Iзi чох чітпезіннер
01.03.2024
Хабарлар
Пресс-конференция араласчылары
Пресс-конференция. Пу наада Л.Р.Кызласовтың адынаң национальнай чир-суғ ӱгренҷең музейде орныхчатхан Хакасияның культура министерствозының пресс-кінiнде чыылығ ирткен
Россияның чаа-тархын пiрiгiзiнiң (РВИО) Хакасиядағы пӧлиинiң кнезi, республиканың культура министрiнiң тоғызын толдырчатхан Светлана Окольникова филиалның 2023 чылдағы тоғызынаңар паза пӱӱлге турғызылчатхан пӧгiннердеңер чоохтаан. Пресс-конференцияда Россияның чаа-тархын чӧбiнiң региондағы пӧлиинiң попечительлер чӧбiнiң кнезi Владимир Штыгашев паза тиксi республикада пу кӧстегҷе тоғыс апарчатхан президиум кiзiлерi Нина Брайт, Татьяна Карташова, Василий Будылин, Андрей Готлиб паза Оксана Трусова араласханнар.
– Пӱӱнгi кӱнде пiстiң хазнада оой нимес тус. Илееде чир-суғҷыбыс ӧнетiн чаа операциязында араласча. Аннаңар пiске, тыл чуртағҷыларына, чааҷыларыбысха хабазарға кирек. Хакасия чуртағҷыларына патриот кӧстеглiг мероприятиелер иртiрiп, матырларыбысха хабазарға. Россияның чаа-тархын пiрiгiзiнiң региондағы пӧлиинің кiзiлерi ол кӧстегҷе тоғысты ӧткiн апарчалар.
1 январьда Россияның чаа-тархын пiрiгiзiнiң региондағы пӧлиинде 203 кiзi саналған. Тиксi Хакасияда тоғыс орындағы пӧлiк тоғынча. Шира аймаандағы пӧлік тоғысты иң ӧткін апарча. Олар патриот кӧстегҷе чапсых проекттер чуртасха кирчелер паза тiлег тоғыстарын иртiрчелер.
Россияның Хакасиядағы пӧлии матырларыбыс чонның сағызында халар ӱчӱн аймах тоғыстар апарча паза мероприятиелер иртiрче. Пiрiгiстiң тоғызы сылтаанда регионда 16 хумартхы тас паза бюст турғызылған.
Ағбандағы тимiр чол вокзалы алнындағы ачыхта 2023 чылның сiлкер айының 7-ҷi кӱнiнде Россия Матыры Игорь Ахпашевке хола бюст турғызылған. Аны республика бюджедi ахчазына турғысханнар. Матырның омазын Москвадағы скульптор Михаил Баскаков тимнеен. Кӱскӱзiн 2023 чылда СВО араласчызы, Россия Матыры Аймир Миягашевке Таштып аймаандағы Аңчул аалдағы пасталығ школада мемориал чардызы азылған. Аны тимнирiне Россияның чаа-тархын пiрiгiзiнең ахча позыдылған.
Пiрiгiс полызиинаң Хакас Республиканың филармониязы «Зори здесь тихие» операның премьеразын Луганск Чон Республиказында кӧзiткен. Iкi кӱн аразына Лугансктың паза Краснодонның пiр муңа чағын кӧрiгҷiзi операны кӧрiп алған. Лугансктағы культура паза искусство академиязының театр искусствозы кафедразының студенттерi ойында араласханнар.
Таныхтирға кирек, РВИО араласчылары – культура министерствозының паза республиканың культура учреждениелерінiң тоғынҷылары – Червонопартизанск городха ӧткін хабасчалар. Андағы Культура туразынзар паза искусство школазынзар наа аппаратура пирілген. Червонопартизансктағы библиотекаа наа кинделер, ол санда Хакасиядағы авторларның книгалары, ызыл парған.
Республикада иң алғым патриот мероприятиезі «Ӧбекелер чирі» тиксi Сибирьдегi чииттернiң форумы полған. Ол Россияның чаа-тархын пiрiгiзiнiң ахчалығ хабазии полызиинаң иртiрiлген. Сибирьдегi федеральнай округтағы чииттер 24 – 26 майда тілег паза патриот кӧстегҷе апарҷаң тоғыстарҷа опыттарынаң ӱлескеннер. Форумда 100 азыра чиит оол-хыс араласхан. Прай мероприятиелер Л.Р.Кызласовтың адынаң национальнай чир-суғ ӱгренҷең музейде ирткеннер. Чииттер «Меридиан» спорт-хазых тыытчаң базада чуртааннар.
Россияның чаа-тархын пiрiгiзiнiң Хакасиядағы пӧлии «МК-Групп» ООО-ның ӧӧн директоры Сергей Можаровтың хабазиинаң «Тархын хумартхызы» проектче «Матырлар пас чӧрген орамаларҷа...» кинде тимнебiскен. Книгада iкi чиит армеец-ӧӧредеңер чоохталча. Олар, чир-суғ ӱгренҷең музейнің «Хакасияның чааҷы сабланызы» залында пол килiп, ам пас чӧрчеткен орамаларҷа хаҷан-да саблығ матырларыбыс пас чӧргеннер тіп сағысха тӱcчелер. Кинденің авторы – Татьяна Корнева. Таныхтирға кирек, 2024 чылға пiстiң пӧлiк iдӧк улуғ пӧгiннер турғысча, – чоохтаан Светлана Окольникова.
Россияның чаа-тархын пiрiгiзi ӧнетiн чаа операциязының матырлары чон сағызында халар ӱчӱн тоғызын уламох алғым апарарға кӧстег турғысча. РВИО-ның Хакасиядағы пӧлиинiң кнезi Светлана Окольникова паза «Ада чир-суубыс арачылағҷылары» фондтың устағҷызы Оксана Трусова хада-пiрге тоғынардаңар чарадығда хол салыбысханнар.
– Фонд тоғызының ӧӧн кӧстеглерiнiң пiрсi – ӧнетiн чаа операциязының араласчыларынаңар хумартхыны чон сағызында халғызары. Пiс СВО ассоциациязы ветераннарынаң тоғысты ӧткiн апарчабыс, хайзы ӱр ниместең Хакасияда тоғынып пастабысхан. Пу тоғысты чахсы паза турыстығ толдырыбызар ӱчӱн паза тархынны хайраллап халар ӱчӱн, пiске Россияның чаа-тархын пiрiгiзiнiң хабазии киректелче, – чоохтаан фондтың устағҷызы.
– Пiске пӱӱнгi кӱнде ӧнетiн чаа операциязы араласчыларынаңар хумартхыны артыс саларға кирек, аннаңар чаа комиссариаттарынаң палғалысты хайди даа тӧстирге кирек. Пiр дее чир-суғҷыбыстың ады-солазы iзі чох чiт парбас ӱчӱн, – таныхтаан Владимир Штыгашев.
Амғы туста ӧнетiн чаа операциязында араласхан чир-суғҷыларыбысха хумартхы тас турғызарынҷа тоғыс апарылча. Аны Ағбан городтың 7 № сыырадында орныхтырарынаңар чоох парча. Iдӧк Илбек Ада чааға теелчеткен сурығларҷа тоғыс апарылча: Чиңiс кӱнiнiң 80 чылын таныхтиры, Хакасияның Сталинград чаалазиинда араласханнарға Мамаев кӱргенiнде танығ турғызары. Iдӧк Хакасияда чаа палаларына чарыдылған хумартхы тас турғызары кӧрілче. Пу чылда апарар тоғыстарға ахча кӧрiл парған. Пiр чыл аразына Ағбанда турғысчаң хумартхы тас паза Волгоградта турғысчаң танығ тимнел парарлар. Оларны килчеткен чылда часхызын турғызарға пӧгiнчелер.
Сом Альбина Чистогашевани
Автор :
Наталья Тюкпеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде