Ӱгретчілер династиязы – аарласта
15.03.2024
Хабарлар
Хакасия пазы Валентин Коновалов форум араласчыларынаң хада
Тоғазығ. Хакасия пазы Валентин Коновалов «Родные – любимые» сӧбірелернің тиксі Россия форумының араласчыларынаң тоғасхан
Пӱӱл Москвада «Россия» чоннар аразындағы кӧзідіг-форумның площадказында «Родные – любимые» сӧбіре форумы ирткен, хайзында Россия президенті Владимир Путин 2024 чылны Сӧбіре чылы тіп чарлаан. Регионнар форумға иң турыстығ сӧбірелерні, тимнеп, ысханнар. Хакасияда республика адын арачылирға Карачаковтарның ӱгретчілер династиязы таллалған. Делегациянаң Нина Челтыгмашева устаан.
– Пістің сӧбіренің адынаң сірерге, Валентин Олегович, алғызым читірчем. Піске мындағ форумда аралазарға, республиканы турыстығ кӧзідерге оңдай пирген ӱчӱн. Ідӧк Хакасияның істеніс паза социальнай арачыланыс министрі Татьяна Раменскаяа паза министерствоның специализі Наталья Доброваа алғыс. Олар піске чорыхха тимненерге паза ол-пу сурығларны пӧгерге полыс турғаннар, – таныхтаан тоғазығда Нина Гавриловна.
Марығ-форумда аралазар сӧбіре кӧп палалығ, істеніс династиязы паза хазна тилізіне хозым иткен поларға кирек полған. Пу кирексіністерге Карачаковтар – Челтыгмашевтер – Байкаловтар ӱгретчілер династиязының сӧбірезі толдыразынаң нандырған.
Карачаковтарның кӧп палалығ сӧбірезінде тоғыс пала, оларның тӧрті – ӱгретчі! Олар Маргарита Гавриловна Байкалова, Николай Гаврилович Карачаков, Нина Гавриловна Челтыгмашева, Ольга Гавриловна Табурчинова. Карачаковтарның тӧрт тӧлінің ӱгретчілер стажы – 675 чыл! Оларның аразында турыстығ ӱгретчілер илееде: Россия ӱгредиинің аарластығ тоғынҷылары, істеніс ветераннары, Хакасияның саблығ ӱгретчілері, профессиональнай марығларның чиңісчілері паза даа пасхазы.
Форумда аралазарынаң пасха, сӧбіре Хызыл площадьта, океанариумда паза даа пасха танығлығ орыннарда пол килген. Кӱрген айының 23-ҷі кӱнінде хазна президентінең тоғазығ ирткен.
– Піс тӧртінҷі рядта одырғабыс. Сцена чахсы кӧрінген. Че Владимир Путин піссер сых килгенде, залдағылар аны турып удурлааннар паза, ол чооғын тоосханда, одырбааннар. Минің палам аны кӧріп аларға матап сағынған, тоғазығ хаҷан иртерін чидікпин сахтаан. Че алнындағы рядтағылар турыбысханда, ағаа кӧрінмин сыххан. Улуғ экран полған даа полза, ол аны пос хараанаң кӧріп аларға сағынған. Президентті кӧр полбинчатханына ачырған парып, ылғап салыбысхан, – сағысха кирче делегация араласчызы Татьяна Тюкпеева.
«Родные – любимые» сӧбірелернің тиксі Россия форумы араласчыларынаң тоғазығда Хакасия пазы Валентин Коновалов ӱгретчілер династиязына республиканы федеральнай синде турыстығ кӧзіт пирген ӱчӱн алғызын читірген паза пӱӱл кӧп палалығ сӧбірелерге улуғ хайығ салылар тіп таныхтаан. Ідӧк ол «Больше, чем путешествие» проект хоостыра Виктор паза Елена Байкаловтар сӧбірезіне путевка сыйлап пирген. Олар ӱс оол ӧскірчелер. Ирепчі Санкт-Петербургсар парарға пӧгінче, че оолахтар – Крымзар. Сӧбіренің тус ам даа пар. Пір чӧпке килзелер, чорыхха сығарлар.
Пу чыл хазнада Сӧбіре чылы тіп чарлалған, Хакасияда регион устағҷызы чарадиинаң Кӧп палалығ сӧбіре чылы иртірілче.
Сом Альбина Чистогашевани
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы