Чуртасха наа ниме кирзе, чӱрекке истiг
02.02.2024
Хабарлар
Виктория Тоскоракова
Кізі паза аның тоғызы. Виктория Тоскоракова Таштып аймааның олған чайаачызы кiнiнде 8 чыл iстен парир. Пу тусха ол палаларнаң пик палғалыстығ пол парған. Олғаннар андар хынып чӧрчелер
Пу кӱннерде Виктория Юрьевнаның пір ӱгренҷiзі Ульяна Боргоякова республика синiндегi «Отечество: история, природа, культура, этнос» тиксi Россияҷа иртiрiлчеткен марығда «Летопись родного края» номинацияда 2-ҷi орын алып алған. Iкінҷi ӱгренҷiзi Таина Кидиекова, тiзең, «Увлекательный мир книги писателей Хакасии» республика синiндегi марығда 1-ғы орынға турысхан. Олох марығда Виктория Тоскоракованың пасха олғаннары, ӧмеде пис пала, хакас произведениелерiнҷе турғызылчатхан ойыннар номинациязында 2-ҷi орын алып алтырлар. Таштыптағылар «Любопытный зайчонок» ойын кӧзiттiрлер.
Виктория Юрьевна ӱлесче:
– Олғаннарнаң мин тиңе чоохтазарға ӱгрен парғам, улуғ кiзiлернең чiли. Аннаңар пiс пiр тiл чапчаң таап алчабыс, iди ынағлазарға ниик. Мин 3 кӧстегҷе тоғынчам – хоос, техническай, социально-гуманитарнай. «Лабиринты творчества», «Искусство декламации», «Паперкрафт», «Конструирование» кружоктарны, кӧклӧлер театрын апарчам паза Таштыптағы 2-ҷi школада «финансовая грамотность» занятиелер иртiрчем, iдӧк школаа тимненчеткен класста палаҷахтарны хакас тiлiне ӱгретчем, ол классар аймах-пасха национальностьтығ олғаннар чӧрче.
– Постарыңнаңар чоохтап пирерҷiксер бе?
– Мин Асхыс аймаандағы Калинин аалдағы ортымах школаны тоосхан соонаң Сойан-Алтай тюркология институдынзар кiрiп алғам. Хакас тiлi, литература паза тархын ӱгретчiзiнiң специальнозын алғам. Диплом алып алғанда, мин Оңхактағы культура туразында пис чыл ДПИ устағҷызы полып тоғынғам, анаң Таштыпсар килiбiскем. Пабам Ӧлең чазыдаң, iҷем Пыдырахтаң, аннаңар мин мында пасхаланминчам. Сигiс чыл мының алнында Таштып аймааның олған чайаачызы кiнiнзер килгем, минi тоғысха алып алғаннар. Сынында, пiр дее сағынмаҷаңмын, минiң тоғызым олғаннар чайаачызынаң палғалыстығ полар тiп, че чуртас чолы iди салыл парған, палаларнаң тоғынарға кӧместең кӧнiк парғам.
Марығларға пiс иң хыйғаҷах, чайаачы палаларны таллап алчабыс, оларны тимнепчебiс. Пiр хызыҷах Екатерина Ощепкова «Технотворчество-2019» марығ-кӧзiдiгде 2-ҷi орын алып алған. 2020 чылда тиксi Россия синіндегі «Неотерра» креатив проекттерiнiң мариинда чиңiсчiлер санына кiр парған. Проекттер арачылаҷаң конференция чуғынҷах ағырығ ӱчӱн онлайн ирткен, анда аймах-пасха регионнарның ӱгренҷiлерi, чииттерi араласханы хайхатхан. Полған на араласчы позының чир-сууның сiлиин кӧзiт пирерге сiренген. Салтарында Екатерина 2-ҷi орын алып алған. Олох хызыҷахнаң пiс Таштып суғ хазын чахсыландырҷаң проект сағынып алғабыс, макет тимнеебiс. Сағыстарыбыснаң аал пазы Рустам Салимовнаң ӱлескебiс. Ам ол орынны иптебiскеннер, тынанҷаң, ойнаҷаң ачых пӱдiр салғаннар. Че аны пiстiң не проект хоостыра нимес иткеннер, пасха даа чайаачы сағыстар хозылған.
Ниме чайиры минің кӧңнiме тың кiрче. Ползын ол наа ойын, чаҷыннаң, нинҷідең, хайдағ-да пасха материалдаң идiлген ниме алай проект. Чуртасха наа нименi киргенi кiзiнiң хылиин алыстырча, чайаачызын тилiтче. Тоғыс хоостыра минiң андағ оңдай пар тiп ӧрiнчем, че посха кӧп ӱгренерге кирек полча.
Сом авторни
Автор :
Тарина Бутонаева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы