Школаҷах аалға iзенiс пирче
20.03.2024
Хабарлар
Школа директоры Юлия Сагатаева
«Ӱгредiг» нацпроект. Хазнада национальнай проекттер тоғынып пастааннаң кiчiг паза ыраххы аалларда ол-пу социальнай объекттер тыхталча паза пӱдiрiлче
Ирткен чылда Пии аймаандағы Киндiрлiг пилтiрi аалда «Ӱгредiг» нацпроектче ортымах школа пӱкӱлее тыхталған. Наа чыл соонаң ӱгренҷiлер паза тоғынҷылар школаҷахтарынзар айланғаннар.
Пiс аалзар читкенде, сiлiг школаны ырахтынох кӧр салғабыс. Ӱгредiг организациязының наа хыры кӱн сузына пызыңнапчатхан. Школаның пластик кӧзенектерiнiң пленказы ам даа хыйа алылбаандыр. Сенекте хоккей ойнаҷаң тирiглер турғлапчатханнар: кӱремҷіктер, конькилер паза даа пасха ниме-ноо. Иргi ниместер тіп сизiнчебiс.
Школаа толдыра чиис чызы чайыл партыр. Азыранҷаң тус полтыр. Олғаннар обедке маңзырапчалар. Столовай улуғ нимес, палаларға кӧмес хыстыныстығ пiлдiрче. Че ас-тамах татхыннығ – ӱгре, гречка котлетнең паза чей. Iдӧк олғаннарға яблоколар пирiлген. Столовайда палаларны Светлана Серёдкина азырапча.
– Тыхтағ тоғыстары тоозыл парғанда, столовайға прай наа оборудование алылған. Мында iкi холодильник пар полған. Амды хоза пiр пирiлген. Ол улуғ. Андар кӧп чиис кір парча. Амды ас-тамахты хайраллирдаңар пичелленерге кирек чоғыл. Аннаң пасха, пicке мармит турғыс пиргеннер. Андар тимнел парған чіҷең нимені сал салчазың. Мармит чииске сооп парарға пирбинче. Амғы СанПиН кирексіністері хоостыра ӱгренҷiлернi чылығ ас-тамахнаң азырирға кирек. Iзiг алай ба сооп парған чииснең азырирға чарабас. Мының алнында тимде чіҷең нимені чылығ плиткада тударға килiсчең.
Iдӧк пiстiң пароконвектомат пар. Анда котлеттернi, тефтельлернi паза даа пасха ниме-нооны iзiг оор пастыра тимнирге чарир. Амғы кирексіністерҷе, иттi, чағбан хайахта хаарбин, оорда тимнирге кирек нооза. Наа оборудованиенең мин ам даа тузаланғалахпын. Ӱгренерге кирек. Табаттағылар таңах идi 15 минутаа пыс парча тiп махтанғаннар, кӧр кӧрем, андағ ба, чох па. Амды пiс наа iдiс-хамыс сахтапчабыс. Оларны тӱрчедең ағыл пирерге киректер, – ӧрiнiзiн чазырбинча столовай тоғынҷызы.
Ас-тамах тимнеҷең ус Светлана Серёдкина ӱгренҷiлернi азырапча
Школада тыхтағ тоғыстары иртчеткен туста олғаннар пасха школаларзар ӱгренерге чӧргеннер: пасталығ класстағылар – Будёновказар, улуғлары – Табатсар. Светлана Серёдкина кiчiглерiн азырирға школа автобузынаң чӧрҷең. Ол кӧп палалығ iҷе. Хонғанынаң сигiс пала ӧскiрче. Иң кiчии пуох школада пастағы класста ӱгренче. Сӧбiре кӧп мал ӧскiрiп чуртапча, iҷе хысхызына ӱӱҷiк тамаан кӧп тустапча, вареньелер хайнатча. Аннаңар чиис тимнирiнде Светлана Серёдкина ус кiзi тирге чарир. Школаның пасталығ класстарындағы палалар тикке азыранчалар. Пасхазы ахча тӧлеп. Iдӧк льготалығ ӱгренҷiлер пар.
Киндірліг пилтіріндегi школада олғаннар тоғыс классха теере ӱгренчелер. Соонаң олар Алахтайлардағы алай ба Асхыстағы школа-интернаттарзар ӱгренерге парғлапчалар. Хайзы-да профессиональнай учреждениелерзер кiрче.
Школа «Ӱгредiг» нацпроект хоостыра нааҷылалған. Тыхтағ тоғыстарына паза оборудование, мебель аларына пӱкӱлее 75 миллион салковай позыдылған. Подряд организациязы чахсы тоғынғаннаңар, тыхтағ тоғыстары иптiг-амыр ирт парғаннар паза школа тузында тимге сыххан тiп таныхтапча школа директоры Юлия Сагатаева.
– Школаҷаабыс чарых, сiлiг пол парған. Олғаннар паза ӱгретчiлер чахсы кӧңнiлiг пеер килчеткенiн сизiнчебiс. Ӱгренҷiлерге наа оборудование чапсых. Пiстiң ам прай кабинеттерде, олаңай доскадаң пасха, iдӧк мультимедиа доскалары пар. Парталар, шкафтар, дидактическай, методическай пособиелер прай наанаң алылғаннар. Аннаң пасха, лабораторнай оборудование пирiлген. Информатика кабинедiнде полған на партада ноутбук турча паза полған на класста принтер пар. Интернет чахсы. Школаа спорт тирiглерi iдӧк пирiлген. Че оларны прайзын турғыс полбинчабыс. Пiстiң спортзалыбыс кирексіністерге нандырбинча. Кӧзiдiмге, аның пӧзии читкіҷе нимес. Аннаңар пiс анда волейбол, баскетбол тирiглерiн турғыс полбинчабыс. Олар тиктең чатпас ӱчӱн, тасхар турғыс саларға сағынчабыс. Школа хыринда хоккей ойнаҷаң коробка пар. Анда орын читкiҷе. Олғаннар анда даа ойнирлар. Iдӧк антитеррор хоостыра школада 41 камера турғызылған.
Тыхтағ соонаң школаҷаабыс сiлiг, иптiг кӧрiмнiг пол парған. Столовайыбысты паза спортзалыбысты алғыдыбызар оңдай полған полза, улам ӧрiнiстiг поларҷых. Аны алыстырар ӱчӱн, пiрее программаа кiр кӧрерге кирек, – чоохтапча устағҷы.
Амды ӱгредiг организациязы химия, биология кабинеттерiне реактивтер хайраллаҷаң шкаф паза ӧнетiн столлар сахтапча. Олар тӱрчедең чидерге киректер.
Пылтыр школа иптелген полза, пӱӱл аның ибiркiзi нааҷылалар.
– Ирткен чылда пiске iдӧк школа хыринда олған площадказын пӱдiр пиргенiне ӧрiнчебiс. Пӱӱл школа ибiркiзiн сиденнебiзерге, чарытхы тартыбызарға паза брусчатка тӧзебiзерге кирек. Анаң кiчiг школаҷаабыс улам сiлiглен парар, – ӧрiнче Юлия Сагатаева.
Пу школада прай 40-ха чағын олған ӱгренче. Iдӧк iкi пала школа алнындағы класста ӱгредіг алча. Ӱгретчiлер iдӧк пу аалдаңнар. Олар хаҷан-да пуох школада ӱгренгеннер. Диплом алған соонаң аалзар чуртирға айланғаннар. Амды анда сигіс ӱгретчi паза пiр воспитатель iстенче. Юлия Николаевна ӱгретчiлерiн «универсальнай специалисттер» тiп адапча. Олар ӱзер предмет апарчалар. Полған на предмет апарар алнында ӧнетiн курстар иртчелер.
Аалларда школалар, ФАП-тар, клубтар пӱдiрiлчетсе алай ба тыхталчатса, ол таңдағызына iзенiс пирче. Киндiрлiг пилтiрiнде чуртас аннаң андар хайнирында iкiнҷiлес чоғыл. Олғаннар уроктар соонаң ибзер парчалар, анаң клубсар маңзырапчалар. Анда оларға аймах кружоктар иртiрiлче нооза. Чоохтирға кирек, аал клубы iдӧк ӱр ниместе нааҷылалған.
Сомнар Альбина Чистогашевани
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы