кiзiнiң сағыс-пілізі алғыдылча. Пiстiң сӧбiре пасха чоннар аразында республиканы турыстығ кӧзiдерге кӱстенген, – чоохтаан Нина Челтыгмашева.
С.П.Кадышевтiң адынаң чон чайаачызы кiнiнде «Россия чӱрее» тиксi Россияның одын удурлааннарның санында Хакасияның iстенiс паза социальнай арачыланыс министрi Татьяна Раменская полған.
– Прай чуртағҷыларны мындағ танығлығ кирекнең алғыстапчам. Пiстiң республиканың iкi сӧбiрезi тиксi Россия синiндегi Сӧбiре чылынаң палғалыстығ мероприятиеде аралас килген. Ол Карачаковтар – Челтыгмашевтер ӱгретчiлер династиязы паза чиит ирепчi Тимур паза Татьяна Сяткиннер. Пiстiң чир-суубыста андағ турыстығ сӧбiрелер пары ӧрiндiрче.
Амды сӧбiре оды С.П.Кадышевтiң адынаң чон чайаачызы кiнiнде турча. Ол пӱӱн, 2 февральда, Хакасияда Сӧбiре чылы пайрамни азылған соонаң Преображенскай тигiрибзер пирiл парар. Анда республиканың полған на чуртағҷызы, андар килiп, сӧбiрезiне талаан, часка сурынып, сӧбiре одынаң свечi тамызып, тигiрибде турғыс полар, – чоохтаан Татьяна Раменская.
Iдӧк пу кӱннерде Хакасия правительствозы туразында республика пазы Валентин Коновалов Тимур паза Татьяна Сяткиннернең тоғасхан. Тоғазығ тузында чиит ирепчі хоных хонғаннаңар паза сӧбiре оды соонҷа Кузбассар чӧргеннерiнеңер чоохтааннар. Сяткиннернiң хоныхтары ирткен чылның орғах айында пiчiкке алылған, че олар хаҷаннаңох сығара хадалар. Сӧбiре тӧстиріне олар чахсы сағынып паза уғаа нандырығлығ хайғаннар. Анзы ирепчi пiлiзiсчеткенін паза пик хоных поларын киречiлепче.
Хакасия пазы Валентин Коновалов чиит ирепчее андағ танығлығ мероприятиеде республиканы турыстығ кӧзiткен ӱчӱн алғызын читiрген. Пасхазына кӧзiдiм полып, сӧбiре чуртазын сабландырып, Тимурнаң Татьянаа, узах час чазап, ынағлазып, часкалығ чуртирға алғаан.
Сом Дмитрий Сунчугашевти
Автор :
Наталья Тюкпеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде