Хоос сӧс ээлерінің пайрамнығ кӱні
13.03.2024
Хабарлар
Марығ чиңісчілері Любовь Чугунекова паза Татьяна Кыштымова
Пайрам. Хакасиядағы С.П.Кадышевтің адынаң чон чайаачызының национальнай кінінде Писательлернің чоннар аразындағы кӱнін таныхтааннар
Хайди тӧстелген пу ӱлӱкӱн? 1986 чылда 3 мартта чоннар аразындағы ПЕН-клубтың 48-ҷі конгрезінде Писательлер кӱнін таныхтирға чаратханнар. Аннаң сығара ол кӱн профессиональнай ӱлӱкӱнге саналча.
Пу кӱнде пістің писательлер пастап Хакасиядағы Чайаачылар туразында чыылысханнар. Пістің региондағы пірігіс Россияның Писательлер пірігізінің пӧлии полча. Аннаңар, андар наа кізілерні алчатса, кирек пічіктерні Москвазар ызарға килісче. Анда чаратсалар, ол кізее ӧнетін пічік пирчелер. Іди пу чыылығда Россияның Писательлер пірігізіне ӱс кізіні алып аларға ӱннерін пиргеннер. Оларның санында кибелісчі Игорь Мамышев. Чайаачы кӧңніліг ирен, ӱр ниместең пазып, кибелістерінің ікі чыындызын сығар салған. Ағаа хоза, Игорь Филиппович хакас паза орыс тіллерінең кибелістер пасча паза оларны ікі тілге тілбестепче. Позы ол ағас узы полып тоғынча.
Олох чыылығда писательлер Валерий Полежаевке паза Илья Топоевке «Хакасияның чон писательі» пӧзік ат пирердеңер чӧпнең сыхханнар. Оларның пӱӱл пайрамнығ тӧреен кӱннері полар нооза.
Чоохтирға кирек, пӱӱл Хакасиядағы писательлер пірігізі позының 75 чылын таныхтир. Писательлернең хада Хакасиядағы Чайаачылар туразы 15 чылын пайрамнир. Алынҷа писательлернің дее тоғылах частары полар.
Чыылығ соонда прайзы Хакасиядағы С.П.Кадышевтің адынаң чон чайаачызының национальнай кінінзер «Хрусталь перо» ӱлӱкӱнні таныхтирға парғаннар. Аны Хакасияның Чайаачылар туразының тоғынҷылары (устағҷызы Надежда Бурнакова) тимнеп салғаннар. Полған на писательге улуғ нимес сыйых читірілген паза соонаң стол салылған.
Залда чыылыс парған чайаачыларны паза наа ла пасчатхан чииттерні Хакасияның культура министрінің тоғызын толдырчатхан Светлана Окольникова чылығ алғыстаан. Анаң ол Хакас Республика пазының ӧнетін стипендиязына турысхан Боград аймаандағы Троицкай аалның Культура туразының хоос устағҷызы, кибелісчі паза блогер Анастасия Литвинованаң «Абакан» газетаның хабарҷызы, прозаик паза драматург Анастасия Спалевичке сертификаттар читірген. Пу стипендияны алар марығда 35 частаң асхалах паза орыс алай хакас тілінең пасчатхан чииттер чыл сай араласчалар. Светлана Анатольевна ідӧк Хакасиядағы культура министерствозы паза Чайаачылар туразы тӧреміл иртірчеткен литература марығларында утхан чиңісчілерге ахчалығ сертификаттар читірген. Іди пӱӱл хакас писательлернің чоохтарын орыс тіліне паза саблығ орыс писатель Виктор Астафьевтің чоохтарын хакас тіліне тілбестир марығ иртіргеннер. Май айда В.Астафьевтің 100 чазын таныхтирлар нооза.
В.Астафьевтің «От чызы» чооғын уғаа маңат тілбестеп салған паза сыйых алған «Хакас чирі» газетаның хабарҷызы Татьяна Кыштымова. Митхас Туранның «Хобый хызы» чооғын орыс тіліне тілбестеп, чиңісчі полыбысхан Любовь Чугунекова.
Сағам Чайаачылар туразы, май айға теере, сӧбіредеңер хакас тілінең пазылған чайаачы тоғыстарның мариин иртірче. Аннаңар аралазарға маңзыраңар.
Cоонаң чоох тутхан Хакасиядағы писательлер пірігізінің кнезі Наталья Ахпашева. Ол писательлер пірігізінің кізілері халғанҷы туста хайдағ тоғыстар ит салғаннаңар искірген. Пӱӱнгі кӱнде орындағы писательлер пірігізінде 37 кізі саналча. Олар чайаачы тоғыстар пазарынаң на айғаспинчалар, ідӧк республиканың чуртазында ӧткін араласчалар. Іди пӱӱл февраль айда писательлер паза Чайаачылар туразының тоғынҷылары Хакасияның прай аймахтарында «Россия писательлері – фронтха» патриотизм чорығында араласханнар. Аннаңар ол чӧрімде ӧткін араласхан кізілерге Наталья Марковна Россияның Писательлер пірігізінің кнезі Николай Ивановтың адынаң Аарластығ пічіктер читірген. Андағ сыйыхтарны алғаннар СВО араласчызы, кибелісчі Игорь Ефремов (ол видео пастыра пайрамда араласхан), Хакасияның Чайаачылар туразының устағҷызы Надежда Бурнакова паза орындағы писательлер пірігізінең устаан, тахпахчы, чон узы Альбина Курбижекова.
Писательлерні пу пайрамда теелбектернең паза сарыннарнаң ӱтерткеннер С.П.Кадышевтің адынаң чон чайаачызының национальнай кінінің хоос ӧмелері.
Сом Хакасиядағы Чайаачылар туразының сайтынаң
Автор :
Илья Топоев
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде