Чир-суубыс тархынын таңмалапча
06.03.2024
Хабарлар
Равиль Дзязько Ваня Кучаковнаң хада аның сомы хыринда турчалар
Кӧзідіг. Л.Р.Кызласовтың адынаң чир-суғ ӱгренҷең национальнай музейде сомҷы Равиль Дзязьконың тоғыстары чон хайиина сығарыл парғаннар
Сомҷы позының кӧзідиин «Эпоха, в которой я живу...» адап салған. Анзы сынап андағ. Равиль Дзязьконың сығарылған тоғыстарында пістің республиканың чуртазы кӧзіділ парған нооза.
Кӧзідіг азылчатханына Хакасияның Ӧӧркі Чӧбінің, культура пірігістерінің кізілері паза туған-чағыннары килгеннер. Алғыстас сӧстерін читіргеннер Хакас Республика Ӧӧркі Чӧбінің культураҷа, ӱгредігҷе паза наукаҷа комитедінің кнезі Оксана Разварина, Л.Р.Кызласовтың адынаң чир-суғ ӱгренҷең национальнай музейнің директоры, тархын наукаларының кандидады Андрей Готлиб, «Саяны» хоккей клубының президенті, Хакас Республиканың аарластығ кізізі Юрий Шпигальских паза даа пасхалары. Олар, чайаачы тоғыстарны пӧзік паалап, автордаңар чылығ сӧстер чоохтааннар.
Оларның чооғынаң, Равиль Николаевичке хаҷанох мындағ кӧзідіг азарға кирек полған. Аның мында прай ла тоғыстары пирілбееннер. Ол сомҷы киреенең чуртас тооза айғас парир нооза. Іди ус сомҷы, фотоаппарадының кнопказын пазып, амғы тусты тархында артыс салча.
Равиль Николаевич Дзязько 1960 чылда 1 октябрьда Хакас автоном облазында Алтай аймаандағы Березовка аалда тӧреен. 1977 чылда Пии аалдағы ортымах школаны тоосхан. Оолағас 4 класста ӱгренчеткендӧк сомға суурарынаң айғас сыххан. Іди 1976 чылда орындағы «Саянская заря» газетада аның «Часхыдағы чахайахтар» пастағы сомы сығарылған. Равиль Николаевич пу киректе пастағы ӱгретчізіне саблығ хоос сомҷы Александр Колбасовты санапча. Ол андада Пии аймаандағы газетада сомҷы полып тоғынған.
Равиль Дзязько Ағбандағы музыка училищезінде ӱгренчеткен туста пістің «Чанар хус» пастағы операны сценада турғызарында араласхан. Композитор А.А.Кенельнің «Чанар хус» операзы Хакас автоном облазының 50 чылына чарыдылған полған. Равиль анда постановка чардығы ӱчӱн нандырған.
1981 чылда училищені тоосхан соонда ол Хакас автоном облазындағы телевидение паза радио искіриинің комитедінде телеоператорның ассистенті полып тоғын сыххан. 1984-1985 чылларда Москвада телевидение тоғынҷыларының курстарында ӱгренген. 1989 чылда Кемеровтағы культура хазна институдын тоозыбысхан.
Анаң, 2000 чылдаң сығара 2022 чылға теере, Равиль Николаевич Хакас Республика Ӧӧркі Чӧбінің аппарадында хабарлар пӧлиинде істенген. Анда Хакасияның Ӧӧркі Чӧбінің тоғызын чарыдып, ол сомнарын «Хакасия» паза «Хакас чирі» республиканың газеталарына пир турған.
Сағам, тізең, ол «Хакасия» газетада штаттағы нимес хабарҷы полча. Чирібіс чуртазын ідӧк сомнар пастыра чарытча.
Равиль Николаевич сомнар кӧзідіглерінде паза марығларында кӧп араласча. Тиктең нимес Хакас Республика Ӧӧркі Чӧбінің паза Правительствозының Аарластығ пічіктерінең таныхтатхан.
Пу кӧзідігде аның 60-ҷа сомы сығарыл парған. Оларда Ӧӧркі Чӧптің тоғызын, саблығ кізілер Владимир Штыгашевті, Виктор Преловскийні, Михаил Развожаевті, Михаил Саражаковты паза даа пасхаларын кӧріп аларға чарир.
Уғаа сіліглер чир-чайаанны кӧзітчеткен сомнар: кӧллер, чахайахтар, аалдағы тураҷахтар. Кӧрігҷілернің чӱректерін тибіретче харах частары ахчатхан Ваня оолағастың сомнал парғаны. Аның пабазы улуғ прапорщик Пётр Кучаков Донбасстағы чаада тынын пир салған. Равиль Дзязько Ағбанда чуртастарын пир салған чааҷыларны хумартхылапчатхан туста ол оолахты суурып алтыр.
Пу сомнар кӧзідии музейде 14 апрельге теере тоғынар. Олғаннарға паза чииттерге Пушкин картазынҷа кірерге чарир.
Сом Дмитрий Сунчугашевти
Автор :
Илья Топоев
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы