Ыраххы аалдаң хайди сығып аларға?
14.02.2024
Хабарлар
Сурғазар – нандырчабыс. «Хакас чирi» газета редакциязынзар хығырығҷыбыс Фёдор Сазанаковтың айланызы читкен. Ағаа ӱндезiг пирчебiс
«Аарлығ редакция тоғынҷылары! Сiрерзер улуғ сурыныснаң айланча Улуғ Арбыт аалның иргi чуртағҷызы Фёдор Григорьевич Сазанаков.
Мин пу аалда тӧреем-ӧскем, олған тузым мындох прай ирт парған. Пу аал уғаа сiлiг чирде орныхча, кем полбаан, пар килерге чӧптепчем, пiр дее хомзынмассар. Мындағы кӱлӱк чон пос хониинаң на чуртапча, тоғынча. Хости ааллардағы леспромхоз, совхоз иңзерiл тее парған тирге чарир. Мының алнында чиит тузымда позым даа совзоз-леспромхозта тоғынғам. Ам олар чоғыллар. Ам посха ла iзенерге кирек.
Амды Ағбанда чуртапчам. Улуғ Арбыт аалда школа, садығ туразы пар. Школа 4 классха читiре, анаң олғаннар хонҷых аалларзар ӱгренерге чӧрчелер. Пiстiң тузыбыста андағох полған.
Мағаа мындағ сурығ ай-тыс пирбинче. Искем, Улуғ Арбыт аалзар автобус чӧрбинчеткеннеңер. Мының алнында хомай чолға сылтанҷаңнар, ам чи ниме андағ нимес. Аалымзар чӧрiп, пос хараанаң кӧрiп алдым: чолны прай иптеп салтырлар, ол чалбах, сайнаң прай тиңни ур салтырлар, оймахтар даа чоғыл. Ағбан – Кiчiг Арбыт автобус неделяда пір-ікі хати чӧрче. Че пу автобус Улуғ Арбыт аалға чит полбинча. Аннаңар полыс пирерге сурынчабыс. Пу пічікті Улуғ Арбыт аал чуртағҷылары адынаң пасчам. Аалдағы чон чазағ чӧрерге тың ирееленче. Пу iкi аал аразы пис километр. Абаза городсар, Таштып аалзар пар килерге уғаа сидiк. Аннаңар полыс пирзеңер, уғаа ӧрiнерҷiкпiс, алғызыбыс читiрерҷiкпiс.
Улуғласнаң Фёдор Григорьевич».
Аарлығ хығырығҷыбыс Фёдор Григорьевич, редакция хабарҷызы сірернің сурынызыңар хоостыра, Таштыптағы автотранспорт предприятиезінiң устағҷызы Виктор Николаевич Азараковсар айланып, пiлiп алған. Муниципальнай маршрутча чӧрчеткен «ГАЗель» Улуғ Арбытсар Таштыптаң неделяда ӱс хати чӧрче – понедельникте, средада, пятницада. Ол кӱннерде автобус 6.50 часта Улуғ Арбыттаң, обед тузында 11.45 часта, тiзең, Таштыптаң сыхча. Ағбаннаң чӧрчеткен автобус сынап таа Улуғ Арбытха читпинче, городтаң 7.20, 11.45, 14.20 частарда сығып, ол Кiчiг Арбыт аалға ла теере чӧрче.
Пу чыл наа «ГАЗельлер» чӧр сыхханнар, аның алнындағы иргi «ПАЗиктер» удаа сайбал парҷаңнар, аннаңар рейске сых полбаҷаңнар, неке. Амды, iзенчебiс, Таштыптаң чӧрчеткен автобус хайди даа аал чуртағҷыларының кирексiнiстерiне нандырар.
Фёдор Григорьевич, сiрерге алғызыбыс читірчебіс айланған паза чир-суғҷыларыңнаңар сағыссырапчатхан ӱчӱн.
Сом Интернеттең алылған
Автор :
Тимнеен Тарина Бутонаева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде