Сағыста хаҷанға даа халар кӱннер
22.03.2024
Хабарлар
Фестиваль араласчыларынаң тоғазығ чылығ ирткен
Тоғазығ. Ағбандағы волонтерлар туразында Хакасия пазы Валентин Коновалов тиксі тилекейдегі чииттер фестивальы араласчыларынаң паза волонтерларынаң тоғасхан
Сочи хыриндағы «Сириус» федеральнай орында 1 – 7 мартта ирткен улуғ мероприятиеде 190 хазнадаң килген 20 муңҷа кізі араласхан. Хакасиядаң андар 32 оол-хыс чӧрген. Олар – пӧзік паза ортын ӱгредіг заведениелерінің студенттері, идінҷектер, аймах халых пірігістерінің араласчылары, аймахтардағы ӱгредіг устаныстарының паза пасха даа организацияларның тоғынҷылары.
– Сірер Хакасияны фестивальда турыстығ кӧзіткезер, аның ӱчӱн улуғ алғызым читірчем. Ізенчем, анда алған опыттарыңнаң, пілістеріңнең тузаланып, пасха чииттернең ӱлезіп, Хакасия тилізіне хозым идерзер. Мин сірерге мыннаң мындар прай киректеріңде оң пол турзын тіп алғапчам паза таныхтирға сағынчам – республика правительствозы тузалығ пастағларыңа хабас пирерге хаҷан даа тимде, – удурлаан фестиваль араласчыларын Валентин Коновалов.
Анаң ол фестивальны иртірерге полызарға чӧрген волонтерларға Чииттер киректерінҷе федеральнай агентствоның алғыстас пічіктерін читірген. Хайди таныхтаан фестиваль араласчылары ӧмезінең устаан «Стратегия пастағларының паза проекттерінің чииттер кіні» чыындының директоры Никита Мальчиков, Хакасияның волонтерлары «Сириуста» постарын уғаа чахсы кӧзіткеннер, фестиваль тӧстегҷілері дее оларның тоғыстарына морсынғаннар. Ағаа хоза, «кӱмӱс» волонтерларыбыс чииттерге дее маң пирбееннер тіп таныхталған. Ідӧк фестивальда республикабыстаң парған араласчыларны таныхтаптырлар, пістің оол-хыстарыбыс прай площадкаларда ӧткін араластырлар паза 100 процент араласчы мероприятиелерге чӧрген кӧп нимес ӧмелернің санына кір партыр. Фестивальға чииттерібіске ӧнетін тӧӧй кип-азах тимнелген. Анда республикабыстың ады пазылған, культурабыснаң палғалыстығ хоостар хоосталған. Мындағ оңдайнаң фестиваль араласчыларыбыс ідӧк кӧп хайығ тарттырлар.
Тоғазығда чииттер республика устағҷызына сурығларын пиргеннер. Олар Хакасияда регионнар аразындағы чииттер фестивальын иртірер оңдайлардаңар сурғаннар, республикада иртчеткен «Этнова» форумға хай пірее алызығлар кирер (кӧзідімге, 16 часха читкелек олғаннарға анда аралазар оңдай пирердеңер), республика синінде чииттер пастағларының мариин тӧстир сағыстарынаң ӱлескеннер. Валентин Олегович фестиваль иртіреріне ахча киректелче, пу чылға, тізең, бюджет алыл парған, аннаңар аны килчеткен чылға ла кӧстирге чарир тіп таныхтаан. Че пу сурығны паза пасха даа чӧптерні профильліг министерстволарға хайыға аларға чахығ пирген.
Фестиваль араласчыларының санында Ольга Кыштымова полған. Ол Алтай аймааның «Хада» олғаннар паза чииттер пастағларының кінінде істенче.
– Мындағ улуғ чыылығда аралазарға ӱлӱс тӱскеніне тың ӧрінчем. Аны кӧріп, хазнабыс ӱчӱн поғдархас тӧріпче. Фестиваль уғаа пӧзік синде ирткен, тӧстегҷілері, прай сариларын ӧтіре сағынып, фестиваль араласчыларына истіг ползын тіп кӧп кӱс салтырлар. Анзы іле кӧрінче. Паза пасха хазнадаң килген аалҷылар Россиянаң, аның чуртағҷыларынаң чағын танызып алғаны уғаа чахсы тіп сағынчам. Ідӧк пістің хазнабыстаңар, регионнарынаңар, республикабыстаңар чоохтир оңдай полған. Ізенчем, пу фестиваль соонаң Хакасиязар кӧп аалҷы килер. Піс наа таныстарыбысха кӧп чапсых ниме искіргебіс, сувенирлер кӧзіткебіс, сыйлаабыс. Чоохтарыбысты искен соонаң кӧбізі піссер ааллап килер кӧңніліг полған.
Фестивальда мин ӧӧнінде ӱгредігліг площадкаларҷа чӧргем. Ідӧк чииттер политиказынаң, ӱгредіг киреенең паза пасха даа кӧстеглернең айғасчатхан кізілернең тоғазығлар ирткен. Сағызымда ӱрге халар, неке, минің саблығ нейропсихолог Татьяна Черниговскаяның лекциязына кіріп алар ӱчӱн улуғ теесте турғаным. Ідӧк «Піліс» Россиядағы пірігіс иртірген лекцияларға кӧп чӧргем. Кӧзідімге, анда Сбербанктың устағҷызы Герман Греф, Росатомның топ-менеджері Кирилл Комаров паза пасха даа уғаа чапсых, саблығ кізілер чоох тутханнар.
Пасха-пасха хазналардаң нанҷылар табызып алғабыс. Оларнаң палғалыс тударбыс. Фестивальда алған пілістерні позымның тоғызыма кирер сағыстар толдыра. Че фестивальдаң айланғаннаң кӧп тус ирткелек, аннаңар прай ол сағыстарымны пастап иптеп аларға кирек, – чоохтапча Ольга.
Паза фестивальда аралазарға ӱлӱс тӱскен кізілернің санына «Асхыр» хакас чииттернің халых пірігізінің кнезі Николай Котюшев кірген. Ідӧк ол Россия ФСИН-ының Хакасияҷа пӧлииндегі 19 № имнег частьында имҷі терапевт полып тоғынча.
– Пір саринаң ибіме тың сағын парғам, че пасха саринаң анда уғаа хынығ, чапсых полған, андартын парарым даа килбинчеткен, – сағыстарынаң ӱлескен чиит оол. – Фестивальға таллағ 2023 чылда октябрьда ирткен, мин сурыныс пічиин сайтта артыс салғам. Февраль чит килген, че пір дее нандырығ килбинчеткенде, фестиваль араласчылары санына кір полбаам тіп сағынғам. Че, тӱрче полғанда, мині сахтапчалар тіп пічік килген, анзына тың ӧрін парғам.
Фестиваль кӱннері сағызымда хаҷанға даа халарлар. Кӧп спикерні истерге ӱлӱс тӱскен, анда, орамаҷа олаңай пас парчатсаң даа, пірее саблығ кізее тоғас парарға чарир полған. Оларнаң андох чоохтазып алчатхабыс, хада сомға суурынғабыс. Прайзы ачых-чарых полған, хынып чоохтасчатханнар. Кӧңніме Россияның спорт министрі Олег Матыциннің лекциязы кірген, че мин, грек-рим кӱресчізі, Олимп ойыннарының ӱс хати чиңісчізі Александр Карелиннең танызып алғаныма тың ӧрінчем. Аның лекциязына кір полбаам, че ағаа, орамаҷа пас парчадып, тоғас парғам. Ол Хакасияа улуғ чолабит читірген, республикабысха уғаа хынчатханын таныхтаан. Піс аннаң уғаа чахсы чоохтазып алғабыс. Александр Александровичтің чооғы сағызыма сиип парған, ол олаңай ла сӧстернең кізі кӧңнін кӧдір полча.
Ідӧк пасха хазналардаң килген чииттернең танызып алғаныма тың ӧрінчем. Неделя аразына ла англия тілінең чоохтанчатханымны алнындағызының хыринда хай-хай пӧзік синге кӧдіріп алғам. Фестивальда алынҷа регионнарның, городтарның кампустары полған. Сағынчам, полар фестивальға Хакасияның андағ кампузын тимнеп салған ползабыс, уғаа чахсы поларҷых. Анда культурабыснаң, кибірлерібіснең таныстырарҷыхпыс. Паза пасха хазна чуртағҷыларына республикабыстағы туризмнеңер чоохтир оңдай поларҷых.
Cом Альбина Чистогашевани
Автор :
Татьяна Кыштымова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде