Спортнаң айғасчатхан харындастар
10.04.2024
Статья
Ярослав паза Тимур Пахтаевтер
Кӱн матырлары
Пу ікі оолах, Ярославнаң Тимур Пахтаевтер, «Хола пырғыҷахтың» чағын нанҷылары полчалар, олар піске сыбыра пічіктер пасчалар. Оолахтар грек-рим кӱрезінең айғасчалар, аннаңар ол-пу марығларға хайди пар килгеннерінеңер ӱлесчелер.
Ярослав улии полча, ол 12 частығ, Ағбандағы 22№ школаның 5-ҷі клазында ӱгренче. Тимур 10 частығ, ол пуох школада 4-ҷі классха чӧрче. Оолахтар Асхыс аймаандағы Илимор аалда Анатолий Геннадьевич паза Лилия Валерьевнаның сӧбірезінде тӧрееннер. Алты чыл мының алнында Ағбанзар кӧс килгеннер.
Тӧреен аалында олған сады чох полғаннаңар, школаа парар алнында іҷе-пабазы палаларын городтағы 11№ школазар тимнегліг классха пирібіскен. Че Ярославтың клазында пір кӱр оолах табыл парған. Ол Ярославты хыпчыхтырарға ла кӱстенҷең. Анаң оолах іҷе-пабазына позын кӱреске пирібізерге сурынған. Тимур, тізең, 22№ школадох 1 класстаң сығара тренер Виталий Григорьевич Чичининзер кӱреске чӧр сыххан.
Соонаң, 3 класста ӱгренчеткенде, Ярослав хол-азахнаң тудысчаң спорт школазынзар тренер Валентин Еремеевич Кольчиковсар позы парып, пазын салған. Пу школада аның пӧле харындастары Антон паза Алексей Пахтаевтер кӱреснең айғасханнар, пӱӱнгі кӱнде армияда служба апарчалар. Олар оолахха чахсы кӧзідім полчалар.
Тимур туңмазы, 3 классха сыхханда, харындазы айғасчатхан спорт школазынзар олох тренерзер чӧр сыххан. Алында оолах, аҷазын хооп чӧріп, ол школазар ойнирға сыбыра чӧрҷең, аннаңар андағы тренерлер аны чахсы таныпчатханнар.
Оолахтарның пастағы чиңістері 2022 чылда полған. Н.Г.Булакиннің адынаң «Абакан» спорткомплексте ирткен марығ «Фестиваль единоборств» адалған. Ярославнаң Тимур ікӧлең хола медальларға турысханнар.
– Пу марығ минің сағызымда тирең халған. Алында палаларым марығларда орыннар ал полбинчатханнар. Мин сағынғам, олар марыға чӧріп пастазаларох, чиңістер тударға киректер, че андағ полбиндыр. Илееде марығларда араласханнар. Пу марығда, тізең, пастағы чардыхта ікізі утырыбысхан. Анаң Ярослав, туңмазынзар пастырып, аның кӧңнін кӧдіре алған. Іди Тимур ікінҷі турда утып алғанын позы даа сизінмин халған. Анаң сизінчем, аҷазы, туңмазынаң халбасха тіп, маң пирбеске полып, харбазығда прай кӱзін салча. Ідӧк утып алған, – чоохтапча іҷезі Лилия Валерьевна.
2023 чылда пуох «Фестиваль единоборств» марығда аралазып, Тимур І орын алған, Ярослав – ІІ орын. Аннаң сығара кӱресчі оолахтар чиңістерні холларынаң паза позытпааннар. Олар Хызылчар, Новокузнецк городтарда марығларда араласчалар. Ӱр ниместе Тимур Хызылчар крайындағы Краснотуранскта ирткен грек-рим кӱрезінҷе марығдаң алтын медаль ағыл килген, Ярослав – хола медаль. Хай пірее марығларға оолахтарны пабазы Анатолий Геннадьевич ал чӧрче.
Ярослав – тӧреен тілін чахсы пілчеткен оолах. Ол хакас тілі марығларында сыбыра араласча. 2021 чылда оолах «Ине тілі» республика синіндегі хакас чонның алыптығ нымах чылына чарыдылған марығда кӱзін сынаан. Аның ӱчӱн Хакасияның тіл, литература паза тархын наука-істезіг институдының устағҷызы Нина Майнагашева ағаа ӧнетін сертификат читірген. 2022 чылда Ярослав, «Палитра культур» чоннар аразындағы тӧреен тіллерҷе марығда аралазып, «Хоос сӧс» номинацияда ІІ орын холға кирген.
Мыннаң Ярославтың хакас тілін матлама пілчеткеннеңер сыйыхтары тоозылбинча. Пылтыр оолах М.И.Боргояковтың адынаң хакас тілінҷе региондағы олимпиаданың школадағы чардығында ІІІ орын алып алған. Таныхтирға кирек, Ағбандағы 22№ школада хакас тілін ӱгренчеткен олғаннар кӧп, аннаңар республика синіне сығып алар ӱчӱн, марығда илееде ӱгренҷі араласхан.
Ідӧк Ярослав Пахтаев «Сибирьдегі чоннарның чир-чайаанын паза тархын-культура ис-пайын хайраллиры» республиканың наука-практикалығ конференциязында, ӧткін аралазып, «Сибирьнің материальнай нимес культура ис-пайы» номинацияда ІІ орын алған. Андада ол сӧбірезінең хада, хакас чонның кип-азаанаң таныстырып, видеоға суурынған. Хазыр жюри чахсы тоғысты турыстығ паалаан.
Пӱӱл Ярослав Тӧреен тілнің чоннар аразындағы кӱніне чарыдылған «Чурта, тӧреен тілім» марығда «Чахсы хығырғаны» номинацияда ІІІ орынға турысхан. Пу ідӧк улуғ чидіг.
Школазын республика синінде кӧдіре алчатхан паза чахсы ӱгренчеткен ӱчӱн Ярослав директор Ирина Павловна Окуневаның холынаң грамота алған.
Пу кӱннерде оолах 5-ҷі класстағы ӱгренҷілерге иртірілчеткен хакас тілі мариинда араласханох, аннаңар чиңіс тудып, ахчалығ сыйых аларына ізенче. Пу марыға аны ӱгретчізі ле нимес, че ідӧк іҷезі ӧнетін тимнеен. Ибде Лилия Валерьевна Ярославты паза Тимурны, стол кистіне одыртып алып, диктант пастырған. Пазағы чылда Тимур ідӧк хакас тілі мариинда аралазар, аннаңар іҷезі аны азынада тимнепче. Сӧбіреде прайзы саңай хакас тілінең чоохтасча.
– Оолахтар ынағлар, удур-тӧдір полызысчалар, Тимур Ярославтың чооғын исче. Ибде турник пар, олар иир сай анда тартынчалар. Иб аразында хайынарға полысчалар. Харындастар Илимор аалзар ууҷаларынзар ааллап чӧрерге хынчалар. Ярославтың анда нанҷызы Тагир Боргояков пар. Ол ідӧк спортсмен оолах, – теен Лилия Пахтаева.
Чайғызын оолахтар «Пуланнығ кӧл» олған спорт лагерьінде тынанчалар. Тӱрчедең чайғы каникуллар пасталар, аннаңар олар пазох андар парарлар.
Сом сӧбіре архивінең
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде