«Культура» нацпроектче нааҷылалғаннар
28.02.2024
Хабарлар
Боградтағы олған искусство школазы «Культура» нацпроектче тиксі тыхталған соонаң хатап азылды
Тоғыс чорығы. Хакасия пазы Валентин Коновалов Боград аймаанзар тоғыс чорығынаң чӧрген. Анда тиксі тыхтағ тоғыстары соонаң ікі хоза ӱгредіг учреждениезі ізиин хатап асты
Знаменка аал
Аалдағы олған музыка школазында палаларны фортепианонаң, баяннаң, трубанаң, гитаранаң ойнирға ӱгретчелер. Халғанҷызы оолах-хызыҷахтарның иң хынған кӧг тирии полча. Аннаң ойнирға ӱгреніп аларға кӧп пала хынадыр. Андар ортымахти 60 пала ӱгренерге чӧрче. Школа чылығ, чарых паза истіг. Итсе-де, ол андағ ла полбаан. Ирткен чылларда аның стенелері хазартылых, ізіктері нинҷе-нинҷе хати сырлалых полғаннар. Ідӧк мебель сыбыра оодылҷаң. Фортепиано ӱгретчізі Ольга Келембет сағысха кирче:
– Одырчыхтарнаң тузаланарға чочыныстығ полған. Аны пасха орынзар хаап паритчатсаң, аның чардығы тӱс парарынаң хорғыстығ полҷаң. Анда позығ даа хазаҷаң орын халбаан полған. Школа, наа парталар алып алғанда, иргілерін піске пирібіскен. Музыка школазының стенелері хаҷанох іріктеп пастабысханнар. Стенелер паза кӧзенектер аразында хусхаҷахтар, уйа салынып, падастар чарылдырып алчатханнар.
Знаменкадағы музыка школазына «Культура» национальнай проектке кірерге оң полған. Аны хоостыра анда тиксі тыхтағ толдырыл парған. Ол пӱкӱлее чылығлалған, сырлалған, анда чарытхы системазы алыстырылған паза даа пасха тоғыстар толдырылғаннар паза ол-пу мебель алылған.
Знаменкадағы ортымах школада 200-ке чағын олған ӱгренче. «Ӱгредіг» нацпроект полызиинаң анда спорт секциялары, аймах кружоктар иртірілчелер. Аннаңар ӱгренҷілер уроктар соонаң, ибзер парбин, андох хоза ӱгредіг алчалар.
– Ирткен чылларда аалда музыканаң на айғазар оңдай полған, секция-кружоктар апарылбааннар, аннаңар піссер кӧп олған чӧрген. Амды ӱгренҷілерге хынған кирекнең айғазар прай оңдайлар пар – таллирға чарир. Анзы уғаа чахсы тіп санапчам. Пістің аалдағы палалар баскетбол, волейбол секцияларына чӧрерге хынчалар, – чоохтапча чиит специалист.
Музыка школазы нааҷылал парғанда, анда олғаннарға даа ӱгренерге, ӱгретчілерге дее тоғынарға истіг. Пір ле ниме оларның кӧңнілерін тӱзірче.
– Амды олғаннарның прай чуртазы телефонда, аннаңар оларны музыкаа кӧніктіріп аларға оой ла нимес. Пістің школада кӧг тиріглері нааҷылалған полза, уғаа чахсы поларҷых. Пістің фортепианолар уғаа иргі, оларға 30 – 40 чыл полар, неке. Удаа сайбал парчалар. Тыхтағ тоғыстары тузында оларны аар-пеер чылдырған паза школада сыхтығ полған сылтаанда олар улам уйан тоғын сыхханнар,– чооғын узаратча Ольга Юрьевна.
Музыкаа ӱгредерінең пасха, школада ідӧк декоративно-прикладной искусстваа ӱгретчелер. Улуғ пастыхтар школаны тыхтағ тоғыстары соонаң кӧрерге килгеннерінде, оларға мастер-класс иртірілген. Хакасия пазы Валентин Коновалов паза культура министрінің тоғызын толдырчатхан Cветлана Окольникова макраме палғап кӧргеннер. Чіптернең хайди тоғынарға, хайди палғирға школаның ӱгретчізі Инга Афанасьева кӧзіткен. Оларға кӧмес аар пілдірчеткенге тӧӧй полған.
Боград аал
Пу аалда ідӧк «Культура» нацпроект хоостыра олған искусство школазы азылған. Аның тархыны Илбек Ада чаа тузындох пасталған. Школа 1943 чылда пӱдірілген. Ол пастап аал чӧбі полған, соонаң аны имнег туразы идібіскеннер, олған сады даа анда орныххан. 1973 чылдаң ол музыка школазы пол парған. Халғанҷызын анда 1986 чылда улуғ тыхтағ толдырылған! Пілдістіг, пу тусха теере ол илееде изел парған. Аннаңар культура учреждениезінің устағ-пастаа 2019 чылдаң аны «Культура» нацпроектке киріп аларға кӱстенген, кирек пічіктер тимнеен. Ирткен не чылда оларға оң полған. Чоохтирға кирек, 2023 чылда искусство школазы 55 чылын толдырған.
– Школаның фундаменті тыыдылған, прай поллар, чылығ паза чарытхы пирҷең cистемалар алыстырылғаннар. Тура иргі дее полған полза, мында хаҷан даа чылығ полҷаң, андағ даа полза, пӱдірігҷілер аны чылығлабысханнар, хырын алыстырыбысханнар,– ӧрінізін чазырбинча учреждениенің устағҷызы Ольга Демина.
Чайаачы туразар тиксі 130 пала чӧрче. Ідӧк нинҷе-де пала хонҷых ааллардаң килче. Олар сарнирға, теелбек саларға, хоостирға ӱгренчелер.
Боград аалдағы искусство школазында
Чайаачы ӧмені паза кічіг чуртағҷыларны Хакасия пазы Валентин Коновалов искусство школазы наа тыныс алғанынаң алғыстаан.
– Регионнарда культура учреждениелері тыхталчатхан ӱчӱн хазна президенті Владимир Путинге алғыс читірерге кирек. Аның пастаанынаң хазнада чайаачы туралар нааҷылалчалар, ӱгретчілер тоғысха, олғаннар піліс аларға хынып чӧрчелер,– таныхтаан чооғында республика пазы.
Ікі хоза ӱгредіг учреждениезін нааҷылирына 11 млн салковай артиинаң хорадылған. Ӧӧн чардых – ол федеральнай ахча. Чоохтирға кирек, 2019 чылдаң республикада «Культура» нацпроектче тӧрт культура туразы пӱдірілген паза 30 артиинаң тиксі тыхталған.
Боград аймаанзар тоғыс чорығынаң чӧргенде, Хакасия пазы Валентин Коновалов ідӧк орындағы чуртағҷыларнаң тоғазығ иртірген. Анда боградтағылар имнег киреене, чурт-коммунальнай хоныхха, ээзі чох адайларны чох идеріне теелчеткен паза даа пасха сурығлар пиргеннер. Оларны орындағы ӱлгее паза профильліг министерстволарға пӧк саларға чахығ пирілген.
2019 чылдаң пасти Хакасияның правительствозы хабазиинаң Боградта суғ паза чылығ пирҷең сетьтер, искусство школазы, котельнай, школа, олған сады паза Культура туразы тыхталған. Пӱӱл, тізең, С.А. Пестуновтың адынаң библиотека иптелерге кирек.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы