Чиңіс часхызы
Пӱӱн, сiлкер айының 9-ҷы кӱнiнде, Ағбанда Илбек Ада чаадағы Чиңістің 79-ҷы чылына чарыдылған «Чиңiс часхызы» пайрам ирткен. Анда Хакасияның устағ-пастаа, правительство, халых пiрiгiстерiнiң кiзiлерi араласханнар.
Iдӧк трибунада Илбек Ада чаа ветераннары, тыл iстенҷiлерi, чаа палалары, кизек чаалазығларда араласхан ветераннар одырғаннар. Оларзар паза городтың Пастағы май площадьынзар чыылысхан чуртағҷыларзар паза аалҷыларзар Хакасия пазы Валентин Коноваловнаң республиканың Ӧӧркі Чӧп кнезi Сергей Сокол айланған. Регионның устағ-пастаа, Чиңiстi чағыннадып, фронтта чааласханнарға, тылда iстенгеннерге алғыстарын читiргеннер паза амды ӧнетiн чаа операциязында араласчатхан чир-суғҷыларыбыс iдӧк чиңiснең айланарлар тiп iзенiстерiн искiргеннер.
Анаң пайрамнығ маршнаң площадьсар парад кип-азахтығ чааҷылар, кӱс структураларының, кизек чаалазығлар араласчыларының расчеттары строевой хаалағнаң сыхханнар. Оларның соонаң механизированнай колоннада ретроавтомобильлер ирткеннер. Тиксi алза, пайрамнығ маршта 900-че кiзi араласхан.
Пайрамның ӧӧн чардығы тоозылғанда, Хакасияның чайаачы ӧмелерi улуғ концерт программазынаң ӧрiндiргеннер. Олох туста Ағбанның Чиңiс паркында паза аның хыриндағы орамаларда аймах ӱтертiстiг мероприятиелер ирткен. Iдӧк анда чуртағҷыларға тушенкалығ гречка чiп аларға оңдай полған.
Сомнар Дмитрий Сунчугашевти
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |