Сыныхтаға – палаларнаң хада
22.03.2024
Хабарлар
Чӧрім араласчылары
ЕГЭ-2024. Пу кӱннерде тиксі Россияда «Хада тутчабыс! Іҷе-пабаларның ЕГЭ тутчаң кӱні» чӧрім иртче. Аны Рособрнадзор сигізінҷі хати иртірче. Хакасия ағаа чыл сай хозылча
Пӱӱл Россияда Сӧбіре чылы, Хакасияда, тізең, ідӧк Кӧп палалығ сӧбіре чылы иртчеткенде, паба-іҷелер палаларына ЕГЭ-ны тударға хозылғаннар. Акциядаңар паза хазна сыныхтағлары алызығларынаңар республиканың ӱгредіг министрінің орынҷызы Елена Конева чарыт пирген.
– Чӧрім кӧрік айы тоозылғанҷа иртер. Анда іҷе-пабаларға палаларынаң хада, экзамен иртчеткен орынзар киліп, сыныхтағ иртібізерге чарир. Анзы ӧӧн сыныхтаға чахсы тимненер оңдай пирер. Полған на чыл Рособрнадзор предметті алыстырча. Пӱӱл чӧрім араласчыларына пілістерін тархын предметче кӧзіт пирер оңдай полар. Оларға 30 минута пирілче, – таныхтаан чооғында Елена Павловна.
Акцияа иң пурун Ағбан хозылған. Городтың 31№ школазынзар Ағбанның ӱгренҷілері паба-іҷелерінең хада чыылысханнар. Тиксі 30-ча кізі.
Экзаменге ікі ӱгренҷінің пабазы килген, пасхазы – іҷелер.
Андрей Лыщицкийнің оолғы Денис Ағбандағы гимназияда ӱгренче. Пӱӱл 11 класс тоосча. Олар сыныхтаға хада килгеннер.
– Улуғ хызым школаны хаҷанох тоозыбысхан. Ол туста мындағ чӧрімнер иртпееннер. Пӱӱл оолғым школа тоосча. Акцияда аралазарға хығырғанда, тоғыр полбаам. Амды аннаң хада мында турып чӱрексіпчем, позым школа тоосчатхан чіли пілдірче. Позым, тізең, школаны 30 чыл мының алнында тоосхам, кӧп ниме ундудыл парған. Тимненерге киліскен. Ол туста сыныхтағны билеттер тартып тутчаңмыс. Ниик билет киліс парза, ӧрінчезің, аар билет полза, сидіксінчезің, – чоохтапча Андрей Павлович.
Денис тиктең нимес тархын предметті таллап алған. Ол тархын факультедінзер кірерге пӧгінче. Амды сӧбіре вузты таллапча. Позы ол ЕГЭ иртерінең чочынминча. Чиит оол пу предметче кӧп олимпиада-марығда араласхан. Пӧзік піліс кӧзіткен, аннаңар чӱрексібинче.
Ағбан чуртағҷызы Василий Плотский, тізең, хызы Ангелинаа хабас пирер пӧгіннең акцияда араласчам тіпче.
– Мағаа хынығ піліп аларға, хайди ЕГЭ иртче. Аннаң ӱгренҷілерні матап хорғытчалар нооза. Олох туста палаа полыс пирерге сағынчам. Ол пілзін, хайдағ даа сидіксіністі иртіп аларға чарир. Тың чӱрексібезін. Аның чуртазында ЕГЭ-даң даа артых сыныхтағлар полар, – тіпче Василий Иванович.
Сыныхтағ ӧӧн ЕГЭ-даң пір дее пасхалалбаан. Улуғлар палаларынаң хада ідӧк линейкаа турыбысханнар, инструктаж ирткеннер, телефоннарын ӧнетін тимнелген харчахта артысханнар, паспорттарын сыныхтаға пиргеннер паза металлодетекторҷа ирткеннер. Кабинетте пірердең одырғлааннар, чоохтазарға паза пасхазынаң полызығ сурарға чарадылбаан. Заданиелер, тізең, оларның кӧзіне сығарылған.
Чоохтирға кирек, пӱӱл республикада 2500 олған хазна сыныхтағларын иртер тіп кӧрілче. Ол пӱӱл паза ирткен чылларда школаны тоосхан олғаннар. Ідӧк ЕГЭ-ны СПО учреждениелерінің студенттері тударлар. Экзамен 20-ге чағын орында иртер. Анда видеокамералар турғызылар.
Россия президенті Федеральнай Чыылыға айланызында ЕГЭ-да таллап алған предметті ӱгренҷілерге хати тударға оңдай пирерге кирек тіп таныхтааннаңар, федеральнай синде экзамен иртер кӱннерзер алызығлар кирілчелер. Кӱннер кӧріл парзалар, Хакасияның ӱгредіг паза наука министерствозы аннаңар хоза искірер.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде