Кем аралас полар?
01.03.2024
Хабарлар
Кӧнi эфир. Хакасияның ӱгредiг паза наука министрiнiң орынҷызы Елена Конева кӧнi эфир иртiрген. Анда ол «Земскай ӱгретчi» федеральнай программадаңар чарыт пирген
Россия президентiнiң чарадиинаң 2019 чылдаң хазнада «Земскай ӱгретчi» федеральнай программа чуртасха кирiлче. Ол тоғынып пастааннаң Хакасия анда ӧткiн араласча – программа хоостыра позыдылған квоталар чыл сай чабылчалар. Ирткен чылларда республикаа позыдылған тӧрт квотаҷа ӱгретчiлер школаларда тоғын парчалар. Пасха хан тiлi ӱгретчiзi Абаза городта iстенче, ӱс математика ӱгретчiзi – Боград, Алтай аймахтарында.
Пӱӱл федеральнай кiн пiстiң республикаа ӱс квота кӧр салған. Программаның региондағы операторы Хакасияның ӱгредiг паза наука министерствозы полча, аннаңар «Земскай ӱгретчi» программада аралазарға сағынчатхан ӱгретчiлернiң мариин ол иртiрер.
Хайди чоохтапча ӱгредiг министрiнiң орынҷызы Елена Конева, пӱӱл математика ӱгретчiлерi аразында марығ иртiрiлер. Аның чиңiсчiлерi Таштыптағы 1№, Сорығдағы 3 № школаларзар паза Пиидегi школа-интернатсар тоғынарға ызыларлар. Аннаңар «Земскай ӱгретчi» программада аралазарға сағынчатхан ӱгретчiлер пу муниципалитеттерзер кӧзерге тимде ползыннар. Таныхтирға кирек, пу школаларда тоғынған алай ба тоғынчатхан ӱгретчiлер марығда аралас полбастар.
Кем марығда аралас полар? Анда 55 час толдырғалах, ол санда профессиональнай ӱгредiг учреждениезiн ӱр ниместе тоосхан математика ӱгретчiлерi аралазар оңдайлығлар. Олар ортын алай ба пӧзiк ӱгредiглiг ползыннар.
Марығда чиңiс тутхан специалисттерге пiр хати тӧлег пирiлер. Аның синi пiр миллион салковайға тиңнелче. Аны чиңiсчее пос киректерiне хорадарға чарир, сан пирiс идерге киректелбес. Школанаң чӧптезiг иткен соонаң ағаа анда пис чыл хайди даа тоғын саларға кирек. Че ол-пу сылтағнаң, ол санда ағырығ ӱчӱн, ӱгретчi школада тоғын полбин сыхса, ағаа ахчаны айландырарға килiзер. Iдӧк чиит специалист декрет отпускына алай ба армияа парыбысса, пу тус санға алылбас. Ол школада пис чыл толдыразынаң тоғын саларға кирек.
Прай пiчiктернi Хакасияның ӱгредiг паза наука министерствозынзар посха ағыларға алай ба почтаҷа ызарға чарир. Пiчiктер хосхар айының 30-ҷы кӱнiне теере алыларлар.
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы